Б.Жагар тэргүүтэй иргэд "Петрочайна Дачин Тамсаг" компанитай холбоотой асуудлаар УИХ-ын ээлжит бус чуулганыг хуралдуулах шаардлага хүргүүлж буй талаар мэдээлэл хийлээ. Энэ үеэр Б.Жагар мэдээлэл өглөө.

Тэрбээр “Аливаа улс өөрийн баялгийн дийлэнх хувийг хүртэх эрхтэй. Нэгдсэн Үндэсний байгууллага хүртэл Монгол Улсын иргэдийн эрхийг баталгаажуулчихсан байна. Ямар ч хууль өөрчлөгдсөн бай “Петрочайна Дачин Тамсаг” компанийн гэрээг өөрчлөхгүй, гэрээг дагана гэж байна. 30 жилийн хугацаанд 27 удаа ажлын хэсэг гарсан байдаг юм билээ. Ингэхдээ нэг ширхэг ч үр дүн байхгүй. УИХ үнэхээр ард түмнээ боддог юм бол шаардлагатай хуулиудыг өөрчлөх хэрэгтэй.

УИХ-ын ээлжит бус чуулганыг хуралдуулах шаардлагыг төрийн гурван өндөрлөгт өгч байна. Үзэл бодлоо илэрхийлээд эх орноо хамгаалсан хүмүүсийг шоронд хийж байгааг ойлгохгүй байна. Хууль хяналтын байгууллага шударга байж ажлаа хийгээсэй гэж уриалж байна. Өнөөдөр бүх хүний амьдрал ямар байгаа билээ. Гурван сая монголчууд өнөөдөр мөлхөж байна. Гэтэл төрийн ордонд байгаа 76 гишүүн тэднийг дагасан 100 мянган тендэрчид, хулгайч нарын амьдрал сайхан байна” гэв.