ОХУ-тай төлбөр тооцоо хийх банк санхүүгийн байгууллагыг манай улсад оруулж ирэх асуудлын талаар Шадар сайд С.Амарсайхан мэдээлэл өглөө.

Тэрбээр "Манай улсын гадаад бодлогод хоёр хөрш оронтой харилцах харилцаа тэргүүлэх байр суурийг эзэлдэг. ОХУ, БНХАУ-тай иж бүрэн стратегийн түншлэлийн гэрээ хэлэлцээртэй улс.

Ямар ч тохиолдолд уламжлалт найрсаг харилцаагаа хадгалж, хоёр хөрштэйгөө харилцаагаа хөгжүүлэх, нөгөө талаараа гурав дахь хөрштэй найрсаг харилцаагаа өргөжүүлэх олон тулгуурт нээлттэй гадаад бодлогыг баримталж явдаг улс орон. Тийм учраас ямар ч тохиолдолд бид хоёр хөрш, тэр дундаа яригдаад буй ОХУ-тай худалдааны эргэлтээ нэмэгдүүлэх зайлшгүй шаардлага бий. Өнөөдөр хэдийгээр ОХУ манай улс хоорондын гадаад худалдааны эргэлт нэмэгдэж байгаа ч манай талд алдагдалтай гардаг. 

Бид жилдээ сая гаруй тонн бензин шатахуун авдаг. Түүний төлбөрт олон тэрбум төгрөг, доллар төлдөг. Эргээд хөдөө аж ахуйн бараа бүтээгдэхүүнээ экспортлоход манай талд хангалтгүй байгаа. Иймд экспортоо нэмэгдүүлэх, импортоо зохистой байлгах, гадаад худалдааны тэнцвэртэй байдлаа хангах нь манай улсын үндэсний эрх ашгийн асуудал. 

Банк санхүүгийн байгууллагатай холбоотой яригдаж буй асуудлыг хэлэхэд, мөнхийн хоёр хөрш оронтой хийсэн яриа хэлэлцээр, гадаад дотоод үйл ажиллагаатай холбоотой бодлогыг гуйвуулсан, хоёр хөрштэй хагаралдуулах гэсэн зохион байгуулалттай ажил явж байгаа. 

Банк санхүү гэдэгт төлбөр тооцооны асуудал яригдаж байгаа. Бензин шатахуун, экспорт, импортын төлбөр тооцоог аль болох хэвийн хийж байгаа ч удаашралтай байна. Учир нь ОХУ-ын зарим банк санхүүгийн байгууллага олон улсын хоригт орсонтой холбоотой манайхаас хийж буй бензин шатахууны төлбөр тооцоо удаашралтай хийгдэж байна. БНХАУ-ын банкаар дамжуулж хийж буй асуудал байгаа ч төвөгтэй нөхцөл байдал үүсгэж байна. Бизнес, аж ахуйн нэгжүүд үйл ажиллагаагаа явуулж, ашиг орлогоо нэмэгдүүлэхийн тулд аль аль хөрштэйгөө худалдаагаа үргэлжлүүлнэ. 

Үүнтэй холбоотойгоор банк санхүүгийн төлбөр тооцоо хийхэд нь манай Төв банк болон Засгийн газрын зүгээс анхаарч байгаа. Бид аль болох шинэ гарц гаргах, ямар нэгэн хориг саадад ороогүй банк санхүүгийн байгууллагуудын салбарыг хооронд нь харилцуулна. 

Төрийн банкнаас бусад нь хувийн банк. Хувийн банкнуудын үйл ажиллагаанд бид шууд оролцох боломж нөхцөл байхгүй. Орос, Монголын Засгийн газрын Монголын талын ажлын хэсгийг ахалж байгаагийн хувьд бол хоёр улсын хооронд хийгдэж байгаа төлбөр тооцооны хүндрэл бэрхшээлийг хялбарчлах тал дээр анхаарна. Энэ бол Засгийн газрын түвшинд байнга яригдаж байгаа асуудал.

Хэрэв бид төлбөр тооцоогоо хийж чадахгүй нөхцөл байдал үүсвэл бензин шатахуунаа авах асуудал хойшилж, удааширна. Аль болох хэвийн зохион байгуулалтыг хийх тал дээр анхаарч буй асуудал юм.  Үүнийг зориуд мушгин гуйвуулах шаардлага байхгүй гэдгийг би хэлье. Цаашдаа ч Монгол улс хоёр хөрштэйгөө болон гуравдагч орнуудтай найрсаг харилцаатай байна. Энэ бол манай улсын язгуур эрх ашиг " гэв.