Авлигатай тэмцэх газраас албан тушаалтнуудын хувийн ашиг сонирхлын мэдүүлэг болон хөрөнгө, орлогын 2012 оны мэдүүлгийг шинэчлэн бүртгэх ажлыг улсын хэмжээнд 2013 оны нэгдүгээр сарын 01-ний өдрөөс 02 дугаар сарын 15-ны хооронд 45 хоногийн хугацаанд зохион байгуулж, төрийн захиргааны төв болон нутгийн захиргааны 110 байгууллагын мэдүүлгийн бүрдүүлэлтийн тайлан мэдээг 2013 оны 03 дугаар сарын 01-ны дотор цаасаар болон цахим хэлбэрээр гаргуулан авч нэгтгэлээ.
   
Авлигатай тэмцэх газарт хувийн ашиг сонирхлын мэдүүлэг болон хөрөнгө, орлогын мэдүүлгээ мэдүүлбэл зохих 255 албан тушаалтан 100 хувь мэдүүлгээ гаргаж бүртгүүлсэн байна.
    Улсын хэмжээнд 47000 орчим мэдүүлэг гаргагч бүртгэгдсэнээс 99.97 хувь нь цаасаар болон цахим хэлбэрээр мэдүүлгээ бүртгүүлжээ. Үүнээс 22 мэдүүлэг гаргагч хугацаа хожимдуулж мэдүүлсэн, 15 мэдүүлэг гаргагч мэдүүлгээ огт гаргаж өгөөгүй байна.   

    Мэдүүлгээ гаргаж өгөөгүй, хугацаа хожимдуулсан мэдүүлэг гаргагчдаас  төрийн захиргааны албан тушаалтан 4, аймаг, сум, дүүргийн Иргэдийн төлөөлөгчдийн хурлын төлөөлөгч 16, улс төрийн /Улсын Их Хурлын гишүүний бие төлөөлөгч/ албан тушаалтан 8, төрийн үйлчилгээний байгууллагын удирдах албан тушаалтан 7, төрийн өмчит хуулийн этгээд, төрийн бус байгууллагын удирдах албан тушаалтан 2 байна.

    Энэ жилийн мэдүүлгийн бүрдүүлэлтийн хувьд албан тушаалтнуудаас мэдүүлгийг цаасаар гаргуулж авахаас гадна цахим хэлбэрээр хамт авч байгаагаараа нилээд онцлогтой байна.


2013 оны эхний 2 сарын байдлаар нийт 78 албан тушаалтны хувийн ашиг сонирхлын мэдүүлэг, хөрөнгө, орлогын мэдүүлгийг иргэд, байгууллагын өргөдөл, гомдлын дагуу шалгалаа.
Дээрх шалгалтын хүрээнд нийт 18 албан тушаалтанд хариуцлага тооцуулснаас 2 албан тушаалтанд сануулах, 9 албан тушаалтанд сарын цалинг 30 хүртэл хувиар бууруулах, 4 албан тушаалтанд албан тушаал бууруулах, 2 албан тушаалтныг ажлаас халах арга хэмжээг тооцуулсан байна.
Мэдүүлгийн хяналт шалгалтын байдлаас үзэхэд мэдүүлэг гаргагчид Авлигын эсрэг хууль тогтоомж, УИХ-ын Хууль зүйн байнгын хорооноос баталсан “Хөрөнгө, орлогын мэдүүлгийн маягт, түүнийг бүртгэх, хадгалах журам”-д заасны дагуу мэдүүлж хэвшиж байгаа боловч зарим албан тушаалтнуудын хувьд хөрөнгө, орлогоо мэдүүлэхгүй байх, орхигдуулах, хөрөнгө, орлогын эх үүсвэрийг хангалтгүй тайлбарлах зэрэг зөрчил түгээмэл байна.


    2013 оны 03 дугаар сарын 01-ний байдлаар Нийтийн албанд томилогдохоор нэр дэвшсэн 2774 этгээдийн хувийн ашиг сонирхлын урьдчилсан мэдүүлгийг хүлээн авснаас 2279 этгээдийн мэдүүлгийг хянаж холбогдох хариуг Авлигатай тэмцэх газраас хүргүүлээд байна.

        Нийтийн албанд томилогдохоор нэр дэвшсэн 10 гаруй этгээд тухайн албан үүргийг хэрэгжүүлэхэд илт ашиг сонирхлын зөрчил үүсэх нөхцөл байдал тогтоогдсон тул энэ талаарх дүгнэлтийг холбогдох байгууллагад хүргүүлсэн. Дээрх этгээдийг томилох эрх бүхий байгууллага ашиг сонирхлын зөрчил үүсэх нөхцөл байдал бий болсон тул тухайн албан тушаалтныг томилохоос татгалзах үүрэгтэй.

    Хянаж хариу хүргүүлсэн 2279 этгээдийн урьдчилсан мэдүүлгээс Ашиг сонирхлын зөрчил үүсэж болохуйц нөхцөл байдлыг тогтоосон, анхааруулсан нийт 120 хянах боломжгүй үндэслэлээр 250  мэдүүлгийг буцаан хүргүүлсэн байна.