Манай тусгай сурвалжлагч С.Ононтуул Бүгд Найрамдах Сингапур улсаас мэдээлж байна.
Монгол Улсын Ерөнхий сайд Л.Оюун-Эрдэнэ Сингапур Улсын Ерөнхий сайд Ли Сиен Лүний урилгаар тус улсад албан ёсны айлчлал хийхээр өнөөдөр онцгой үүргийн нислэгээр (2022.07.06) хүрэлцэн очлоо. Айлчлалын албан ёсны уулзалтууд маргааш эхлэх бөгөөд энэ хүрээнд манай улсын Ерөнхий сайд Сингапурын Ерөнхий сайд Ли Сиен Лүнтэй албан ёсны хэлэлцээ хийж, Ерөнхийлөгч Халима Яакобт бараалхаж, Харилцаа холбоо, мэдээллийн сайд Жозефин Теотой уулзахаар төлөвлөж байв. Гэсэн ч цар тахлын улмаас тус улсын Ерөнхийлөгчид бараалхах боломжгүй болсон юм. Айлчлалын үеэр Сингапурын Хамтын ажиллагааны байгууллага, Хуримтлалын төв сан, Орон сууц, хөгжлийн зөвлөл, “Темасек” олон улсын сан, Сингапурын үндэсний их сургуульд зочилно.
Ли Сүен Лүн 2004 оноос Сингапур Улсын Ерөнхий сайдаар ажиллаж байгаа бөгөөд 1984 оноос хойш парламентын гишүүнээр тасралтгүй сонгогдож байгаа улстөрч юм. Өдгөөгийн Сингапурыг үндэслэгч гэгддэг, анхны Ерөнхий сайд Ли Куан Югийн ууган хүү тэрбээр Ерөнхий сайдаар ажиллаж эхэлснээсээ хойш Монголын гурав дахь Ерөнхий сайдыг албан болон ажлын айлчлалаар хүлээн авч байгаа нь энэ билээ. Ли Сүен Лүнийг Ерөнхий сайд болсных нь дараа жил нь буюу 2005 онд Монгол Улсын Ерөнхий сайд Ц.Элбэгдорж тус улсад ажлын айлчлал хийж байсан бол 2011 онд Ерөнхий сайд С.Батболд албан ёсоор айлчилж байлаа. Ерөнхий сайд Л.Оюун-Эрдэнийн энэ удаагийн албан ёсны айлчлал энэ төвшинд тус улсад Монголын талаас хийж байгаа 11 жилийн дараах айлчлал болж байна.
Хоёр том хөршийн дунд орших бамбай улсын Ерөнхий сайд, төр засгийн тэргүүн аль улсад, ямар хэмжээний айлчлал хийх нь вэ гэдэг нь дэлхийн улс төр эмзэг буй энэ цаг үед геополитикийн эмзэг сэдэв. Ийм эмзэг цаг үед Монгол Улсын Ерөнхий сайд энэ оны албан ёсны айлчлалаа Бүгд Найрамдах Сингапур улсаас эхлүүлж байна.
Сингапур улсын хувьд парламентын бүгд найрамдах засаглалтай, сонгуулийн холимог системтэй, олон намын тогтолцоотой. Өнгөрсөн оны статистик мэдээллээр 378.62 тэрбум ам.долларын Дотоодын нийт бүтээгдэхүүнтэй Сингапурын эдийн засгийн өсөлт нь мөн онд 7.6 хувь байсан. Сүүлийн арав гаруй жилийн хугацаанд анх удаа 2020 онд эдийн засаг нь агшсан бөгөөд энэ нь дэлхий нийтийг хамарсан цар тахлаас үүдэлтэй. Нэг хүнд ногдох ДНБ-ээрээ дэлхийд эхний аравт тогтмол ордог Сингапурын хөрөнгийн нөөцийг бүрдүүлдэг санхүүгийн голлох гурван байгууллага нь “Темасек холдингс”, “Хөрөнгө оруулалтын корпорац”, Төв банк гурав. Монгол Улсын Ерөнхий сайд Л.Оюун-Эрдэнэ тус улсад хийж байгаа албан ёсны айлчлалаараа 405 тэрбум сингапур долларын хөрөнгөтэй “Темакс холдингс”-ын “Темакс сан”-гаар зочилно. “Темакс” олон улсын сан 2009 оноос эхлэн Монгол Улсад төсөл хөтөлбөр хэрэгжүүлж байгаа билээ. 1965 онд Малайз улсын бүрэлдэхүүнээс өөрсдийн хүслээр бус гарч тусгаар тогтнож байхдаа нэг хүнд ногдох ДНБ нь ердөө 500 ам.доллар байсан Сингапур улс өдгөө нэг хүнд ногдох ДНБ нь 66.263 ам.доллар болон өсөж дэлхийн хамгийн хүчирхэг эдийн засагтай улсуудын нэгээр зүй ёсоор нэрлэгдэж байна. Нэг хүнд ногдох ДНБ нь тухайн үедээ Гана улстай ижил байсан Сингапур улс ийн богино хугацаанд (57 жил) дэлхийн тэргүүлэгч эдийн засагтай, төр засаг нь тогтвортой хөгжсөн шалтгаан нь “MPH” гэгддэг. Энэ нь хамгийн чадварлаг нь удирдах албан тушаалд томилогддог төрийн тогтолцоо буюу Meritocracy, шаардлагагүй зүйлд цаг алдаад байдаггүй буюу нэгэнт бүтээчихсэн дугуйг дахин бүтээх гэж цаг алддаггүй Pragmatism, шударга зарчим буюу Honesty юм. Энэ гурвыг хэрэгжүүлснээр өнөөгийн Сингапур бүтсэн хэмээдэг. Энэ зарчмыг үндэслэгч, Сингапурын анхны Ерөнхий сайдын ууган хүү, 2004 оноос хойш улсынхаа Ерөнхий сайдаар ажиллаж байгаа Ли Сүен Лүний урилгаар Монгол Улсын Ерөнхий сайд Лувсаннамсрайн Оюун-Эрдэнийн тус улсад хийж байгаа албан ёсны айлчлал ийн эхэлж байна.
