УИХ-ын гишүүн Ц.Мөнхцэцэг, Ч.Ундрам нарын санаачилгаар “Үндэсний боловсролын тогтолцоог сайжруулах нь” хэлэлцүүлэг Төрийн ордонд боллоо.

Ц.Мөнх-Оргил: Боловсролын багц хуулийг намрын чуулганаар Засгийн газар өргөн барьж чадахгүй бай гэж бодож байна. Замсгийн газрын өмнөөс ингэж хэлэх эрхгүй ч БШУЯ-ны байгуулсан ажлын хэсгийн гишүүн нь юм. ажлын хэсгийн явцыг хараад байхад намрын чуулганаар хэлэлцүүлж амжихгүй. Одоо Боловсролын багц хуульд оруулах нэмэлт, өөрчлөлтийн зөвхөн үзэл баримтлалыг бэлдэж байгаа. Дээр нь чухал асуудлыг түргэн шуурхай хэлэлцэж, оруулж  ирэх нь зохимжгүй байх.

Хоёрдугаарт, БСШУЯ-ны сайд нар байнгын хороодтой хамтраад хэлэлцүүлэг болон таван дэд ажлын хэсгийг гаргах юм байна лээ. Хамгийн гол нь зөвшилцөлд хүрэх ёстой. Хэдэн хүн суучихаад алх барьж батлаад ингэж зөндөө л явлаа шүү дээ. Хуульд ямар ч өөрчлөлт орсон боловсролын шинэчлэлт хийх өчүүхэн хэсэг.

Гуравдугаарт, Засгийн газрын мөрийн хөтөлбөрт Кембрижийн сургууль нэмнэ, нэмэхгүй гэсэн маргаан явсаар өнөөдөр цэг нь тавигдах шиг боллоо. Сайн таль нь боловсролын реформд бүгд анхаарлаа хандуулаад эхэллээ. Сул тал нь сургалтын хөтөлбөрийн шинэчлэл гэх өрөөсгөл ойлголт газар авчих вий. Цогцоор нь авч үзэх системтэй хандлага чухал байна. Төрөөс баримтлах бодлогын баримт бичгийн нэгдүгээр зүйлд нэг юм тусгачихаад дараагийн зүйл дээр нь нөгөөхөө үүсгээд байна гэлээ. Тогтолцооны гажуудал үүнээс үүсэж байна. Тиймээс эхлээд хөтөлбөр, багшийн цалин мөнгөний асуудалд орохоос өмнө хамгийн чухал зүйл дээрээ зөвшилцчихөөд дараагийн алхам руу ормоор байна.

Н.Учрал: Боловсролын салбарт залуучуудад тэгш боломж олдох ёстой гэж боддог. Тэгш боломж байхгүйгээс өрсөлдөх боломж олдохгүй байна. Жишээ нь, Сонгинохайрхан дүүрэгт гэхэд цахимд суурилсан онлайн сургалтыг одоо л эхлүүлэх гээд явж байна. Миний гол яриад байгаа зүйл нь залуучуудын өрсөлдөх боломжийг сайжруулъя гэж байгаа юм. Эцэг эхчүүдийн зүгээс миний хүүхдүүдэд тэгш боломж олгож өгөөч гэсэн хүсэлт удаа дараа тавьсаар байна. Үүнийг эцэг эхчүүд өөрсдөө хүсэж байна. Гол нь хэлбэрээ зөв тавиарай гэж хэлж байгаа юм. Үндэсний аюулгүй байдалд сөргөөр нөлөөлөөд байх зүйл ч байхгүй. Кембрижийн хөтөлбөртэй гурван сургуульд ахлах ангийн сурагчид дөрвөн хичээлийг англи хэлээр гүнзгийрүүлж үздэг. Бусад хичээл нь эх хэл дээрээ ордог. Түүнээс биш бага, дунд ангиудад гадаад хэлээр хичээл орж болохгүй гэдэгтэй санал нэг байна. Гол нь тэгш боломж л хүүхдүүдэд өгмөөр байна.

А.Сүх