Өнгөрсөн наймдугаар сард Монгол Улсын Засгийн газрын ээлжит хуралдаанаар Төрийн  тусгай албан хаагчдын нэгдсэн эмнэлгийг Цагдаагийн ерөнхий газарт шилжүүлсэн. Харин УИХ-ын Х.Тэмүүжин Хууль зүйн сайд болсныхоо дараа тус эмнэлгийн оффисын зориулалтаар ашиглана гэсэн юм. Түүний эл шийдвэрийг Засгийн газрын хуралдаанаас дэмжин шийдвэрлэсэн билээ. Иймээс эмнэлгийн эмч нар эсэргүүцэн, ажил хаялт зарлан жагссан. Ингээд эмнэлгийн дарга Ш.Жаргалсайханаас дараах зүйлийг тодрууллаа.

-Эмнэлгийг оффисын зориулалтаар ашиглах шийдвэр гаргачихсан.Цаашид яах гэж байна?

-Ийм шийдвэр гаргуулахгүйн тулд бид Хууль зүйн сайд Х.Тэмүүжин, Шинэчлэлийн Засгийн газарт урьдчилан сануулж, ойлгуулах гэж сар гаруй хугацаанд тэмцлээ. Гэтэл сонссон ч үгүй, сонсохыг хүссэн ч үгүй шийдвэрээ гаргачихлаа. Нэгэнт төрөөс ийм шийдвэр гаргачихаар бид одоо яалтай билээ. Үнэхээр харамсч байна. Яг өнөөдрийн байдлаар манай эмнэлэг шиг барилгын, техник, багаж төхөөрөмжийн шийдэлтэй эмнэлэг одоогоор байхгүй. Ийм эмнэлгийн хүч хэрэгслийг өнөөдөр оффис болгоно, үгүй хийнэ гэж байгаа нь Засгийн газарт шинэ юм хийж, шинэчлэл хийж, дэвшил хөгжих юм алга. Шинэчлэлийн Засгийн газарт үнэхээр харамсч байна. Төрд гомдож байна.

-Госпиталийн дэргэд 300 ортой өргөтгөл барина гээд байгаа. Энд байгаа тоног төхөөрөмжийг тэнд шилжүүлнэ гэсэн үг үү?

-Госпиталийн өргөтгөл баригдаж байгаа. Тэр эмнэлэг өөрөө манайх шиг төхөөрөмж захиалах байх. Тэгэж байж шинэ өргөтгөл болно. Манай төхөөрөмжийг АНУ-аас хүмүүс ирж суулгаж, суурилуулж өгсөн. Хүн оролдох эрхгүйгээр 2-3 жилийн баталгаа өгсөн. Тэгэхээр бид лав энэ төхөөрөмжийг зөөгөөд суурилуулж чадахгүй. Ахиж тэр хүмүүсийг нь л авчирдаггүй юм бол.

-Энэ асуудалд Эрүүл мэндийн сайдыг дугарсангүй гэж шүүмжлэл их байна?

-Тийм. Эрүүл мэндийн сайд нь ч ойлгоогүйд харамсаад байна. Засгийн газрын хуралдаанд Н.Удвал сайд мэргэжлийн хүний үүднээс дугарч чадаагүйд Эрүүл мэндийн салбарынханд хэлэх үг олдохгүй байна. Бид өнөөдөр Төрийн эргэлт хийх гээгүй, Төр Засгийн бодлогыг эсэргүүцээгүй. Хүчтэний өмнө хүчгүйдээд л байж байна.