Ерөнхийлөгчийн тамгын газрын дарга Я.Содбаатар махны асуудлаар мэдээлэл хийлээ.
Тэрбээр “Хүнсний хангамж, хүнсний аюулгүй байдлын асуудлаар Монгол Улсын Ерөнхийлөгчийн байр суурь тодорхой байгаа. ОХУ- Украйны хооронд үүсээд байгаа нөхцөл байдлаас шалтгаалж олон улсад хүнсний хангамжийн асуудалд ноцтой үүссэн. Эдгээр хоёр улсын хувьд дэлхийн хүнсний томоохон нийлүүлэгч. Үүнээс шалтгаалаад хил залгаа улс орнуудад хүнсний хязгаарлалт үүсэж байна. Манай улсын хувьд ихэнх хүнсний бүтээгдэхүүнийг импортоор авдаг бөгөөд сүүлийн нэг жилийн хугацаанд дотоодын бараа бүтээгдэхүүний үнэ өссөн. Сүүлд эмээлтийн махны холбоотойгоор иргэдийг бухимдуулсан асуудал үүссэн. Энэ бол Монгол Улсад хүнсний аюулгүй байдал алдагдсаны жишээ. Үүнд холбогдох албан тушаалтнуудад хариуцлага тооцож ажиллаж байна. Тиймээс хүнсний хангамж, аюулгүй байдалтай холбоотой асуудлууд Монгол Улсын Ерөнхийлөгчийн анхааралд байгаа. Тэр ч утгаараа сүүлийн хоёр сарын хугацаанд хэд хэдэн томоохон зөвлөгөөн, арга хэмжээг зохион байгуулж, салбарын эрдэмтдийн үгийг сонсож ажиллаж байна.
Монгол Улсын хүн амын хүнсний аюулгүй байдалд ямар хохирол учирч байна, ямар эрсдэл үүсэж болзошгүй байна вэ гэдэг дээр улсын хэмжээнд улс төрийн манлайлал үзүүлж, парламентын түвшинд томоохон шийдвэр гаргаж, энэ салбарыг шинэчлэх ажил эхэлж байгаа.
Сүүлийн нэг жилийн хугацаанд хүнсний аюулгүй байдал, хангамжийн талаарх асуудал орхигдсон байдалтай, үүнийг дагаад дотооддоо үйлдвэрлэдэг байсан бүтээгдэхүүнээ хүртэл гаднаас авдаг болсон. Импортоор орж ирж байгаа хүнсний бүтээгдэхүүнд тавих хяналт суларсан, тээвэр ложистикийн үнэ өсөх, чанаргүй бүтээгдэхүүн их хэмжээгээр нийлүүлэх гэх мэт хүндрэлүүд байгаа.
Эмээлтийн махны асуудал дээр Засгийн газраас томилсон ажлын хэсэг тодорхой шийдвэрүүд гаргаад долоо хоног бүр хэлэлцэж байна. Үүнд, хэрэв хилийн асуудал жигдэрвэл экспортлох 10 мянга гаруй тонн мах бэлтгэгдсэн. Үүний цаана гаднын хөрөнгө оруулалттай компаниуд, үндэсний компаниуд ч байна. Тиймээс энэ асуудлыг стандартад нийцэж байгаа эсэхийг хоёр орны хорио цээрийн хэлэлцээрээр зохицуулж байна.
Дулааны аргаар боловсруулсан махны асуудалд дээрх хэлэлцээрийн шаардлагад нийцэж байгаа эсэхэд хяналт тавьж асуудал шийдэгдэх ёстой. Ирэх есдүгээр сарын 1-ээс эхлэх дулааны аргаар боловсруулсан махны техникийн зохицуулалтыг шинэчилж баталсан. Үүний хүрээнд Монгол улсад цаашид дулааны аргаар боловсруулсан махны үйлдвэрлэл явагдах бөгөөд дагаад экспортын асуудал шийдэгдэнэ” гэв.
Т.Мөнхжаргал
