Улаанбаатар хотноо зохион байгуулагдаж буй “Францын соёлын өдрүүд” болон “Дэлхийн театрын өдрүүд”- ийг тохиолдуулан Улаанбаатар дахь Аллианс Франсез төв, Монгол улс дахь Францын төлөөлөгчийн газар Нийслэлийн Аялал жуулчлалын газартай хамтран 2022 оны гуравдугаар сарын 27-ны энэ өдөр Сүхбаатарын талбайд 14:00-18:00 цагийн хооронд “Франц хэлтэн орнуудын хотхон” үзэсгэлэн яармагийг зохион байгуулж байгаа юм.

Соёлын өдөрт сургалт судалгааны байгууллага, хувийн хэвшил, аялал жуулчлалын компани, ресторан, ТББ болон франц хэлтэн орнуудын дипломат төлөөлөгчийн газар зэрэг 40 гаруй байгууллага оролцож байна. Тус арга хэмжээний үеэр оролцогч байгууллагын үйл ажиллагааг олон нийтэд таниулан сурталчлах, Монгол дахь франц хэл, соёл сонирхогч, суралцагчдад франц хэлээр харилцах таатай боломжийг олгох юм.

Өдөрлөгт Циркийн үзүүлбэр, DJ Løwne, Voice шоуны “содон төрх” дуучин Jojo хүрэлцэн ирж ая дуугаа өргөнө. Мөн франц хэлтэн орнуудын хүнсний бүтээгдэхүүн амталгаа явагдахаас гадна олон нийтэд нээлттэй “Шөлний тэмцээн” зохион байгуулагдана.

Өдөрлөгийн оргил үед Улсын Дуурь Бүжгийн Эрдмийн театрын тайзнаа тоглогдох алдарт “Кармен” дуурийг Улаанбаатар хотын томоохон дэлгэцээр шууд дамжуулж олон нийтэд толилуулах юм.