Улсын онцгой комиссоос коронавирусний халдварын нөхцөл байдлыг үнэлж, зарим ААН-ийн үйл ажиллагааг хязгаарлахаар болсон. Тодотговол, хоолны газруудын үйл ажиллагааг танхимаар бус хүрггэлтээр үйлчлэх, амралт, зугаалгын газар, фитнесс төвүүд, усан бассейн, сауны  үйл ажиллагааг 10 хоног хязгаарлах шийдвэр гаргасан билээ. Тэгвэл УОК-ын дээрх шийдвэрийг хоолны газрууд эсэргүүцэж, эхнээсээ мэдэгдэл гаргаж, "Тэвчээр тасарлаа" хөдөлгөөн өрнүүлж эхлэв. Тодруулбал, "Мисо Рамен" ресторан, "Asian", "Unico", "The coffee house mongolia" зэрэг  байгууллагууд "Үйл ажиллагаагаа хязгаарлахгүй, хэвийн үргэлжлүүлнэ" хэмээн мэдэгдээд байна. 

Тухайлбал, "Мисо Рамен" ресторанаас гаргасан мэдэгдэлд “Төр, засгийнхаа ковидтой тэмцэх бодлогыг хүндэтгэн өнөөдрийг хүртэл хорио цээр, эрүүл ахуй халдвар хамгааллын дэглэмийг чандлан баримталлаа.

Заалны үйлчилгээ явуулахгүй бол манайх орлогогүйтэй адил байдаг. Тиймээс заалаар үйлчлэхгүй гэсэн хязгаарлалтын үед үйл ажиллагаагаа зогсоож, нэлээд олон сар ажилласангүй. Ажилчид маань ардаа амьдралтай, үр хүүхэдтэй Монгол Улсын иргэд. Тодорхой үр дүнгүй удаан хугацааны хорионы улмаас тэд маань амьдралаа авч явахад улам хэцүү болж байна.

Сүүлийн үед халдварын тоо ихэссэн нь хоолны газраас боллоо гэж үзэн хязгаарлалт тогтоож байгаа нь оновчгүй байна. Сонгууль хийн, одон гардуулж, найр наадам хийлгэн олон хүний бөөгнөрөл үүсгэн халдвар ихэсгэсэн нь төр, засаг. Гэтэл яагаад хариуцлага хүлээхгүй байгаа юм бэ. Халдварын тархалтыг зогсоохын тулд төр, засаг манлайлан хүний бөөгнөрөл үүсгэх ажлуудаа зогсоох ёстой биш үү.

Тиймээс төр, засгийн хариуцлагагүй үйлдлийн хариуцлагыг бид үүрмээргүй байна. Үр дүнгүй хорио, хязгаарлалтууд бидний аж амьдрал, эдийн засгийг сэргээхгүй гэж үзэж байна. Тиймээс өнөөдрөөс үйл ажиллагаагаа хэвийн үргэлжлүүлж, заалаар үйлчилж эхэлнэ гэдгээ УОК-т мэдэгдэж байна.

Халдвар хамгааллын дэглэмээ чандлан мөрдөж ажиллах болно. Үйлчлүүлэгчдийнхээ ухамсарт ч бүрэн итгэж байна. Хамтдаа, ухамсартайгаар халдвар хамгааллын дэглэмээ барьж, ковидтой тэмцэж, эдийн засгаа сэргээцгээе.

УОК, Мэргэжлийн хяналтын болон хууль хүчний байгууллагууд торгох, хүчээр үйл ажиллагаа зогсоох арга хэмжээгээ төр, засагт ч адилхан хэрэгжүүлнэ үү. Мөн үйлчилгээний чиглэлээр нь хавтгайруулалгүй, байгууллага нэгж бүрд халдвар хамгааллын дэглэмээ баримталж байгаа эсэх дээр хяналт тавьж, зөрчлийг арилгуулж, хязгаарлалт тавьж хариуцлага тооцож ажиллана уу” гэжээ.

Харин Зөрчлийн тухай хуульд хорио цээр, хөдөлгөөний хязгаарлалт, тэдгээрийн  дэглэм зөрчсөн, эсхүл саад учруулбал хуулийн хариуцлага хүлээлгэх хуультай аж. Тодруулбал, Зөрчлийн тухай хуулийн 5.13.2 дугаар хэсэгт “Гамшиг, аюулт үзэгдэл, халдварт өвчин, осол, аюулын үед эрх бүхий байгууллагаас тогтоосон хорио цээр, хөдөлгөөний хязгаарлалт, тэдгээрийн  дэглэм зөрчсөн, эсхүл саад учруулсан нь эрүүгийн хариуцлага хүлээлгэхээргүй бол хүнийг таван зуун нэгжтэй тэнцэх хэмжээний төгрөгөөр торгох, эсхүл 7-30 хоногийн хугацаагаар баривчлах шийтгэл оногдуулах, хуулийн этгээдийг таван мянган нэгжтэй тэнцэх хэмжээний төгрөгөөр торгоно” гэж заасан байна.

Б.Баатар