Өмнөд Судан улсад үүрэг гүйцэтгэж байсан монгол цэрэг суурь өвчний улмаас нас барсан хэмээн хэвлэлээр цацагдсан. Энэ талаар Зэвсэгт хүчний жанжин штабаас өнөөдөр албан ёсны мэдээлэл хийв. Энэ үеэр тус штабын дэд дарга, хошууч генерал Б.Баярмагнайгаас зарим зүйлийг тодрууллаа. -Амиа алдсан цэргийн талаар тодорхой мэдээлэл өгөхгүй юу?
-Өмнөд Судан улсад үүрэг гүйцэтгэж байсан анхны ээлжийн бүрэлдэхүүнээс Г.Мөнх-Эрдэнэ гэгч алба хаагч өвчний улмаас нас барсан харамсалтай хэрэг гарсан. Тэрээр Ховд аймгийн 123 дугаар ангид сумлагч жолоочийн албан тушаалд алба хааж байсан. Мөн өмнө нь Серелоны 2, 7 дугаар ээлжинд үүрэг гүйцэтгэсэн тэргүүний алба хаагч. 34 настай. Зэвсэгт хүчин 12 жил ажилласан алба хаагч.
-Яг хэзээ нас барсан юм бэ?
-Энэ сарын 13-нд зүрхний шигдээсээр гэнэт нас барсан. Тухайн үед талийгаач холын эргүүлд үүрэг гүйцэтгэж явсан. Тэрээр үүрэг гүйцэтгэж яваад тус өдрийн 03.30 цагт гэнэт таталт өгсөн байгаа юм. Тиймээс хамт үүрэг гүйцэтгэж байсан өрөөнийх нь ахлагч мэдэж, цэргийн багийн эмч нарыг дуудаж, эмнэлгийн анхны тусламж үзүүлсэн байдаг. Гэвч байдал дээрдэлгүй байсаар 04.45 минутад нас барсан байсан.
-Задлан шинжилгээ хийж үзсэн үү?
-Өмнөд Судан улсын орон нутгийн эмнэлэгт задлан шинжилгээ хийхэд зүрхний шигдээсээр нас барсан нь тогтоогдсон. Өөрөөр хэлбэл, цусанд нь бүлэгнэлт үүссэнээр зүрх судасны хурц дутагдалд орсон.
-Гадны нөлөө орсон байх магадлал бий юу?
-Гадны нөлөө байхгүй.
-Цогцсыг нь эх оронд нь авчирсан уу. Хэзээ нутаглуулах вэ?
-Талийгаачийн цогцсыг Туркийн Станбулаар дамжуулан өнгөрсөн бямба гаригт авчирсан. Ар гэрийнхнийх нь хүсэлтийн дагуу Ховд аймгийн Булган суманд өнөөдөр нутаглуулж байна. Манайхаас ажлын хэсэг томилогдон ажиллаж байгаа.
-Талийгаачийг суурь өвчтэй байсан гэх яриа байна?
- Офицер, ахлагч нарыг иж бүрэн үзлэг хийж явуулдаг. 12 төрлийн үзлэг хийдэг. Энэ үед ямар нэгэн эмгэг суурь өвчтэй хүмүүсийг ажиллагаанд явуулдаггүй. Ажиллагааны өмнөх бэлтгэлийн явцад сонгон шалгаруулалт хийж, эрүүл мэндийн үзлэгт хамруулдагийн дагуу талийгаачийг үзлэгт орсон. Тэрээр үзлэгээр эрүүл мэндийн хувьд тэнцсэн. Мөн нас барахынхаа өмнө холын эргүүлд гарсан. Тэр үед ч холын эргүүлд гарна гээд эрүүл мэндийн үзлэгт оруулахад ямар нэгэн өөрчлөлт байгаагүй. Гэнэт л зүрх судасны дутагдалд орж, зүрхний шигдээсээр нас барсан.
-Өмнө нь Серелонд хоёр ч удаа үүрэг гүйцэтгэж байсан байсан гэсэн?
-Серелон, Судан хоёр жаахан ялгаатай. Серелон бол ер нь жаахан чийглэг. Харин Судан бол маш хуурай. Тиймээс хүн маш их шингэн алдаж, цус өтгөрөх магадлал өндөр.
-Талийгаач гэр бүлтэй юу?
-Эхнэр нэг хүүхдийн хамт амьдарч байсан.
-Өмнө нь ийм тохиолдол гарч байсан уу?
-Үгүй. Өмнөд Судан улсад 850 алба хаагч алба хааж байснаас Г.Мөнх-Эрдэнэ ийнхүү зүрхний шигдээсээр нас барлаа. Харин Н.Цолмонбаатар гээд алба хаагч зүрх судасны өвчнөөр өвдсөн байсан. Тиймээс эргүүлэн эх оронд нь авчирч мэс засал хийлгэсэн. Одоо биеийн байдал нь хэвийн байгаа. Одоо Өмнөд Суданд 848 цэргийн алба хаагч, мөн манай штабын зургаан алба хаагч. Нийтдээ 854 алба хаагч үүрэг гүйцэтгэж байна.
-Талийгаач албан үүргээ гүйцэтгэж байгаад нас барлаа. Тэгэхээр түүний гэр бүлд нөхөн төлбөр олгох уу?
-Албан үүргээ гүйцэтгэж яваад амиа алдсан учраас 70 мянган доллар ар гэрт нь олгох журамтай.
Б.Чимэг
