Дэлхийн хамгийн том улс төрийн хүчин Хятадын Коммунист нам өчигдөр Бээжин хотноо 18 дугаар их хурлаа эхлүүллээ. 2270 төлөөлөгч оролцож буй уг хурлаар намын ерөнхий нарийн бичгийн дарга буюу Хятадын ирээдүйн удирдагч, мөн Төрийн зөвлөлийн дэд ерөнхий сайдыг сонгох юм. Хэдийгээр намын ЕНБ-ийн дарга таван жилийн хугацаатай сонгогддог, улиран сонгогдох цаад хугацааг тэтгэвэрийн насаар хязгаарласан байдаг ч 10 жил болоод албан тушаалаа шилжүүлдэг жишиг тогтож байна.

    Дэлхийн хамгийн том улс төрийн хүчин Хятадын Коммунист нам өчигдөр Бээжин хотноо 18 дугаар их хурлаа эхлүүллээ. 2270 төлөөлөгч оролцож буй уг хурлаар намын ерөнхий нарийн бичгийн дарга буюу Хятадын ирээдүйн удирдагч, мөн Төрийн зөвлөлийн дэд ерөнхий сайдыг сонгох юм. Хэдийгээр намын ЕНБ-ийн дарга таван жилийн хугацаатай сонгогддог, улиран сонгогдох цаад хугацааг тэтгэвэрийн насаар хязгаарласан байдаг ч 10 жил болоод албан тушаалаа шилжүүлдэг жишиг тогтож байна.

    82 сая гишүүнтэй ХКН-ын хурлаар ЕНБ-ийн дарга Ху Зиньтао албан тушаалаа өгч шинэ удирдагч сонгогдоно. Дэлхийн дахин луу улсын ирээдүйн удирпагчийг Си Зиньпин хэмээн таамаглан хүлээж сууна.

Намын төв хорооны Улс төрийн товчоо нийт 25 гишүүнтэй, байнгын хороо нь есөн хүний бүрэлдэхүүнтэй. Энэ есөн хүний дохиогоор нам засаг хөдлөнө. Өндөр албан тушаалд шат дараалан сонгогдох бөгөөд туршлагатай хүн томилдог тул Үй Жөншэн, Ли Юаньчао, Вань Цишань, Жан Дөзян, Жан Гаоли, Ван Ян нарыг томилогдоно хэмээн барууны хэвлэлүүд бичжээ.
Өвөр Монгол гаралтай улс төрч Багатөр энэхүү хороонд нэр дэвшиж магадгүй хэмээн өнгөрсөн долдугаар сард гадныхан бичиж байлаа. 1981 онд ХКН-д элссэн Багатөр 2001 онд ӨМӨЗО дахь ХКН-ын нарийн бичгийн дэд даргаар томилогдсон юм. ХКН-ын 17 дугаар их хурлаар Сахилга батын хорооны төв хорооны гишүүнээр сонгогдсон тэрээр 2009 оноос ӨМӨЗО-ыг удирдах болсон юм.

Коммунист намын зөрчил

Коммунист үзэл суртал нийтийн өмчийг дээдэлдэг. Гэтэл Коммунист нам нь удирдаж буй БНХАУ-д хувийн өмчийг дээдлэх болж, бүр намын их хурлаараа хятад хүний хувийн өмчийг хэрхэн өсгөх, хэрхэн чинээлэг нийгэм байгуулах талаар хэлэлцэж байна. Дэлхий дахин хатуу дэглэмтэй Хятадын энэхүү бодлогыг “хятад маягийн коммунизм” хэмээн тодорхойлж байгаа ч зарчмын хувьд капитализмыг дээдэлсэн коммунизм гэдэг зөрчилтэй л байгаа юм.

