Улаанбаатар хотын Ерөнхий менежер бөгөөд Захирагчийн ажлын албаны дарга мэдээлэл хийлээ. Энэ үеэр Нийслэлийн засаг даргын хэвлэлийн төлөөлөгч Н.Сугар мэдээлэл өглөө.

Тэрбээр "Халтиргаа ихэссэнтэй холбоотой давс, бодисны асуудал дээр тайлбар өгье. Өмнө нь гэрээ байгуулсан тендерт шалгарсан бол нийлүүлж байгаа бүтээгдэхүүнийг шинжлэх ухааны түвшинд шинжлэхгүй хүлээж авдаг байсан. Тэр бол шалгах  тогтолцооны асуудал. Цаашдаа чанартай болон чанаргүй гэдгийг шинжлэх ухааны үндэслэлтэй шинжилж , хүлээж авахдаа илүү анхаарал хандуулна.

Тухайн үед шалгах үүрэг байгаагүй. Үүнээс хойш тогтолцоо өөрчлөгдөж байгаа учраас илүү хяналттай болж асуудал шийдэгдсэн гэж ойлгож болно. 

Мөн зам талбай, цэвэрлэгээ үйлчилгээний 28 машинтай холбоотой асуудал үүссэн. Энэ зөвхөн цас цэвэрлэх зориулалттай машин огт биш. Зам талбай цэвэрлэгээ үйлчилгээний гэдэг нэршилтэй машин. Олон нийтийн зүгээс цахим орчноос үнэ нь хямд байна гэдэг харьцуулалтыг гаргаж ирж шүүмжилж байна.  Манайд орж ирсэн тээврийн хэрэгсэл, техникийн хувьд жилийн дөрвөн улиралд ажиллах боломжтой. Улаанбаатар хот эрс тэс уур амьсгалтай. Тиймээс онлайн  дээр харьцуулагдаж байгаа хямд машиныг оруулж ирвэл цахилгаан хөдөлгүүртэй тул  өвөл ашиглаж болохгүй гэх мэт хэрэгцээнд нийцэхгүй олон асуудлууд үүснэ. Дээрээс нь хүчин чадлыг нь нэмэгдүүлэх, суурьлуулалт  гэх мэт зардлууд багтсан учир харьцуулж байгаа үнээс  арай өндөр харагдаж байгаа" гэв. 

Б.Мичидмаа