Засгийн газрын тэргүүн цар тахлын энэ үед айл өрх, албан байгууллагуудыг дэмжсэн шийдвэр гаргаж, цахилгааны үнийг тодорхой хугацаанд тэглэсэн ч эхний өдрөөс л доголдол үүсч, нийслэлээрээ харанхуй болох эрдсэл үүссэн билээ.

Монгол Улсын Засгийн газар 1991 онд “Эгийн голын усан цахилгаан станц”-ыг барих тухай шийдвэр гаргаж, анхны ТЭЗҮ-г Азийн хөгжлийн банкны санхүүжилтээр боловсруулж байв. Харамсалтай нь, улстөрчид Эгийн голын төслийг царцааж, 30 жил улстөржлөө.   

Үе үеийн Засгийн газар Эгийн голын усан цахилгаан станцыг  тэнд, энд барина хэмээн байршлаа булаацалдаж, нэгнийхээ хийснийг үгүйсгэдэг. Ийм байдалтай явж иржээ. МАН нэг ТЭЗҮ хийлгэдэг, АН засаг барихаар бас өөр ТЭЗҮ гаргачихдаг. Хамгийн сүүлд Ч.Сайханбилэгийн Засгийн газар эл асуудалд онцгой анхаарч, Эгийн голын төслийг дэмжиж, Монгол Улсад албаны айлчлал хийж байсан ОХУ-ын Гадаад хэргийн сайд С.Лавровтай Эгийн голын усан цахилгаан станцыг барих талаар тусгайлан ярилцаж, шийдэл, гарц хайж байсан юм.  

Үе үеийн улстөрчид  өнгөрсөн 30 жилийн хугацаанд  улстөржилгүйгээр Эгийн голын усан цахилгааны станцыг барьчихсан байсан бол өнөөдөр 315 мвт-ын хүчин чадал бүхий эрчим хүч үйлдвэрлэн, хэрэгцээгээ хангачих байв.

Газрын маргаанаас гадна ТЭЗҮ, хөрөнгө оруулагчдын элдэв маргаан зэрэг олон асуудлаас болж бүрмөсөн зогссон  Эгийн голын усан цахилгаан станцыг Монгол Улс өнөө биш юм гэхэд маргааш заавал барьж, таарна. Зөвхөн эрчим хүч бус давхар цэвэр усны нөөцийн асуудал хөндөгдөх учраас тэр юм. Удах тусам эдийн засгийн ихээхэн алдагдал хүлээх учраас Эгийн голын төслийг урагшуулах шаардлагатай болно. Харин төслийг зоригтойгоор хөдөлгөж, бодит үр дүнд хүргэж чадсан Засгийн газар Монгол Улсын түүхэнд тодоор бичигдэх нь лавтай.

У.Тэргэл