Улс төрд өрнөх одоогийн үйл явцууд орон нутгийн сонгууль гэхээс илүү ирэх зургадугаар сард болох Ерөнхийлөгчийн ээлжит сонгуулийн угтал байх нь ээ. Төрийн тэргүүний сонгуульд УИХ-д суудалтай намууд нэр дэвшүүлж бүх ард түмнээс сонгодог учир ирэх сонгуульд МАН, АН, МАХН, ХҮН гэсэн дөрвөн нам оролцох эрх нээлттэй байгаа гэсэн үг. Үндсэн хуулийн нэмэлт өөрчлөлтөөр төрийн тэргүүнийг зургаан жилээр нэг удаа сонгодог болсон.

Энэ удаагийн сонгуулиар Х.Баттулга Ерөнхийлөгч арван жил төрийн тэргүүнээр ажиллах уу, эсвэл шинэ хүн зургаан жилээр тамга барих уу гэдгийг шийднэ. Төрийн тэргүүний хувьд АН-аас дахин нэр дэвших эрхээ авах их ажиллагаагаа эхлүүлсэн. УИХ-ын сонгуулиар АН олонхи болж чадаагүй нь Ерөнхийлөгч Х.Баттулгын хувьд хамгийн ашигтай хувилбар. Учир нь тэрбээр АН-д аврагчийн дүрээр эргэн ирэх боломж ингэж нээгдсэн юм.

Түүний хувьд МАН-аас бусад намуудыг АН-д нэгтгэх ойрын зорилготой ажиллаж байгаа.

Үүнийхээ эхлэл болгож орон нутгийн сонгуульд АН, МАХН, ШИНЭН-ууд нэг тойрогт-нэг нэр дэвшигч гэдэг хувилбараар оролцохоор болж байгаа. Энэ бүхнээс харахад ирэх Ерөнхийлөгчийн сонгуульд МАХН нэр дэвшүүлэхгүй, АН-ыг дэмжиж оролцох магадлалтай байгаа. Тэгвэл түүний хамгийн том өрсөлдөгч гарцаагүй МАН-ын нэр дэвшигч болох нь гарцаагүй. Тус намын нэр дэвшигч нь хэн байх бол. Үндсэн хуулийн өөрчлөлтөөр түүхэндээ байгаагүй эрх мэдэлтэй болсон Ерөнхий сайдын албыг хашиж байгаа У.Хүрэлсүх үү, өөр нэр дэвшигч үү гэдэг асуултын хариу одоохондоо бүрхэг. АН-ыг бусад жижиг намуудаар дэмжүүлэх нь одоогийн Ерөнхийлөгчийн гол зорилго байгаа бол Ардын намын даргын хувьд аль фракцаа түших вэ гэдэг сонголтоо хийж байна. Ерөнхий сайдын шууд эрх мэдлийн хүрээнд байдаг Тагнуулын Ерөнхий газрын даргыг уржигдрын Засгийн газрын хуралдаанаар томилсон.

Түүний сонголт нь сар хүрэхгүйн өмнө тус газрын тэргүүн дэд даргаар томилогдсон П.Одонбаатар байлаа. П.Одонбаатар бол 2001 оноос тагнуулын газрын ахлах мөрдөнгөөс эхлээд тасгийн дарга, албаны дарга, Орон нутгийн газрын дарга, дэд дарга хүртэл дэвшин ажилласан мэргэжлийн хүн. Мэргэжлийн талаасаа магадгүй хамгийн сайн сонголт байсан байх.

Гэхдээ Тагнуулын ерөнхий газрын даргын томилгоонд мэргэжлийн байдлаас гадна улс төрийн өнцөг заавал ордог. Энэ бол үе үеийн Тагнуулын ерөнхий газрын дарга нарын томилгооноос харагддаг бичигдээгүй дүрэм. П.Одонбаатарын хувьд Дундговь аймгийн харьяат, өнгөрсөн УИХ-ын сонгуулиар тус аймгаас олонхийн саналыг авсан Сү.Батболдтой нэлээд ойр хүн. Ерөнхий сайд Тагнуулын Ерөнхий газрын даргаар түүнийг томилсон нь нам дотроо Сү.Батболдын фракцын дэмжлэгт найдаж байгаагийн илэрхийлэл ч байж мэдэх юм.

Б.Цэрэнлхам