Агаарын бохирдлыг бууруулах дэд хорооноос "Агаарын бохирдлын эх үүсвэр, түүнийг хэрхэн бууруулах талаар авч хэрэгжүүлж буй арга хэмжээ"-ний талаар холбогдох байгууллагуудын мэдээллийг сонсож байна.

Энэ үеэр Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргал “Агаар, орчны бохирдлыг бууруулах үндэсний хөтөлбөрийн хүрээнд 2025 он хүртэл нийслэлийн агаарын бохирдлыг 80 орчим хувиар бууруулна гэж заасан. Өнгөрсөн жил сайжруулсан түлш нэвтрүүлж, галлагааны горимд өөрчлөлт оруулсан нь тодорхой үр дүнгээ өгсөн.

Улмаар маш олон зуухыг байгальд ээлтэй хийн халаагуурт холбосон. Нийслэлийн түвшинд 700 гаруй халаалтын зуухыг утаа шүүгч суурилуулах, төвлөрсөн дулаан хангамжмд холбож, 78 гаруй тонн түүхий нүүрсний хэрэглээг бууруулж чадсан. Нөгөөтээгүүр, 35 гаруй мянган айл өрх яндангаа буулгаж, халаалтаа цахилгаан халаагуураар шийддэг болсон. Эдгээр нь агаарын бохирдлыг 50 орчим хувиар бууруулах боломжийг бий болгосон.

Сайжруулсан түлшний орц найрлагад гадна болон дотнын 30 гаруй байгууллага дүгнэлт хийсэн. Мөн энэ онд Засгийн газрын хуралдаанаар зүүн бүсийн үйлдвэр байгуулах шийдвэр гарсан. Технологи нь илүү сайжирч байна.

Өчигдөр найман өрхийн 25 иргэн угаарын хийнд хордсон дуудлага 103 дугаарт ирүүлсэн байна. Үүнээс ес нь хүүхэд. Хүнд ноцтой хордсон зүйл байхгүй. Иргэддээ анхааруулж хэлэхэд хавар, намрын улиралд дотоод болон гадаад агаарын температур өөрчлөгдөх үед, зунжин бороо усанд норсон зууханд эхлээд мод юм уу өөр зүйлийг түлж хатаах хэрэгтэй байдаг.

Өчигдрийн хувьд зарим угаартсан айл яндангаа буулгаад өрхөө бүтээсэн байсан” гэлээ.

Х.Оюу