Улс төрийн намуудын төлөөлөл Үндсэн хуулийн нэмэлт өөрчлөлтийн тунхаг бичигт гарын үсэг зурах арга хэмжээ боллоо. Арга хэмжээний эхэнд МАН-ын төрийн нарийн бичгийн дарга Д.Амарбаясгалан үг хэллээ.

Тэрбээр "Ард түмнээ бүрэн төлөөлөх парламентын чадавхыг нэмэгдүүлж, иргэдийн санал жигд тусгалаа олдог олон улсын жишигт нийцүүлэх, хөгжлийн хөтөлбөрөөр өрсөлддөг бодлогын намуудыг төлөвшүүлэх, хууль тогтоох болон гүйцэтгэх эрх мэдлийн зохист уялдаа, хяналт тэмцлийг хангах, хөгжлийн нэг төвтэй улсаас олон төвтэй улс болох зорилгоор нийслэлийн эрх зүйн байдлыг оновчтой болгох, төрийн сүлдийг төрт ёс, түүхэн уламжлалт үндэслэн шинэчлэх. Энэхүү санаачилга нь 2019 онд хийгдсэн Үндсэн хуулийн нэмэлт өөрчлөлтийн зүй ёсны үргэлжлэл болохыг тэмдэглэн хамрах хүрээг дараах байдлаар тогтоож байна. 

1. Хүний эрхийг үндсэн хуулиар бүрэн хамгаалах Хүний нэр төр халдашгүй байна, төрийн бүх байгууллага иргэнийхээ нэр төрийг хамгаалах эрх хүлээх, хүний амьд явах эрхийг хүндэтгэж цаазын ялыг халах, Иргэн үндсэн эрхээ үндсэн хуулийн цэцээр бүрэн хамгаалуулах, Үндсэн хуулийн цэц улс төрөөс хараат бус байх

2. Ард түмнийг төлөөлөх парламентын чадвахи хариуцлагыг нэмэгдүүлэх Сонгогчдын санал гээгддэг байдлыг арилгаж, сонгуулийн холимог систем бүхий хариуцлагатай сонгодог тогтолцоог төлөвшүүлэх замаар олон намын оролцоотой зөвшилцлийн ардчилалд шилжих, Парламентын засаглалын тогтолцоог бэхжүүлэх, сонгогчдыг төлөөлөх мандатын тоог нэмэх, УИХ-ын нэг гишүүний нөлөөллийн эрх мэдлийг багасгах

3. Хот хөдөөгийн хөгжлийг дэмжих, нутгийн удирдлагын тогтолцоог сайжруулах Төвлөрлийг сааруулах, хот хөдөөгийн ялгаварлыг багасгах, Хөгжлийн нэг төвтэй улсаас олон төвтэй улс болох зорилгоор бусад хотын хөгжлийг дэмжих

4. Төрийн сүлдийг шинэчлэх Төрийн сүлдийг төрт ёс, түүхэн уламжлалт суурилж шинэчлэх, Энэхүү өөрчлөлтийн үр дүнд өнгөрсөн он жилүүдийн алдааг засаж, ололтоо бэхжүүлэн, Монгол Улсын тусгаар тогтнол, эв нэгдэл, аюулгүй байдал улам бүр баталгаажиж, ардчилсан төрийн дархлаа сайжирч, хүний эрх хамгаалагдсан, хөгжил дэвшил хүн бүрт хүртээмжтэй, сонгодог парламентын тогтолцоотой улс болох зорилтыг тавьж байна.

Энэ хүрээнд улс төрийн намуудад уулзалт хийж, нэмэлт саналуудыг бичгээр ирүүлж байгаа. Ингээд энэхүү тунхаг бичигт гарын үсэг зурснаар УИХ-ын төрийн байгуулалтын байнгын хороо болон, ард иргэдийн дунд тандан судлах ажиллагааг явуулсны үндсэн дээр энэ үйл ажиллагаа УИХ-ын хариуцах ажил болно" гэв.

Д.Батчулуун