МУИС-ийн Утга зохиол, урлаг судлалын тэнхим, МУИС-ийн Утга зохиолын нэгдэл хамтран зохион байгуулдаг “Чөлөөт сэтгэлгээний дуулал-2022” оюутны яруу найргийн наадам тавдугаар сарын 23-ны өдөр боллоо.
Энэ жилийн наадамд МУИС, МУБИС, ШУТИС, СУИС, ДХИС, Этүгэн их, дээд сургуулиудын нийт 35 оюутны 160 гаруй бүтээл ирснээс наадмын шүүгч, зохион байгуулагчид 10 шилдэг бүтээлийг тодрууллаа.
Эдгээр шилдэг бүтээлийн зохиогчдын нэрсийг нууцлан дугаарлаж, мэргэжлийн судлаач, шүүмжлэгч, яруу найрагчдаас бүрдсэн шүүгчдээс санал авч шилдэг гурван бүтээлийг шалгаруулахад Тэргүүн байранд МУИС-ийн II түвшний оюутан Э.Доржсүрэн, МУБИС-ийн оюутан IV түвшний оюутан Э.Цогзолмаа, МУИС-ийн III түвшний оюутан Р.Өсөхбаяр нарын бүтээл шалгарав.
“Чөлөөт сэтгэлгээний дуулал-2022” наадмын шилдэг бүтээлийг МУИС-ийн Утга зохиолын нэгдэл фейсбүүк хуудсаар цувралаар хүргэх юм.
Уг наадмын шүүгчээр яруу найрагч, “Чөлөөт сэтгэлгээний дуулал-1993” наадмын тэргүүн байрын шагналт Б.Галсансүх, Р.Чойномын өвийг хамгаалах “Өд” сангийн тэргүүн Д.Ганболд, МУИС-ийн гэрээт дэд профессор, “Чөлөөт сэтгэлгээний дуулал-2009” наадмын тэргүүн байрын шагналт Д.Нямдорж, МУБИС-ийн дэд профессор, утга зохиол шүүмжлэгч Г.Батсуурь, “Urga” хэвлэлийн газрын үүсгэн байгуулагч У.Бямбаням нар ажиллалаа. Мөн уг үйл ажиллагаанд зочин яруу найрагчаар “Чөлөөт сэтгэлгээний дуулал-1993” наадмын тэргүүн байрын шагналт Б.Галсансүх, 2006 оны тэргүүн шүлэгч Ш.Хатанбүүвэйбаатар, 2015 оны наадмын тэргүүн шүлэгч Б.Алтанхуяг, “Чөлөөт сэтгэлгээний дуулал-2019” наадмын тэргүүн байрын шагналт Э.Хонгорзул нар оролцон, шүлэг бүтээлээ уншлаа.
