Төрийн өндөр дээд албан тушаалтан, цагаан захтнууд албан тушаалаа урвуулан ашиглаж, их хэмжээний мөнгө завшсаныг нь хуулийн байгууллага илрүүлээд шалгаж эхэллээ гэх мэдээлэл гарсаар нэлээдгүй хугацаа өнгөрчээ. Гэвч тэдний хэрэг хэсэгтээ хэвлэлийнхний бай болсоор аажимдаа мартагдах нь олонтаа. Тиймээс шүүхийн танхимд дуудагдах цагаан захтнуудын хэрэг юу болж байгааг нэхэн сурвалжиллаа.


    УИХ-ын гишүүн асан Д.Дондогийг олон удаагийн үйлдлээр бусдын эд хөрөнгийг залилсан хэмээн 2008 оноос шалгаж байсан ч УИХ-ын гишүүний бүрэн эрхийг түтгэлзүүлээгүй хэргийг түтгэлзүүлээд байсан. Харин 2012 оны сонгуульд сонгогдоогүй учир түүний хэргийг сэргээн шалгаж, энэ сард шүүхэд шилжүүлэхээр болжээ. Мөрдөн байцаалтын явцад тэрээр өөрийн шадар туслахаар ажиллаж байсан Г.Сайнбаяраар дамжуулан “Меридан” гэх компаниас орон сууцны барилга барих зөвшөөрөл гаргуулж өгнө гээд 242 мянга ам.доллар, 400 сая төгрөг залилан авч, уг мөнгийг өөрийн сонгуулийн сурталчилгаандаа зарцуулсан нь тогтоогдсон билээ.  Тиймээс онц их хэмжээний мөнгийг бусадтай бүлэглэн залилж авсан хэмээн Эрүүгийн хуулийн 148.4-т зааснаар эрүүгийн хэрэг үүсгэн шалгаж байгаа юм. Хэрвээ УИХ-ын гишүүн асан Д.Дондогийн гэм буруутай нь тогтоогдвол эд хөрөнгөө хураалгаж, 10-15 жилийн хорих ялаар шийтгүүлэх юм.


    Сонгинохайрхан дүүргийн Засаг дарга Ц.Болдын хэргийг удахгүй шүүхэд шилжүүлэх гэж байгаа талаар Нийслэлийн прокурорын нэгдүгээр орлогч Ё.Сагсай мэдээлсэн. Тэрээр Нийслэлийн хот тохижилтын газрын даргаар ажиллаж байхдаа Нийслэлийн захирагчийн албаны орчны бохирдол хог хаягдалтын менежментийн хэлтсийн дарга асан Н.Дэлгэрбаяр, Хот тохижилтийн газрын нягтлан бодогчоор ажиллаж байсан Н.Баяраа нартай урьдчилан тохиролцож бүлэглэж, төрийн байгууллага, төсвийн хөрөнгөд 88 сая орчим төгрөгийн хохирол, мөн 61 сая орчим төгрөгийн эд хөрөнгийг бусадтай бүлэглэн завшиж, үрэгдүүлсэн нь мөрдөн байцаалтын явцад тогтоогдоод байгаа юм. Түүнийг Баянзүрх дүүргийн шүүхэд шүүх юм.


    Хайгуулын 120 лиценз хууль бусаар олгосон хэрэгт татагдсан Ашигт малтмалын газрын дарга асан Д.Батхуягт холбогдох хэргийг Авлигатай тэмцэх газар шалгаж, нийслэлийн Прокурорын газарт шилжүүлсэн. Харин Нийслэлийн прокурорын газраас хэргийг хянаж дуусан, шүүхэд шилжүүлэхэд бэлэн болоод байгаа юм. Тэрээр “Саусгоби Сэндс” компанийн хайгуулын таван лицензийн ашиглалтын эрхийн хугацаа нь таван лицензийн дөрвийнх нь эрхийг сэргээж, нэг лицензийг хувьдаа авсан нь мөрдөн байцаалтын явцад тогтоогдсон байна.
Өөрөөр хэлбэл, Д.Батхуяг нь тус компанийн лицензийг нь компаниас өөрөө авч, хэлтсийн дарга Н.Даваацогтоор шийдвэр гаргуулж, найзынхаа “Зэлэм” компанид хууль бусаар шилжүүлж өгсөн.
Тэр хууль бусаар шилжүүлж өгсөн 52.61 дугаартай хайгуулын лиценз нь нийтдээ 72 мянган их газарт хамаарсан 42 сая тонн нүүрсний нөөцтэй нь тогтоогдсон билээ.



    Анод”-ын хэрэг тодотголтой “Анод” банкийг дампууруулсан удирдлагуудын хэрэг Баянзүрх дүүргийн шүүхэд шилжээд сар гаруй хугацаа өнгөрчээ. Тус хэрэгт Монголбанкны Тэргүүн дэд ерөнхийлөгч Б.Энххуяг, Хяналт шалгалтын газрын захирал асан Ж.Ганбаатар, СЗХ-ны дарга Д.Баярсайхан, “Анод” банкны ТУЗ-ийн гишүүн Л.Уламбаяр, Н.Даваа, Э.Гүр-Аранз, Д.Энхтөр нарын албан тушаалтнууд яллагдагчаар татагдаад байгаа юм. Хэрэг шүүхэд шилжсэнээс 30 хоногийн дотор шүүх хянан үзэж, шүүх хурлыг товлодог. Тэгэхээр “Анод” банкны удирдлагуудад хурал ирэх долоо хоногоос товлогдох юм байна.



    Сонгуулийн дараахан хэргийг нь сэргээн шалгасан Монголбанкны ерөнхийлөгч асан, Эдийн засаг хөгжлийн дэд сайд О.Чулуунбатын хэргийг АТГ-аас Нийслэлийн прокурорын газрын хяналтад шилжүүлээд сарын хугацаа өнгөрлөө. О.Чулуунбатыг Монголбанкны ерөнхийлөгчөөр ажиллаж байхдаа албан тушаалаа хэтрүүлэн ашиглаж, тус банкны Валютын газрын захирал Ч.Одонтуяатай нийлж, 11 тэрбум, Жорж Чайлмерстай хамтарч 35 тэрбум төгрөг завшсан хэрэгт буруутгаад байгаа юм.

    Тиймээс О.Чулуунбатад Эрүүгийн хуулийн 150.3-т заасан бусдыг завшиж, их хэмжээний хөрөнгө үрэгдүүлсэн, 264.2-т заасан төрийн албан тушаалтан эрх мэдлээ  хэтрүүлэн ашигласан гэх үндэслэлээр эрүүгийн хэрэг үүсгэсэн  юм. Хэрвээ гэм буруутай нь тогтоогдвол 264.2-т зааснаар тодорхой албан тушаал эрхлэх, vйл ажиллагаа явуулах эрхийг гурван жил хvртэл хугацаагаар хасч хєдєлмєрийн хөлсний доод хэмжээг 51-100 дахин нэмэгдvvлсэнтэй тэнцэх хэмжээний төгрөгөөр торгох, гурваас дээш зургаан cap хvртэл хугацаагаар баривчлах, эсхvл таван жил хvртэл хугацаагаар хорих ял, 150.3-т зааснаар эд хөрөнгийг хурааж, таваас дээш арван жил хүртэл хугацаагаар хорих ял шийтгэх аж. Түүний хэргийг тун удахгүй Нийслэлийн прокурорын газраас харьяаллын дагуу шүүхэд шилжүүлэхээр болжээ.