Монгол Улс төдийгүй дэлхий нийт коронавирусний цар тахалтай нүүр тулаад хоёр жил орчмын нүүр үзлээ. Олон мянган хүн эл өвчнөөр өвчилж, хэдэн зуун хүн амь насаа алдав. Өдгөө ч олон хүн үхэл, амьдралтай тэмцэж байна.

Манай улс коронавирусний халдварыг дотооддоо алдаагүй байхад буюу өнгөрсөн жил халдварын эрсдлээс сэргийлж, Цагаан сар, Улсын баяр наадам гээд үндэсний тэмдэглэлт өдрүүдээ нийтийг хамарч, тэмдэглээгүй өнжсөн. Энэ нь ч зөв шийдвэр байсан гэдэгтэй санал нийлэх хүн олон. 

Өдгөө коронавирусний халдвар цар тахал болж, 100 мянга орчим хүн эл өвчнөөр өвчилж, 500 орчим хүн хорвоогийн мөнх бусыг үзүүлэв.

Энх цагт энэ мэтээр олон зуун хүн амь насаа алдаж, халдвар өдөр ирэх тусам нэмэгдэж байгаа учраас аймаг, сумдын баяр наадмыг тэмдэглэхийг хориглох шийдвэрийг Засгийн газраас гаргасан.

Гэтэл монголчуудын хамгийн ихээр дээдэлж, хүндэлдэг уяачид хийгээд бөхчүүд нь баяр наадам тэмдэглэх нь зүйтэй хэмээн ээлж дараалан мэдээлэл хийж, улайран зүтгэх болов. 

Тодотговол, Монголын үндэсний морин уралдаан уяачдын холбооноос аймаг, сумдын наадмыг хийхгүй байх Засгийн газар, Улсын онцгой комиссын шийдвэрийг эсэргүүцэж мэдээлэл хийсэн. Тус холбооны дэд тэргүүн Монгол Улсын Тод танлай уяач Ц.Дуламсүрэн "Ардын хувьсгалын 100 жилийн ойгоор аймаг, сумдын уяачид маань морио уралдуулахгүй, бөхчүүд нь барилдахгүй, харваачид нь сум тавихгүй гэдэг бол Үндсэн хууль зөрчиж, ялгаварлан гадуурхсан үйлдэл. Үндсэн хуульд хүн бүр тэгш эрхтэй байх тухай заалт бий. Тиймээс хот тойрсон эрлийз морьтой уяачид, допингтой бөхчүүдэд зориулсан наадам хийж болохгүй. Наадна гэдэг чинь ард түмэн баясахыг хэлдэг юм. Наадам хойшлуулах тухай бас ярьж байгаа. Хэрэв ингэвэл хуульдаа өөрчлөлт оруулах шаардлагатай болно. Мөн наймдугаар сар гэдэг морь уралдуулах цаг биш. Малчид маань намар, өвлийн бэлтгэлээ хангаад хадлан тэжээлээ базааж байх хугацаа" хэмээсэн.  

Мөн Монголын үндэсний бөхийн холбооноос "Бүх цэргийн наадам"-ыг зохион байгуулах тухай хүсэлтийг Нийслэлийн онцгой комисст дахин гаргана гэдгээ мэдэгдсэн.

Энэ талаарх МҮБХ-ний мэдэгдэлд "УОК 2021 оны зургаадугаар сарын 16-ны өдөр гаргасан шийдвэртээ “…Хорио цээрийн дэглэмийг улбар шар түвшингийн зэрэглэлд шилжүүлсэн тул нийтийг хамарсан уралдаан тэмцээнийг 2021 оны зургаадугаар сарын 30-ны өдөр хүртэл хугацаанд зохион байгуулахгүй…” гэж заасан байна. Иймд МҮБХ хорио цээрийн дэглэм нэг шатаар буурах үед буюу 2021 оны зургаадугаар сарын 30-ны өдрөөс долоодугаар сарын 4-ний өдрүүдэд “Бүх цэргийн наадам”-ыг зохион байгуулах хүсэлтээ НОК-т дахин гаргах болно" гэжээ. 

Угтаа тэд хайр хүндэтгэлийг нь харамгүй хүртдэг ард түмнийхээ төлөө "Бид төр, засгийнхаа шийдвэрийг хүндэтгэж байна. Эрдэнэт хүний алтан аминаас үнэтэй эрхэм зүйл үгүй" гээд монгол жудаг гаргасан бол сайхан харагдах байлаа. Гэтэл тэд тэгсэнгүй. Харамсалтай нь. 

Эцэст нь, эрх баригчид хэсэг бүлэг хүний эрх ашиг, хүсэл сонирхол чухал уу, ард түмний эрүүл мэнд, амь насыг авран хамгаалах нь чухал уу гэдэг сонголтын өмнө  зогсож байх шиг. Ямартай ч, нэгний бус нийтийн эрх ашиг, эрүүл аюулгүй орчинд амьдрах үндсэн эрх бий гэдгийг эрх биш анхаарна биз ээ. 

Б.Баатар