“Салхитын мөнгөний орд”-ын гэх авлига, албан тушаалын дуулиант хэргийн гол оролцогч, Улсын Дээд шүүхийн Иргэний хэргийн танхимын шүүгч Ц.Амарсайхан 2019 оны есдүгээр сард эмчлүүлэх нэрийдлээр БНСУ-ыг зорьсноос хойш сураггүй байсан юм. Харин тэрбээр нэг жил хагасын дараа буюу 2021 оны нэгдүгээр сарын 15-ны өдрийн Сөүл-Улаанбаатар чиглэлийн ОМ7302 тусгай үүргийн нислэгээр нөхрийн хамт Монгол Улсад хөл тавьж, эх орондоо ирсэн билээ.

Ц.Амарсайхан шүүгчийг гадаад улс руу эмчлүүлэх нэрийдлээр зугтлаа, орголоо гэсэн хардлага тухайн үед ихээр явсан.

Энэ талаар албаныхан “Ц.Амарсайхан шүүгч эрүүл мэндийн шалтгаанаар БНСУ-д эмчилгээ хийлгэхээр хүсэлт гаргасны дагуу Чингэлтэй дүүргийн Эрүүгийн хэргийн анхан шатны шүүхийн шүүгч хүсэлтийг хангаж, шийдвэрлэсэн. Прокурорын зөвшөөрөлтэйгөөр хил давсан. Хэдийгээр хэргийн холбогдогч боловч хувь хүний эрүүл мэндийн байдал чухал. Эмчилгээ хийлгэж буй өвчний тухайд хувь хүний нууцад хамааралтай учир шалтгааныг хэлэх боломжгүй” гэсэн хариу өгч байв.

Ц.Амарсайхан шүүгчид анх 13, дараа нь 150 саяыг хахуульд өгсөн гэдэг

 “Салхитын мөнгөний орд”-ын гэх хэргийг шүүх анхан шатны хуралдаан 2020 оны гуравдугаар сард болж, энэ үеэр  яллагдагчид зургаан шүүгчид 10-160 сая төгрөгийн хахууль өгснөө, тэдний нэг болох шүүгч Ц.Амарсайханд хахуульд анх 13 сая, дараа нь 150 сая төгрөгийг өмгөөлөгч Б.Пүрэвнямаар дамжуулан өгсөн хэмээн мэдүүлсэн байдаг.

 Тиймдээ ч Ц.Амарсайхан шүүгчийг авлига, албан тушаалын хэрэгт АТГ-аас холбогдуулан шалгаж, энэ хооронд тэрбээр эмчлүүлэхээр гадаад руу явсан учраас хэргийг тусгаарлан шалгахаар болсон юм.

Монгол Улсын Ерөнхийлөгч Х.Баттулга 2019 оны зургаадугаар сарын 26-ны өдөр зарлиг гаргаж, 17 шүүгчийн бүрэн эрхийг түдгэлзүүлэхэд тэдний дунд Ц.Амарсайхан шүүгчийн нэр багтсан билээ.  Харин одоо тэрбээр эх нутагтаа эрүүл болоод ирсэн юм, түүнд холбогдох хэргийг шалган эцэслэж, шүүхээр гэм буруутай эсэхийг дэнслэх биз ээ.

“Шударга ёсны элч” Цэндийн Амарсайхан гэж хэн бэ?

Тэрбээр шүүхийн байгууллагад 32 жил ажилласны 31 жилд нь шүүгч хийжээ. Үүний 19 жилд нь Улсын Дээд шүүхийн шүүгчээр ажилласан байна. Шударга шүүгчдийн нэг гэгддэг байсан түүнийг авлига, албан тушаалын хэрэгт холбогдсонд мэргэжил нэгт нөхөд нь харуусч, мөн итгэж чадахгүй суусан гэдэг. Ингэтлээ шүүх байгууллага ялзарсан байсныг “Салхитын мөнгөний орд”-ын гэх хэрэг илчилсэн.

Хамгийн гол нь, 2018 оны зургаадугаар сард Ц.Амарсайхан шүүгч маань Шүүхийн ерөнхий зөвлөлийн 25 жилийн ойгоор “Шударга ёсны элч”-ээр тодорч байжээ. Нэг зоосны хоёр тал гэгч энэ буюу. Наанаа шударга ёс ярьж, цаанаа ханцуйн дотроо авлига авч, өгөлцөхөөр наймаалцаж байсан байх нь.

У.Тэргэл