1.     М.Энхсайхан 1955 онд Улаанбаатар хотод Г.Мэндсайханы гэр бүлд төржээ.

2.    1973 онд 10 жилийн нэгдүгээр дунд сургуулийг дүүргэсэн бөгөөд ер нь хичээлдээ сайн, тэр дундаа математикийн хичээлдээ “гавал” байсан хүү байжээ.

3.    10 дугаар ангид байхдаа Олон улсын математикийн олимпиадад оролцож хүрэл медаль хүртэж байв.

4.    Дунд сургуулиа төгсөөд 1978 онд Украйн улсын Киев хотын улсын их сургуульд олон улсын эдийн засагч мэргэжлээр сурч төгссөн. Москва хотод энэ чиглэлээр докторын зэрэг хамгаалсан.

5.    Орос, англи хэлтэй. АНУ, Япон, Германд мэргэжил дээшлүүлсэн.

6.   Түүний аав Г.Мэндсайхан нь Дорнод аймгийн хүн бөгөөд яруу найрагч, зохиолч Ц.Дамдинсүрэнтэй нэг нутаг, хошууных. Угаас эрдэм номд мундаг хүн бөгөөд БНМАУ-ын Гэгээрлийн яамны орлогч сайдаар ажиллаж байсан билээ.

7.     Харин түүний ээж М.Алтанцэцэг бол хүүхдийн эмч мэргэжилтэй. Сүхбаатар аймгийн Дарьганга нутгийн уугуул. М.Энхсайхан ээжтэйгээ илүү адилхан.

8.    М.Энхсайханы гэргийг Э.Шүрэнцэцэг гэдэг. Тэд ижил мэргэжилтэй бөгөөд Киев хотод суралцаж байхдаа танилцаж байжээ. 

9.    М.Энхсайханых хоёр хүүхэдтэй. Түүний охиныг Э.Хонгорзул гэдэг. Тэрээр АНУ-ын Хьюстон хотын их сургуулийг санхүүч, нягтлан бодогчийн мэргэжлээр төгссөн бол хүү Э.Батзул нь Англид маркетингийн чиглэлээр суралцаж төгссөн.

10.  Түүний хадам аав Т.Эрэнжав нь  VIII Богд Жавзандамбын өргөмөл хүү байсан гэдэг.

11.  1978-1988 онд Гадаад худалдааны яаманд эдийн засагч, эрдэм шинжилгээний ажилтан, газрын орлогч дарга, 1989-1990 онд Зах зээл судлалын хүрээлэнгийн захирлаар ажиллаж байв.

12.  Тэрээр 1990 онд Ардчилсан хувьсгалыг байгуулцаж явсан залуусын нэг.

13.  Тэр жагссаныхаа хүчинд 1990-1992 онд АИХ-ын депутат, Улсын Бага Хурлын гишүүнээр ажиллах эрхээ олж авсан юм.

14.  Хамгийн анх 1992 онд УИХ-ын гишүүн болж парламентад сууж байв.

15.  1992 онд Америкийн Бүгд найрамдахчуудын хүрээлэнгээс Монголын дөрвөн залууг Олон улсын залуу лидерүүдийн хөтөлбөрт урьж оролцуулсан юм. Тэр нь С.Зориг, Да.Ганболд, Э.Бат-Үүл, М.Энхсайхан нар байлаа.

16.  1992-1993 онд Ерөнхийлөгчийн тамгын газрын даргаар ажиллаж байв. Энэ үед Монголчуудын тусгаар тогтнолын бэлгэдэл, эрхэм шүтээн Мэгжиджанрайсиг бурхныг анхны ерөнхийлөгч П.Очирбатын зарлигаар сэргээн босгосон билээ.

17.  1996 оноос 1998 он хүртэл М.Энхсайхан МУ-ын 18 дахь ерөнхий сайдаар томилогдон ажилласан юм.

18.  2003 оноос Ардчилсан намын даргаар ажиллах болсон юм. Нэгэн цагт АН-ын даргаар ажиллаж байсан М.Энхсайхан одоогоос долоон жилийн өмнө Ардчилсан намын хаалгыг савж гарахдаа “Хэзээ ч би энэ намын босгоор алхахгүй”, “Энэ нөхөдтэй хойшид хамтрахгүй” хэмээн ярьж явсан юм.

19.   Тэрээр 2005 оны Монгол улсын ерөнхийлөгчийн сонгуульд нэр дэвшээд ялагдаж байв. Түүнийг ялсан хүн нь өнөөгийн дуулиан шуугианы эзэн Н.Энхбаяр юм.

20.  2006 онд АН-аас гарч  Үндэсний Шинэ Намыг байгуулан 2007 он хүртэл анхны даргаар ажилласан. 2011 онд тус нам нэрээ Монгол Үндэсний Ардчилсан Нам болгон солиход даргаар нь сонгогдож ажиллаж байна.

21.  Түүний тэргүүлдэг МҮАН-МАХН-тай нэгдэж эвсэл байгуулсан. Одоо МҮАН-аас намаа төлөөлөн УИХ-д М.Сономпил, Г.Уянга, Д.Батцогт нар сууж байна.

22. Шинэчлэлийн засгийн газар байгуулагдах үед түүнийг сангийн сайдаар томилогдоно гэсэн таамаг байсан ч МАХН-МҮАН-ны зөрчлөөс болж М.Энхсайханы оронд Ч.Улаан томилогдсон юм. Үүнээс хойш М.Энхсайхан МАХН-д сэтгэл татагдахаа больсон гэдэг.

23.  М.Энхсайханы нам МАХН-тай нэгдэж хамтарч тэмцэж явсан ч Н.Энхбаярыг дөрвөн жилийн хорих ялаар шийтгүүлж, биеийн байдал хүндхэн эмнэлэгт эмчлүүлж байхад шийтгүүлсэн нь зөв хэмээн хэвлэлээр дуугарсан юм. Энэ нь бас л сангийн сайдын суудлын төлөөх сөргөлдөөний дараагаар яригдсан яриа юм.

24.  Үүний дараагаар М.Энхсайханыг МТЗ-ын газрын даргаар томилсон боловч өчигдөр үүрэгт ажлаас нь чөлөөлсөн юм. Ийнхүү ажлаас халагдах болсон гол шалтгаан нь Үйлдвэр хөдөө аж ахуйн сайд Х.Баттулгатай үл ойлголцлоос болсон гэж зарим эх сурвалжууд хэлж байна.