Өнөөгийн байгаа Засгийн газрын өрийн нөхцөл байдал болон бүтцийг Сангийн сайд Б.Жавхлан танилцууллаа.
Өнөөдрийн байдлаар Монгол улс нийт 33.8 тэрбум ам. долларын өртэй байна. Үүнд,
- Монгол банкны өр буюу БНХАУ-ын ардын банктай үүсгэсэн хэлцлийн дүнд 2.6 тэрбум ам.доллар,
- Засгийн газрын гадаад өр 8.5 тэрбум ам.доллар,
- Арилжааны банкны өр 1.7 тэрбум ам.доллар
- Шууд хөрөнгө оруулалт буюу компани хоорондын зээллэг 12.3 тэрбум ам.доллар, Үүнд Оюутолгойн 8.1 тэрбум долларын дотоод өр байна.
- Бусад ААН-ийн өр 8.2 тэрбум ам.доллар, Үүнд Дубайн гэрээтэй холбоотой буюу Оюутолгойн 4.4 тэрбум ам.долларын өр байна.
Урсгал тэнцлийн алдагдал сүүлийн 10 жилийн дунджаар дотоодын нийт бүтээгдэхүүний 19.5 хувьтай тэнцэж байгаа нь гадаад өр нэмэгдэхэд нөлөөлж буй гол хүчин зүйл болжээ. Нөгөө талаар эдийн засгийн өсөлт хүртээмжгүй байгаагаас ядуурал дорвитой буурахгүй байгаа юм.
Хэдийгээр манай улс сүүлийн 14 жилийн хугацаанд гадаад худалдааны нийт 4.7 тэрбум ам.долларын ашигтай байсан боловч урсгал дансны үйлчилгээний тэнцлээр -15.5 тэрбум, анхдагч орлогын тэнцлээр -14.9 тэрбум ам.долларын алдагдалтай гарсан нь нийт урсгал данс 28.1 тэрбум ам.долларын алдагдалтай гарахад хүргэсэн байна. Өөрөөр хэлбэл, энэ алдагдлыг гадаад өрөөр санхүүжүүлсэн буюу энэ хугацаанд гадаад өр мөн хэмжээгээр буюу 27.1 тэрбум ам.доллароор өсжээ. Манай улс сүүлийн 14 жилд зэсийн экспортоос 21.4 тэрбум, нүүрснээс 22 тэрбум, нефтиэс 4.4, алтнаас 7.1, төмрийн хүдрээс 5.8 тэрбум ам.доллар буюу нийт экспортын 73.8 тэрбум ам.долларын орлого олсон. Гэвч нөгөө талдаа энэ хугацаанд хүнс 7.1 тэрбум, автомашин 5.1, бензин шатахуун 13.5 тэрбум гэх мэт нийт 69.1 тэрбум ам.долларын бүтээгдэхүүн импортолж, үүний дээр гадаад улсуудад тээврийн үйлчилгээнд 3.2 тэрбум, аялал жуулчлалд 3.6 тэрбум гэх мэтээр нийт 15.5 тэрбум ам.доллар үйлчилгээний төлбөр төлжээ.
Т.Мөнхжаргал
