Төрийн ордонд сүүлийн үед хоёр гишүүн тус тусын сэдвээр их ярих болов. Тэдний нэг нь “Босоо” хэмээн алдаршсан С.Ганбаатар, нөгөөх нь Дарханы гэх тодотголтой Г.Дамдинням.

УИХ-ын гишүүн “Босоо” С.Ганбаатарын хувьд 2012 онд гишүүн болсноосоо хойш нэг зүйлийг онцгойлон ярих болсон нь Оюутолгой. Энэ асуудлаасаа болж тэрбээр Сангийн сайд асан С.Баярцогтоос номын дуу сонсох дээрээ тулж байсан удаатай. УИХ-ын танхимд үг хэлэхдээ босч зогсдог байдлаар нь бид илүү мэдэхээс Оюутолгойн асуудал дээр яг үнэндээ юу хийсэн зүйл үгүй. Дарханаас нэр дэвшээд унасан дөрвөн жилдээ ч ямар нэгэн тэмцэл өрнүүлээгүй нь үнэнд гүйцэгдсэнтэй холбон тайлбарлаж болно. Ээлжит сонгуулиар Орхон аймгаас сонгогдон гарсан түүний ярих шинэ сэдэв нь Үндсэн хуулийн 6.2 гэдэг заалт. 

Дараагийн гишүүн нь Г.Дамдинням. Нийт Дарханчуудын хөндүүр сэдэв болоод буй замын ажлыг хурдасгана хэмээн сүртэй амлан өндөр сэнтийд гарсан.

Нутгийн иргэд түүнийг гишүүн болонгуут зам нь түргэн баригдаж, толь шиг замаар хурдлан давхина хэмээн төсөөлсөн биз. Зуны сар зургаа биш. Өвөл хэзээ мөдгүй болох гэж байна. Замын ажил цаг нартай уралдаж хийгддэг ажил болохоор энэ жилдээ дуусахгүй нь тодорхой болж байх шиг байна. Эрхэм гишүүн хэлсэн амандаа хүрч чадаагүй болохоор замын ажлыг удаашруулсан албан тушаалтнуудад хариуцлага тооцуулна хэмээн нарийн арга сүвэгчилжээ. Ямартай ч замаа мартчихаагүй нь сайшаалтай.

Тэрбээр энэ тухай “Энэ зам дээр алдаа гаргаж, завхрал үүсгэсэн хүмүүс хариуцлага хүлээх ёстой. Тиймээс тус тойргоос сонгогдсон гишүүний хувиар Санхүүгийн зохицуулах хороо, Даатгалын холбоо, Монголын мэргэшсэн үнэлгээчдийн холбоо, Монголын хөрөнгө, хохирол үнэлэгчдийн холбоо болон бүх даатгалын компаниуд руу уг зам дээр хохирсон хохирлоо даатгалаас төлүүлж авсан иргэдийн мэдээллийг авахаар албан хүсэлт явуулснаас одоогоор Монголын хөрөнгө, хохирол үнэлэгчдийн холбооноос л хариу ирээд байна.

Дээрх байгууллагуудаас тодорхой хэмжээнд хохирлын дүн, статистик гарч ирнэ гэж найдаж байгаа.

Мөн Тээврийн Цагдаагийн албанаас Дарханы зам дээр эвдрэл, засвартай хугацаанд гарсан зам тээврийн осол, хохирлын бодит тоон мэдээлэл авахаар хүсэлт явуулсан. Энэ бүхний дараа хэн хариуцлага хүлээх ёстойг тогтоолгох ажилд орно. Маш олон иргэд эд хөрөнгө, эрүүл мэнд, амь насаараа хохирсон, хохирсоор байна. Энэ сэдвийг орхиж болохгүй” гэжээ.

Ирэх жилийн Ерөнхийлөгчийн сонгуулиас өмнө ядаж замаа дуусгавал яамай л болж.  Хэлэх амархан хийх хэцүү шүү, гишүүд минь.

Б.Лхам