Ираны цөмийн хөтөлбөрөөс экс ерөнхийлөгчийн авилгын хэрэг хүртэл эгзэгтэй олон асуултаар CNN телевизийн нэрт сэтгүүлч Кристина Аманпур НҮБ-ын чуулганд оролцон, АНУ-д байгаа Монголын ерөнхийлөгчийг булжээ. Ц.Элбэгдорж өнөөдөр CNN-ий төв байранд зочилсон байна.

Ираны цөмийн хөтөлбөрөөс экс ерөнхийлөгчийн авилгын хэрэг хүртэл эгзэгтэй олон асуултаар CNN телевизийн нэрт сэтгүүлч Кристина Аманпур НҮБ-ын чуулганд оролцон, АНУ-д байгаа Монголын ерөнхийлөгчийг булжээ. Ц.Элбэгдорж өнөөдөр CNN-ий төв байранд зочилсон байна.

-Та өнөөдөр НҮБ-ын Чуулган дээр үг хэлэхдээ авлигын эсрэг чухал үг хэллээ. Та энэ асуудал дээр ямар бодлого баримталж байна?

 -Монголыг бүс нутгийнхаа ардчиллын хөтөч гэдэг. Монгол Улс 1990-оноос хойш ардчилал, чөлөөт нийгмийг байгуулахын төлөө олон бэхршээлийг туулж ирсэн. Харин авлига бол ардчилсан нийгмийг мөхөөх хамгийн хүчтэй заналт дайсан нь юм. Ардчиллыг шинэ тутам төлөвшүүлж байгаа орнуудын хувьд эргээд унаж байгаа гол шалтгаан нь авлига болдог. Бид авлигатай эрс шийдэмгий тэмцэхийг бодлого болгож байгаа. Монголд авлигын эсрэг хууль, түүнтэй тэмцэх бие даасан байгууллага болон хараат бус шүүхийн тогтолцоо бий.

-Байгалийн баялагтай холбогдуулаад аль улс танай улсын хамгийн гол хамтрагч болж байна вэ?

-Бидэнд тодорхой стандарт шалгуурууд бий. Хамгийн гол нь байгаль орчинд ээлтэй, нийгмийн хариуцлагыг өндөрт ухамсарласан, манай ард түмний ашиг сонирхлыг хүндэтгэсэн, түүнд нийцсэн ямар ч орон бидэнтэй хамтран ажиллах боломж нээлттэй байгаа.

-Одоо газрын зураг дээрээс харахад танай улстай хамгийн ойр том зах зээл бол Хятад Улс байна. Танайх энэ чиглэлд түлхүү хамтран ажиллах уу, эсвэл?

-Бид дэд бүтцээ сайжруулах тал дээр ажиллаж байгаа. Бид илүү олон гарцыг эрэлхийлж байгаа.

-Америкийн тухайд?

-Монгол Улс, АНУ нь үнэт зүйл нэгтэй ард түмнүүд. Манай зэвсэгт хүчний төлөөлөл дэлхий нийтийн халуун цэгүүд болох Ирак, Афганистанд энхийг сахиулж байна. Мэдээж АНУ-ын талд Монгол Улстай уул уурхайн хувьд хамтран ажиллах боломж нээлттэй байгаа. Бид гуравдагч хөршийн хөрөнгө оруулалтыг дэмжиж байгаа нь олон талын тэнцвэртэй хөрөнгө байдлыг эрхэмлэж буй хэрэг юм.

-Эдийн засгийн болон стратегийн асуудлаас түр холдоод өөр зүйлийг асууя. Та саяхан Эвсэлд үл нэгдэх орнуудын чуулганд оролцох үеэрээ Ираны цөмийн баяжуулах цогцолборт орсон анхны гадаад улсын төрийн тэргүүн боллоо. Та яагаад тэнд очих болов, бас ямар дүгнэлттэй үлдэв?

-Үнэндээ Эвсэлд үл нэгдэх орнуудын чуулганд оролцож байгаа улс орнуудын тэргүүнүүдэд бүгдэд нь тэнд очиж үзэх боломж нээлттэй байсан. Тэгээд би яагаад тэнд очиж үзэж болохгүй гэж бодсон. Манай Улсын байр суурь цөмийн асуудалд маш тодорхой ханддаг. Тухайн айлчлалын үеэр ч бас маш тодорхой л байсан. Нэгд, Ираны цөмийн хөтөлбөр нь аливаа тусгаар улсын аюулгүй байдалд заналхийлж болохгүй. Хоёрт, Тэд цөмийн хөтөлбөрөө НҮБ-ын аюулгүйн зөвлөлийн хяналт шалгалтын өмнө нээлттэй байлгах ёстой. Гуравт, Монгол Улс өөрийгөө цөмийн зэсэггүй бүс гэж зарласан. Үүнийг НҮБ дэмжсэн. Энэ бол зөвхөн Монголд чухал асуудал биш дэлхийд ч чухал асуудал юм.    

-Та Эвсэлд үл нэгдэх орнуудын чуулганд оролцох үеэрээ БНАСАУ-ын төрийн өндөр албан тушаалтантай уулзсан. Та Хойд солонгосын шинэ удирдагчийг шинэчлэл авчирч чадна гэж үзэж байна уу?

-Бид тус улстай маш өвөрмөц харилцаатай. Тухайлбал бид БНАСАУ болон БНСУ-д аль алинд нь Элчин сайдын яамтай. Бид Хойд солонгостой уламжлалт сайн харилцаатай. Миний бодлоор хойд солонгос эдийн засгаа шинэчлэх ёстой. Ер нь зөвхөн хойд солонгос ч бус “стан” орнуудын тухайд бид ардчилал, чөлөөт нийгэмрүү шилжих шилжилтийн талаар хуваалцах чамгүй туршлага бий гэж боддог.

 -Тэгэхээр ардчилал эрх чөлөөний тухай сэдэврүүгээ эргээд оръё. Та ардчиллын төлөө тэмцэгч хүн. Танай улсын өмнөх Ерөнхийлөгч шүүхээр яллагдсан. Энэ талаар?

 -Монгол бол шударга ёсыг тогтоохын төлөө авлигатай өргөн далайцтай тэмцэж байгаа орон. Хэн ч ямар ч хүн хуулиас дээгүүр эрх эдэлж болохгүй. Энэ бол ардчиллын амин сүнс нь. Бид ард түмнийхээ эрх чөлөөний сонголтоор олж авсан ардчиллыг хамгаалахын тулд зарим хүндрэл бэрхшээлтэй халгалгүй тулах ёстой. Тийм учраас авлигатай тэмцэх ёстой.