Монгол Улсын Засгийн газрын шийдвэрээр Ойрхи Дорнодын орнуудад байгаа эх орондоо буцах хүсэлтэй Монгол Улсын иргэдийг эх оронд нь ирүүлэхээр Арабын Нэгдсэн Эмират Улсын Дубай хотын Эль-Мактум олон улсын нисэх онгоцны буудлаас хөөрсөн МИАТ ХК-ийн ОМ904 дугаар тусгай үүргийн нислэг Улаанбаатарын цагаар 2026 оны 3 дугаар сарын 11-ний өдрийн 04:55 цагт Чингис Хаан олон улсын нисэх онгоцны буудалд амжилттай газардлаа.
Арабын Нэгдсэн Эмират Улсын Засгийн газар манай улсын иргэдийг Дубайгаас нисэхэд аюулгүй байдлыг хангаж, онцгой анхаарал тавьж ажилласан бөгөөд уг тусгай үүргийн нислэг нь БНХАУ, Бангладеш, Оман, Энэтхэг, Мьянмар, Эмират зэрэг улсын агаарын орон зайгаар дамжин үйлдэгдсэн.
Монгол Улсын иргэдийг эх оронд нь аюулгүй ирүүлэхэд шуурхай дэмжлэг үзүүлж, нягт хамтран ажилласан эдгээр улсын Засгийн газарт Монгол Улсын Засгийн газрын нэрийн өмнөөс талархал илэрхийлж байна.
Ойрхи Дорнодын бүс нутагт байгаа Монгол иргэдийг эх оронд нь аюулгүй ирүүлэх ажлыг Гадаад харилцааны яамны Шуурхай ажлын хэсэг, Монгол Улсаас Арабын Нэгдсэн Эмират Улс, Кувейт Улс, Арабын Бүгд Найрамдах Египет зэрэг улсад суугаа Элчин сайдын яамд болон Зам тээврийн яам, МИАТ ХК-тай хамтран түргэн шуурхай, амжилттай зохион байгуулав.
Ийнхүү энэ удаагийн Улаанбаатар-Дубай-Улаанбаатар чиглэлийн тусгай үүргийн нислэгээр бүс нутагт байсан Монгол Улсын 91 иргэн эх орондоо эсэн мэнд ирлээ.