Эрх баригчдын авилгын асуудал удирдагч намаа иргэд нь чимээгүйхэн эсэргүүцэх бас нэгэн сэжүүр болсон юм. Коммунист намын нэр хүндтэй гишүүн болох Бо Силайн авилга, түүний эхнэр Гу Кайлайн хүний амь хөнөөсөн хэрэг дэлхийн халуун мэдээ болсон. Мөн Төрийн зөвлөлийн ерөнхий сайд Вэнь Жибаогийн гэр бүлийн хөрөнгө гурван тэр бум доллар давсан талаар ч яригдах болсон. Хэдийгээр энэ мэтийн авилгын хэргийг Коммунист нам тас нууж байгаа ч ард иргэд гадарлан бухимдах болжээ.

Дараагийн зөрчил нь нийгмийн дундаж буюу доод давхаргад илэрч байна. Хятадад өдөрт 100 гаруй бослого, тэмцэл гарч байна гэсэн судалгаа бий. Эдийн засгийн өсөлт буурснаас болж ажилгүйдэл нэмэгдэх, хотжилтыг дагаад иргэдийн газрыг булаах, орлогын тэгш бус хуваарилалтаас болж баян ядуугийн ялгаа ихэссэн зэрэгтэй холбогдон нийгмийн бухимдал уурын яндан шиг л савсаж байгаа нь энэ намын бодлоготой ихээхэн холбоотой.

Бас нэгэн зөрчил нь Төвдийн асуудал. Далай ламыг Энэтхэгт цөлж, төвдүүдэд харгис дээрэнгүй бодлого баримтлах болсныг төвд үндэстэн эсэргүүцэх болсон. Эсэргүүцэл дээд шатандаа хүрч өөрийгөө зулын гол болгогч төвд хүний тоо 2009 оны хоёрдугаар сараас хойш 63-т хүрчээ. Өчигдөр ч мөн дээрэнгүй бодлогыг хэлэлцэх 18 дугаар их хурлыг эсэргүүцэж дөрвөн төвд иргэн өөрийгөө шатаасан байна. Мэдээллийг нь нуудаг, ийм зүйлийг давтуулахгүй хэмээн ихэд сэрэмжилдэг хятад улсын “бүтээж буй” эмгэнэлт явдлыг хавтгай дэлхий харсаар л байна. Харин коммунист нам хөдлөхгүй.

Эцэст нь цаазаар авах ялтай иргэдийн эд эрхтэнг нь өөрсдийн зөвшөөрөлгүйгээр донор болгох явдал олон улсын хэмжээнд энэ намын бодлогыг буруутгах зөрчил болжээ. Ху Зиньтаогийн өмнөхийн өмнөх удирдагч Дөн Сяопины шинэчлэлээр гарч ирсэн энэхүү журмыг олон улсын байгууллагууд харгис хэмээн дүгнэдэг. Хятад хүн үхсэн ч бие эрхтнээ бүтэн байлгавал нэр төрийн хэрэгт тооцдог тул ард иргэд ч дургүй. Энэ тухай мэдээлэл маш ховор байдаг хэдий ч тус улсад жилдээ 3000 гаруй хоригдлын эд эрхтэнг донор болгон авдаг гэсэн судалгаа бий.

БНХАУ-ыг ирэх 10 жилд хэн удирдах, ямар бодлого баримтлах вэ гэдэг хөрш монголчуудын хувьд ч, дэлхий дахины хувьд ч анхаарлын төвд байна.

Харин хотын захирагч Э.Бат-Үүл маань өнгөрсөн сард Лениний хөшөөг буулгах үеэр “Хятадын Коммунист нам олон сая хүний амийг хядсан…” хэмээн хэлсэн нь луу хөршийн маань эрх баригчдын нүд, чихэнд хүрсэн байна лээ. Манай улсын вальютын үнэ, гадаад худалдаа зэрэг нь урд хөршөөс бараг 100 хувь хамааралтай гээд хэлчихэд хилсдэхгүй байхад туршлагатай улс төрч ингэж хэлж, Хятад улсыг уурлуулах хэрэг байгаа ч юм уу.