Манай улс коронавирусний халдвартай нүүр тулаад даруй долоон сарын нүүр үзэж байна. Энэ хугацаанд 80 мянган хүн эл халдвараар өвчилж, 400 орчим хүн хорвоогийн мөнх бусыг үзүүлэв. Үнэхээр харамсалтай, халаглам тоо баримт. Манай улс өдрөөс өдөрт нэмэгдэх халдвар, нас баралтаараа дэлхийд тэргүүлж байгаа талаарх сэтгэл эмзэглэм тоо баримт ил болсон.

Коронавирусний цар тахалтай тэмцэж, хүн амаа халдвараас сэргийлэхийн тулд төр, засаг хэдэнтээ хөл хорио тогтоож, дархлаажуулалтыг эрчимтэй хийж байгаа ч үр дүн нь өнөөдрийг хүртэл мэдэгдсэнгүй. Үүний шалтгаан мэдээж олон. Үр дүнгүй хязгаарлалт, вакцинжуулалтад идэвхгүй хамрагдаж буй хүмүүс, халдвар хамгааллыг дэглэм баримтлаагүй олон олон үйл явдал, арга хэмжээ.

Цаашид ямар арга хэмжээ авах вэ, энэхүү цар тахлыг хэрхэн хохирол багатай, эдийн засаг, эрүүл мэнд хоёроо “шороотой хутгах”-гүйгээр авч үлдэх вэ гээд олон асуулт өнөөдөр хариулт нэхэж байна. Улсын онцгой комиссоос хөл хорио тогтоохгүй, харин хатуу хязгаарлалт тогтоохоор болсноо зарласан. Харин энэ нь үр дүнтэй байх эсэх нь мөн л эргэлзээтэй.

Тэгвэл Япон улс халдварын голомт болсон мужууддаа Онц байдал зарлаж, эл цар тахлыг “дарж” авсан туршлага байна.

Япон улсын Засгийн газар Токио, Осака, Киото Хиого гэсэн дөрвөн мужид коронавирусний халдварын тархалтын эсрэг авах арга хэмжээний хүрээнд дөрөвдүгээр сарын 25-наас тавдугаар сарын 11-ний өдөр хүртэл 17 хоногийн хугацаанд онц байдал зарлажээ.

Энэ хугацаандаа хүмүүсийн хөдөлгөөний урсгалыг зогсоох зорилгоор согтууруулах ундаагаар үйлчилдэг ресторанууд болон өдөр тутмын хэрэглээний дэлгүүрүүдээс бусад томоохон худалдааны төв, их дэлгүүр, бөөний төв, кино театр зэрэг 1000 метр квадрат талбайгаас том үйлчилгээний газруудын үйл ажиллагааг зогсоожээ.

Мөн хүмүүсийг өдөртөө шаардлагагүй бол гадагш гарахаас татгалзаж, алсаас ажлаа хийх замаар ажилчдынхаа тоог 70  хувь хүртэл бууруулж, муж хооронд явах хөдөлгөөнийг хязгаарласан байна. Түүнчлэн төмөр зам, автобусны явах цагийн хуваарийг ажлын өдрүүдэд богиносгож, амралтын болон баярын өдрүүдэд бууруулжээ. Харин үйл ажиллагаагаа зогсоосон бизнес эрхлэгчдэд хамтран ажилласны мөнгийг төлсөн байна. Онц байдал зарлаж, авч хэрэгжүүлсэн арга хэмжээ нь үр дүнгээ өгч, тэд халдварын “ард” гарчээ.

Япон улсын эдийн засгийн сэргээн босголтын сайд Я.Нишимура Онц байдал зарлах үед “Бид урьд урьдынхаасаа илүү хүчтэй арга хэмжээ авахгүй бол маш халдвартай мутант вирусийг хянах боломжгүй болно” хэмээгээд хүн бүрийг хичээхийг уриалж байсан байна. Мөн дээрх авч хэрэгжүүлж байгаа арга хэмжээг Ерөнхий сайдаасаа эхлээд хотуудын Засаг дарга гээд бүхий л шатны албан тушаалтнууд нь маш сайн уриалж, тайлбарлаж, ард иргэдээсээ гуйж, шаардаж байжээ. Үүнийг нь ч ард иргэд, аж ахуй нэгж байгууллагууд нь ягштал даган мөрдөж, хамтын хүчээр халдварын ард гарч чадсан байна.

Харин манай улс энэ цар тахлын ард хэрхэн гарах бол...

Б.Баатар