“Намнаа” клубийн морьт харвааны тамирчин Г.Жавзандуламтай ярилцлаа.

-Танд энэ өдрийн мэндийг хүргэе. Уншигчдад өөрийгөө танилцуулахгүй юу? Бага насаа хаана өнгөрүүлж байсан бэ?

-Сайн байна уу? Намайг Г.Жавзандулам гэдэг. Морьт харваагаар хичээллэдэг мөн багш дасгалжуулагчаар ажилладаг.  Бага насаа Булган аймагт хөдөө өнгөрүүлсэн боловч морьноос маш хол хөндий хүүхэд байсан.

- “Намнаа” клубд ороод хэр удаж байгаа вэ?

-Морьт харваагаар хичээллээд тав дахь жилдээ орж байна. Тэгэхээр “Намнаа” клубд ороод таван жил болж байгаа юм байна.

-Анх яагаад морьт харваагаар хичээллэх болов? Гэр бүлийн зүгээс эсэргүүцэх зүйл байсан уу?

-Анх Намнаагийн пэйж хуудас руу ороод морь унаад, нум сумаар харваж байгаа хүмүүсийн бичлэгийг үзээд маш их бахархах сэтгэл төрсөн. Цаанаасаа огшсон мэдрэмж авсан гэх үү дээ. Тэгээд л тэр пэйсбүүк хаягийг дагаад байнга бичлэг зургуудыг нь хардаг байсан. Ойролцоогоор дөрвөн сарын дараа элсэлтээ зарласан байгааг нь хараад л шууд бүртгүүлсэн. Гэр бүлийн зүгээс гэвэл хүсэл сонирхлыг минь хориглодог хүмүүс биш болохоор эсэргүүцсэн зүйл байгаагүй. 

-Морьт харваа эмэгтэй хүнээс их тэсвэр, тэвчээр шаарддаг шүү дээ. Таны хувьд энэ спортын хүнд хэцүү зүйлийг юу гэж хардаг вэ? 

-Икстрим спорт гэдэг утгаараа маш их хурд хүч авхаалж самбаа шаарддаг.

Эмэгтэй тамирчид тэр тусмаа хоёр дахин илүү хичээх хэрэгтэй.  Учир гэвэл, энэ спорт бол хүйс хамааралгүй өрсөлддөг спорт.

Чи энэ спортоор хичээллэж байгаа л бол бүх тамирчинтай л өрсөлдөнө гэсэн үг. Жилдээ нэг удаа болдог улсын аварга дээр л эмэгтэй төрөл гэж бий.

-Өвлийн улиралд морин дээр бэлтгэл хийдэг үү?

-Өвлийн улиралд газраас бэлтгэлээ хийгээд тавдугаар сараас морин дээрх бэлтгэлээ эхэлдэг.

-Морьт харваа болон үндэсний сурын харваа хоорондоо хэр ялгаатай байдаг вэ?

-Мэдээж морьтой, морьгүй гэдгээрээ ялгаатай. Үүнээс гадна сурын харваа бол тэвчээр хатуужил шаарддаг. Харин морьт харваа тэвчээр хатуужил дээр нэмээд авхаалж самбаа шаарддаг спорт.

-Морьт харваа таны үндсэн ажил уу? Хажуугаар нь өөр ажил хийдэг үү?

-Анх бол морьт харваагаар хичээллэж эхэлж байхдаа сонирхол гэдэг утгаараа ажлынхаа хажуугаар хичээллэдэг байсан.

Одоо бол бүрэн морьт харваагаараа хичээллэж, мөн багшилдаг.

Гэхдээ дан ганц морьт харваагаар хичээллэж ажиллах гэхээр улирлын чанараас болоод намар өвөлдөө өөр ажил хийдэг. Тухайлбал, өөрийн сонирхолоор арьсан эдлэл хийж эхэлж байгаа.

-“Намнаа” клубд эрэгтэй тамирчид  давамгай байдаг уу? Эмэгтэй тамирчид хэр их байдаг вэ?

-Хүчний икстрим спортод ордог болохоор эрэгтэй тамирчид голцуу байдаг. Манай “Намнаа” клубд бол дийлэнх хувь нь эмэгтэй тамирчид бий.

-Уг спортоор гаргаж байсан амжилтуудаа бидэнтэй хуваалцахгүй юу?

• 2022 оны Улсын аваргын эмэгтэй төрөлд гуравдугаар байр,
• 2023 оны гуравдугаар байр,
• 2024 оны хоёрдугаар байрт орж байсан.

- Энэ спортоор анхлан суралцаж буй хүмүүст зориулж анхааруулж хэлэх зүйл бий юу?

-Сонирхдог хүмүүс их байдаг ч хичээллэе гээд ирдэг нь цөөхөн байдаг. Учир нь би чадах болов уу яах бол гэсэн айдсаасаа болоод хичээллэж чаддаггүй. Тэгэхээр тэр хүмүүстээ хандаж хэлэхэд ганц удаа зориг гаргаад ирээд хичээллээд үз.  Тэгээд л цаашаа өөрөө дурлаад л эхэлнэ. Хүсэл сонирхолоо дагаж амьдраарай. Хэчнээн хэцүү зүйл байсан ч хүн дуртай зүйлээ жаргаж хийдэг шүү гэж хэлмээр байна.

- Ярилцсанд баярлалаа.

Г.Хоролмаа