УИХ-ын гишүүн Ж.Сүхбаатараас зарим зүйлийг тодрууллаа.

-Засгийн газрын ээлжит хуралдаанаар Оюутолгойн ТУЗ-ийн гишүүдийг томилсон. ТУЗ-ийн гишүүн, Ерөнхийлөгч асан Н.Багабандийг дахин томилсон нь шүүмжлэл дагуулаад байна л даа. Сольж болдоггүй томилгоо юм уу. Та юу гэж харж байна вэ?

-Оюутолгойн асуудал дээр зөв эсвэл буруу гэхгүй. Засгийн газар Оюутолготой хэлэлцээрт орж байгаа. Хэлэлцээрийн үеийн алхам, тактик гэж бий. Цаад удирдамж нь ямар гарч байгааг мэдэхгүй. Өмнө нь Засгийн газрын Хэрэг эрхлэх газарт ажиллаж байсан хүний хувьд зарим удирдамж, үйл ажилллагааг ил ярьдаггүй. Н.Багабандийн хувьд Оюутолгой дээр олон жил ажилласан учраас давуу тал байж болно. Бид хууль тогтоогч нар учраас шүүмжлэл чухал биш. Гол нь хэлэлцээ амжилттай болох ёстой. Оюутолгойн асуудал бол нэг талдаа үндэстэн дамнасан том корпорацитай хэлэлцээ хийж байгаатай ялгаагүй. Тиймээс дан ганц эдийн засаг биш геополитикийн асуудал яригдаж байгаа юм.

Тухайн үед Засгийн газрын хийж байсан хэлэлцээрт алдаа гарч байсан шүү дээ. Жишээлбэл, 34 хувийг иргэд буруу гээд байна. Гэтэл тэр үед анхны хөрөнгө оруулалтаар тооцож байсан юм. 4.5 тэрбумын хөрөнгө оруулалт гэж тооцоод түүнийх нь 34 хувийг Монголын төр хариуцах. Цаашлаад хөрөнгө оруулалт нь дуусангуут 50 хувь болно гэж тооцож байсан. Түүнээс биш ойлгоогүй гэрээлсэн зүйл биш. Их хурлын шийдвэр ингэж гараагүй. Одоо Засгийн газрын хэлэлцээ хийх нөхдүүд өмнөх Засгийн газрын хэлэлцээ хийсэн үеийн сул байдлыг гаргахгүй байх ёстой. Манай талын байр суурь хүчтэй байх ёстой.

-Ерөнхийлөгч асан Н.Багабанди олон жил ТУЗ-ийн гишүүн хийсэн учраас Рио-Тинто компанитай сайн ойлголцдог болсон гэж харж байна уу?

-Үүнийг хэлж мэдэхгүй. Дотод уур амьсгал, мэдээллийн нарийн нөхцөл байдлыг ТУЗ-д сууж байгаа хүн мэдэж байгаа. 10 жилийн өмнө ч хэлж байсан. Хэлэлцээ хийхдээ Засгийн газар сул байр суурьтай оролцож болохгүй. Нөхцөл байдал бидний гарт байна гэж хэлж байсан. Өмнөх Их Хурлын гаргасан дүгнэлтийн хүрээнд энэ Засгийн газар байж болох бүх хүрээнд арга хэмжээ авч алдаа дутагдлыг засах ёстой. Энэ удаагийн хэлэлцээрт орох хүмүүс байр сууриа чангаруулсан байдлаар оролцох байх гэж бодож байна. Хэлэлцээ камерын өмнө явагдахгүй шүү дээ. Маргана, мэтгэнэ. Ямар боломж байгаа талаар шийдэл гаргана. Тиймээс тэр хүн байх, байхгүй нь чухал биш.

-Их хурлын гишүүд цалингаасаа хэт давсан мөнгийг захиран зарцуулах эрхтэй байна. Энэ зөв үү?

-Энэ чинь өөрөө бодит зардал л даа. Тойрогтоо цалингаараа ажиллах боломжгүй. Миний хувьд Чинэглтэй дүүргийн 160 мянган хүнийг төлөөлж сонгогдсон. Ийм хэмжээний хүнтэй харилцана гэсэн үг. Бусад аймгийн төлөөлөгчид ч гэсэн ялгаагүй олон арван мянган хүнтэй ажиллаж байгаа хүн. Цалин, мөнгөтэй холбоотой асуудалд би өөрөө их тооцоотой хүн. Ний нуугүй хэлэхэд сая ахмадын баяр боллоо. Зарим сонгогчид бэлэг бий юу гэдэг хүлээлттэй байсан. Миний хувьд уучларай, төсөв мөнгө хүрэхгүй байна гэсэн. Ичиж нуулгүй хэлсэн. Дээр нь биднийг тодорхой хязгаарлалтад оруулчихсан. Мөнгө босгоё гэхээр элдэв асуудалд холбогдчих гээд байдаг. Бүх зүйл чангарчихаад байна. Илүү дутуу зүйлд холбогдох дургүй учраас ахмадын баяр дээр гэхэд иргэдээсээ хүлцэл өчсөн.

Б.Лхам