Мөрөөдөл гэдэг агуу зүйл шүү дээ. Хүмүүс мөрөөдлөөсөө бүү холдоосой” “Мөрөөдөхөд мөнгө төлдөггүй” гэдэг. Мөнгө төлдөг байсан ч би мөрөөдөх л болно” хэмээн омогшиж явсан жүжигчин Г.Алтаншагай болоод “Мөрөөдлийн театрыхны” мөрөөдлийг МАН хэмээх мангас залгилаа. Тэрээр мөрөөдөл няцлагчдад худалдагдан “мөрөөдөл бол хог”, “мөрөөдсөн хүн тэнэг” гэх сурталчилгаанд тоглосноороо олон зуун дэмжигчдээ алдав. Өчигдөрхөн гэгээн мөрөөдөл ярьж явсан хүн хэдэн цаасны бараа хараад мөрөөдөл шиг хэрэггүй юм байхгүй гэж ярьж явахаар хэн тоох билээ.

    Хөөрхий, жүжигчинд буруу байхгүй ч юм шиг. Байгаа ч юм шиг. Угаасаа л хэдэн төгрөгний бараа харвал мөрөөдлөө нулимахад бэлэн хүмүүс. Сонгууль хэдхэн өдөр болоод дуусчихна. МАН-д ашиглуулсан хөөрхийс яах вэ? Нэрнээсээ татгалзах уу?

   Н.Дэмбэрэл болон “дарваан” хэмээх Цогтгэрэл нар нийлж байгаад  юм хийе гээд алдан онон яваа хөөрхий залуусаар өөрсдийнх нь ирээдүйг нулимууллаа. Одоо Алтаншагай, Эрхэмбаяр, Дөлгөөн нар ичсэн, түлэгдснээсээ болоод “Мөрөөдлийн театр” гэх хөөрхөн нэрээ солихоос аргагүйд хүрлээ. Авьяастай залуус одоо “худалдагдсан новш” гэх хочноос салахаа байж, цаашид хийх олон уран бүтээлийг нь монголын залуус тоохоо болино. Хөөрхий залуусын мөрөөдөл мөрийнд донтсон, мөлгөр бодолтой ерөнхий нарийн бичгийн даргын хөлд үрэгдэв.

 Нөгөө талаасаа Г.Алтаншагай болоод түүний нөхөд их л өрөвдмөөр залуус юм. Өөрсдийнхөө хэлсэн ярьсан, зорьсон зүтгэсэн үзэл санаагаа өөрсдөө алах нь ухаалаг бус үйлдэл. Үнэт зүйл, зарчмаа хэдэн цааснаас худалддаг хүн угаасаа хол явдаггүй юм. Хямдхан тоглолтын танхим түрээслэдэг байж болно, нэг реклам шүү юманд тоглоод хэдэн төгрөг авдаг байж болно. Өөрийгөө нулимах, өөрсдийнхөө мөрөөдлийг доош нь хийх л утгагүй. Үзэл санаа мөрөөдлийнхөө төлөө “үгүй” гэж хэлж чаддагүй хүмүүс хэн ч биш болоод дуусдаг юм.

 Ах нам гэх МАН тэднийг ашиглан залууст “мөрөөдөл” гэдгийг гэрээсээ мөнгөн аяга хулгайлах, жижиг луйвар хийх төдий зүйл хэмээн ойлгуулахаар чармайж байна.  Хэн нэг ахын тус, ач байхгүй бол залуу хүн өөрөө юу ч хийх чадваргүй байдаг гэж итгүүлэх, номлохыг оролдож байна.

 Үгүй дээ, Шагай. Чи олхиогүй байна. Чамаас бусад нь мөрөөдөлдөө, нэр төрдөө мөнгөнөөс илүү хайртай байдаг юм. Хэлсэн үгнээсээ хэдэн төгрөг хараад буцдаг хүн бидний таашаал биш. Баяртай, бандгар залуу минь, чи одоо хэн биш.

Шагайг ашиглагчдад хандаж хэлэхэд та залуу үеэ жижиг луйвар хийх хэн нэг мундаг ахын нөмөр нөөлгийг хүлээн хэвтэх зэрэг зүйлд уриалахдаа ичихгзй байна уу? Ахтай ахгүй өөрсдийгөө аваад явах чадвартай болохыг залуус уриалах ёстой хүн нь та биш гэж үү?

Уучлаарай монголын залуус тань шиг биш. Бид австралид сурна гэж төрийн сангаас зээл авчихаад монголд Маастрихтын сургуульд сурч зөрөө мөнгийг нь тогшдог тань жижиг гарууд биш. Бидэнд том мөрөөдөл, том тэмүүлэл байгаа. Бид түүндээ том ахгүйгээр хүрч чадна. Баяртай.