Үндсэн хуульд оруулсан нэмэлт, өөрчлөлтөөр Засгийн газрын дөрөв хүртэлх гишүүн нь л УИХ-ын гишүүн байх боломжтой болсон. Үндсэн хуулийн энэ заалтын дагуу одоогийн Засгийн газарт Ерөнхий сайдаас гадна Шадар сайд С.Амарсайхан, Сангийн сайд Б.Жавхлан, Хууль зүй, дотоод хэргийн сайд Х.Нямбаатар, Боловсрол, шинжлэх ухааны сайд Л.Энх-Амгалан нар давхар дээлтэй алба хашиж буй. Бусад сайд нь Үндсэн хуулийн дагуу дан дээлтэй буюу УИХ-ын гишүүн бус хүмүүсээс Л.Оюун-Эрдэнийн Засгийн газар бүрдэж байгаа. Ирэх оны төсвийн төслийг УИХ-д өргөн барихдаа Засгийн газар хоёр яамаар бүтцээ нэмэгдүүлж оруулж ирсэн. Энэ нь Цахим хөгжил, харилцаа холбооны яам, Хөгжлийн яам хоёр. Ингэснээр ирэх онд Монгол Улсын Засгийн газар хоёр шинэ сайдаар бүрэлдэхүүнээ нэмэхээр болж байна.

Үндсэн хуульд заасны дагуу Засгийн газрын дөрөв хүртэлх гишүүн нь УИХ-ын гишүүн байж болдог босгодоо одоогийн Засгийн газар хүрчихээд байгаа. Тэгэхээр шинээр нэмэгдэх хоёр сайдыг УИХ-ын гаднаас томилох болж байгаа юм. Цахим хөгжил, харилцаа холбооны сайдаар томилогдох магадлал өндөртэй нэр дэвшигч нь Харилцаа холбоо, технологийн газрын дарга Б.Болор-Эрдэнэ байв. Гэсэн ч Төсвийн төсөл өргөн барихын өмнөхөн Харилцаа холбоо, технологи йн газрын даргын зохион байгуулсан “Дижитал үндэстэн” арга хэмжээ нь нийгэмд асар их шүүмжлэл дагуулсан. Угаас цар тахлын дэглэмийг зөрчин зохион байгуулсан уг арга хэмжээний дараа коронавирусийн халдвар эрс ихэссэн билээ. Ингэснээр түүнийг сайд болгон дэвшүүлбэл нийгмийн дургүйцлийг асар ихээр хүргэх нь маргаангүй юм. Тэгэхээр Харилцаа холбоо, технологийн газрын дарга Б.Болор-Эрдэнийн хувьд “Дижитал үндэстэн” шоу нь “Зэрэг нэмэхийн өмнө” тохиолдсон азгүйтэл нь болоод буй.

Б.Болор-Эрдэнийн бүтэлгүйтэл зарим нэгэнд боломж болоод буй бөгөөд энэ яамыг сонирхох нэгэн эрхэм тодорсон нь УИХ-ын гишүүн Н.Учрал. Тэрбээр шинээр байгуулах яамыг тэргүүлж, Засгийн газрын бүрэлдэхүүнд орохоор ил далд лобби хийж байгаа гэгддэг.

Гэхдээ түүний энэ санаа нь одоогийн Засгийн газрын аль нэгэн давхар дээлтэй сайдыг огцруулсны дараа биелэх боломжтой.

Үндсэн хуулийн нэмэлт өөрчлөлтөөр Засгийн газрын сайдыг томилох, чөлөөлөх эрх Ерөнхий сайдад хадгалагддаг болсон. Өөрөөр хэлбэл, Ерөнхий сайд Л.Оюун-Эрдэнэ хүсвэл сайд огцорч, орны хүнийг нь томилох боломж бүрдэнэ. Улам бүр унаж байгаа нэр хүндээ ёроолд нь аваачихгүйн тулд Засгийн газар хэн нэгэнд хариуцлага хүлээлгэх зайлшгүй үнэнтэй нүүр тулах өдөр нь өнөө маргаашгүй тулгараад байна. Цар тахлын үед эрүүл мэнд хийгээд эдийн засгийн салбар элгээрээ мөлхөж байгаа энэ бүхэнд хариуцлага хүлээх албан тушаалтан нь магадгүй Шадар сайд С.Амарсайхан байж болох юм. Тэгвэл Н.Учралын хүсэл биелж, Цахим хөгжил, харилцаа холбооны сайдаар томилогдох боломж нь нээгдэх юм.

С.Сүлд