2021 оны Ерөнхийлөгчийн сонгуулийн гол өрсөлдөөн Х.Баттулга, У.Хүрэлсүх нарын дунд явагдана гэдгийг ч улстөр судлаачид хэлж, дүгнэж байна. Харин тэдний одоогийн хийж хэрэгжүүлж байгаа ажил, гаргаж буй шийдвэрүүд нь үүнийг нотлож байх шиг.

Тодотговол Монгол Улсын Ерөнхийлөгч Х.Баттулга цар тахлын үед иргэн, өрх, аж ахуйн нэгжийг эрсдэлээс хамгаалах асуудлаар Ерөнхий сайдад албан бичиг хүргүүлсэн. Ингэхдээ “Айл өрх бүрийг тухайлан дэмжсэн, бодит дэмжлэг, туслалцаа болох тусгай бодлогыг гаргаж хэрэгжүүлэх шаардлагатай бөгөөд үүний хүрээнд, 

Төрөөс өрх бүрд нэг сая төгрөгийн дэмжлэг үзүүлэх хөтөлбөрийг боловсруулж, 2020 оны арванхоёрдугаар сарын 01-ний өдрөөс 2021 оны нэгдүгээр сарын 01-ний өдрийн дотор хэрэгжүүлэх, ингэхдээ 200 мянган төгрөгийг бэлнээр олгож, үлдсэн 800 мянган төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах эрх бүхий ваучераар (эрхийн бичиг) олгох хэрэгтэй.

Энэ бодлого, хөтөлбөр нь нийт өрхийн амьжиргааг дэмжихээс гадна айл өрхөөрөө дамжуулан нийт 900 орчим тэрбум төгрөгийн санхүүжилтийг үндэсний үйлдвэрлэгч, аж ахуйн нэгжүүддээ өгч буй бодитой, үр дүнтэй, чиглэсэн дэмжлэг болж чадна гэж Монгол Улсын Ерөнхийлөгч үзэж байна” хэмээгээд иргэддээ дэмжлэг үзүүлэхийг хүссэн.

Ерөнхийлөгчийн сонгуульд “оноо” нэмэх Х.Баттулгын энэхүү саналыг У.Хүрэлсүх хүлээж авахгүй гэдэг нь тодорхой гэдгийг тухайн үед хэлэх хүн олон байсан юм. Энэ л ёсоор өрх бүрт нэг сая төгрөг олгох Ерөнхийлөгчийн санаачлагыг У.Хүрэлсүхийн Засгийн газар дэмжээгүй.

Тэрбээр энэ талаар байр сууриа илэрхийлээгүй байв. Тэгвэл өчигдөр Засгийн газрын хуралдааны шийдвэрийг танилцуулах үеэр Монгол Улсын Ерөнхий сайд У.Хүрэлсүх Ерөнхийлөгч Х.Баттулгад хариуг нь “барив”. Тэрбээр "Мөнгө төгрөг байдаг бол ард иргэддээ харамлах зүйл алга. Хэдэн саяыг өг гэж байгаа ч Засгийн газарт тийм их мөнгө байхгүй.

Ард түмнээ хуурч, цаасан мөнгө хэвлэх юм уу. 2012-2016 онд найман их наяд төгрөгийн цаасан мөнгө хэвлэж, зах зээлд гаргасан. Үүнээс нь болж өргөн хэрэглээний бараа, бүтээгдэхүүний үнэ нэмэгдсэн. Цаасан мөнгө хэвлэж, гүйлгээнд гаргаж болохгүй. Энэ нь эргээд талх, мах, цахилгаан дулааны үнэ өсөх гол шалтгаан болно. Энэ бол хамгаалалт биш. Ард түмнээ хорлох үйлдэл.

Улсын эдийн засгаа хорлож байгаа хэрэг. Тиймээс бид сайжруулсан түлшний үнийг бууруулж байгаа юм" хэмээсэн юм.

Харин Ерөнхийлөгч Х.Баттулга санаачлагыг нь хүлээж аваагүйн хариуг мөн л бариад амжсан. Тодруулбал тэрбээр 2021 оны төсвийн тухай хууль болон түүний дагалдах хуулиудад бүхэлд нь хориг тавьж, санаачлагыг нь дэмжихгүй бол зүгээр суухгүй гэдгээ илэрхийлэх шиг болсон.

Энэ мэтээр ирэх оны Ерөнхийлөгчийн сонгуулийн өрсөлдөөн тэдний дунд ширүүхэн өрнөж байх шиг.

Б.Бат