УИХ-ын Ёс зүй, сахилга хариуцлагын байнгын хорооны өнөөдрийн хуралдаанаар Монгол Улсыг 2021-2025 он хүртэл хөгжүүлэх таван жилийн үндсэн төлөвлөгөөг хэлэлцлээ. Энэ үеэр тогтоолын төсөлтэй холбогдуулан гишүүд асуулт асуулаа.

Б.Баттөмөр: Монголын төрд 200 гаруй мянган хүн ажиллаж байна. Хүн амын тоотой харьцуулахад энэ бол их тоо. Төрийн албан хаагчдын тоог багасгах боломж байна уу. Хөтөлбөрт тэгж тусгасан юм алга. Технологи хөгжөөд цахимд шилжиж байна. Тиймээс орон тоог хэмнэх ямар боломж байна вэ. Яг үнэндээ төрд чадвар муутнууд ажиллаж байна. Чадалтайнууд нь хувиараа ажиллаж байна. Яагаад чадваргүй хүмүүс ажиллаж байна гэхээр цалин бага байна. Болдог бол 30 хувиа хэмнээд тэр мөнгөө чадвартай боловсон хүчиндээ хуваавал дээр юм биш үү гэж бодох юм.

Дээр нь төрийн өмчийг үнэгүйдүүлэхийг таслан зогсооно гэсэн байна. Тэгвэл ардчилалд шилжсэн 30 жилийн хугацаанд үнэгүйдэж явсан байх нь. Үүнийгээ хүлээн зөвшөөрч байгаа юм байна. Яг ямар факт байна вэ. Тэрийгээ хэлээч. Хувьцааны үнэ унахыг үнэгүйдэх гэх болов уу гэж бодох юм. Гэтэл үгүй бололтой.

Л.Оюун-Эрдэнэ. Төрийн өмчит компаниуд төрийн үйлчилгээ, төрийн захиргаа ч биш нөхцөл байдал үүсээд байна. Төрийн өмчийн бодлого зохицуулалын газрын даргад чиглэл өгсөн. Ажлын хэсэг байгуулагдаж байна. Зарим нь төрийн өмчит байгууллагууд маш олон захиралтай, чиг үүрэг давхацсан байдалтай байна. Магадгүй хувийн компани 50 хүнтэй хийх боломжтой ажлыг төрийн өмчийн компани 100 хүнтэй гүйцэтгэж байна уу гэдгийг судална. Төр муу менежер гэдэг бас буруу ойлголт юм байна. Өмч хувьчлалыг зөв хийхгүй бол хэдхэн хүн хувьчилж авдаг байдал газар авах нь.

Төрийн албан хаагчдын хувьд Цахим монгол хүн хөтөлбөртэй уялдуулж шат дараатай бууруулах ажлыг хийнэ. Үүнийг төрийн албаны зөвлөлтэй ярина. Гэхдээ яахав, эдийн засаг тэлэхийн хэрээр зарим агентлаг шаардлагатай байна. Тиймээс УИХ, Засгийн газар нэгдсэн бодлоготой байх ёстой. Хамгийн чадварлаг хүмүүс төрд ажилладаг байх, цомхон байхтай санал нэгдсэн. Их хурал дээр ярилцах асуудал бий.