Засгийн газар өнгөрсөн баасан гарагийн чуулганы нэгдсэн хуралдааны үеэр ирэх оны төсвийн төслийг өргөн барьсан.

Уг төсөлд төсвийн алдагдлыг дахин 2 их наяд төгрөг байхаар оруулж ирсэн нь ихээхэн шүүмжлэл дагуулаад байна.

Дэлхий нийтэд цар тахал дэгдсэн, эдийн засаг агшиж байгаа энэ үед мэргэжилтнүүдийн зүгээс төсвийн сахилга баттай байхыг анхааруулсаар буй. Сар гаруй хугацааны өмнө 2020 оны төсвийн тодотгол хийж 4.8 их наядын алдагдалтай баталсан.

Ирэх оны төсвийн талаар УИХ-ын гишүүн Ж.Бат-Эрдэнэ “Өнөөгийн нөхцөл байдалд эдийн засгийг шоо шиг төлөвлөх боломжгүй. Зарчмын хувьд төсвийг алдагдалгүй батлах ёстой ч эдийн засаг өөрөө хөдөлгөөнтэй байдаг учраас алдагдлыг нөхөх зорилт гаргаад явах нь зөв” гэсэн юм.

Тэрбээр ирэх оны төсөв 1 их наяд гаруй төгрөгийн алдагдалтай батлагдах байх хэмээн таамаглаж буйгаа ч онцолсон. Юутай ч гэсэн ирэх оны төсвийг тодорхой хэмжээний алдагдалтай батлах нь гарцаагүй болж байх шиг.

Өнгөрөгч долоо хоногийн чулганы нэгдсэн хуралдаанаар төсөвт хамгийн их ачаалал бий болгож байгаа нь хүүхдийн мөнгө болж байгаа талаар УИХ-ын гишүүн Ц.Даваасүрэн онцолж байсан. Хүүхдийн мөнгөнд нийт 1.9 их наяд төгрөг зарцуулж буй бөгөөд энэ нь нэг суманд таван үйлдвэр барих мөнгө гэдгийг мөн тодотгосон юм.

Тэгвэл Засгийн газраас ирэх оны төсөвт хүүхдийн мөнгийг ирэх оны зургадугаар сар хүртэл олгох талаар тусгажээ.

Цар тахалтай холбогдуулан халамжийн мөнгийг тодорхой хэмжээгээр нэмэгдүүлсэнд хүүхдийн мөнгө багтаж буй. Тодруулбал, хүүхдийн 100 мянган төгрөгийг 1.2 сая хүүхэд авч байна.

Энд яригдаж байгаа гол асуудал нь хүүхдийн мөнгөөр амьжиргаагаа залгуулдаг олон өрх байдаг учраас олгодог байх нь зөв. Гэхдээ тодорхой хэмжээ заагтай олгодог байвал яасан юм.

Ингээд ярихаар төр хүүхдүүдээ ялгаварлаж байна гэх зэргээр олон асуудал хөндөх байх. Цар тахлын нөхцөл байдалтай уялдуулан хүүхдийн мөнгийг 100 мянган төгрөг болгосон. Хүүхдүүд минь битгий өвдөөсэй, өлсөөсэй, ядраасай гэсэндээ тэр шүү дээ.

Гэхдээ төсвийн алдагдал ихтэй цаашид ч нэмэгдэх хандлагатай байгаа энэ үед төсвийн үр ашигтай зарцуулалт чухал. Гэтэл халамжийн бодлого төсвийг тэлсээр байна. Тиймээс улс эх орныхоо хүндхэн байгаа эдийн засгийг бодолцоод амьжиргааны түвшнээс дээгүүр орлоготой иргэд хүүхдийн мөнгөнөөс татгалздаг болвол "далайд дусал нэмэр" гэдэг шиг улсын төсөвт ч багагүй хувь нэмэр болох нь гарцаагүй. Хэдийгээр хүүхэд багачуудаа ялгаварлаж байгаа мэт сонсогдож байгаа ч зөвхөн сайн дурын үндсэн дээр эх орноо гэсэн сэтгэлээр хандаж, хүүхдийн мөнгөнөөсөө татгалзахыг эрх баригчид уриалж, шийдвэр гаргах нь зүйтэй хэмээн зарим иргэдийн зүгээс санал гаргаад байна. Харин иргэдийн гаргасан санаачилгыг эрх баригчдаас эхлүүлмээр байна. 

Б.Лхам