Энэ долоо хоногт болсон түмэн үйл явдлуудаас онцолж байна.

Долоо хоногийн онцлох үйл явдал: Ерөнхий сайд алга болов

24 цаг сайт долоо хоногийн онцлох үйл явдлаар Ерөнхий сайд Н.Алтанхуяг цасан шуурганы улмаас Бурхан халдун уулнаас бууж чадахгүйд хүрсэн явдлыг нэрлэж байна. Өнгөрсөн бямба гарагт эхэлсэн Ерөнхий сайдын ууланд авиралтын тухай шуугиант мэдээллүүд энэ долоо хоногийн турш тасарсангүй. Түүнтэй хамт дэндүү олон хүн явсан, тэднийг аврахад 85 сая төгрөг зарцуулсан, хэн хэн хамт явав, юугаа хөлдөөв, хэрхэн аврав зэрэг мэдээлэл хэвлэлүүдийн халуун сэдэв болов. Ерөнхий сайдтай хамт явсан 60 гаруй хүний дунд түүний гэргийн, хүү болон АН-ын бүлгийн дарга Ч.Сайханбилэг нар явсан нь тодорсон. Н.Алтанхуяг хацраа, Ч.Сайханбилэг хөл, гараа хөлдөөсөн тухай мэдээлэл ч гарсан. Ерөнхий сайдыг аврахад гурван нисдэг тэргэнд л гэхэд 85 сая төгрөг зарцуулсан хэмээсэн ч нийт 14 сая 445 мянган төгрөгийн зардал гарчээ гэж Засгийн газрын Хэвлэл мэдээлэл, олон нийттэй харилцах албанаас мэдэгдэл хийсэн. Зарим хүмүүс улсынхаа Ерөнхий сайдыг аврахад 85 сая төгрөг юу ч биш гэж үзэж байгаа бол зарим нь энэ их ажлын хажуугаар тийм олон хүн дагуулан уул руу явж, цасанд боогдсоны улмаас их хэмжээний мөнгө үрнэ гэдэг хувь заяагүйн хэрэг гэцгээж байна. Өчигдөр түүнтэй хамт явсан JCI байгууллагын ажилтнууд тэргүүтэй залуус улсыг хохиролгүй болгож 14 сая төгрөгөө явсан хүндээ хувааснаар Ерөнхий сайдаас гадна хүн бүр 250 мянган төгрөг төлнө гэж мэдэгдсэн нь бас л шуугиан болсон.

Долоо хоногийн онцлох улс төрийн үйл явдал: Ерөнхий сайдыг огцруулах санал өргөн барив

Улс төрийн хүрээнд Турк улсын Ерөнхий сайд манайд айлчилсан, Ерөнхийлөгчийн сонгуулийн тов, төсвийг батласан, Улсын дээд шүүхийн шүүгчдийг томилсон гээд олон үйл явдал боллоо. Гэхдээ эдний дундаас онцгойрсон үйл явдал нь мөн л Ерөнхий сайдтай холбогдож байна. Чуулганы өдрөөс эхлээд шинэчлэлийн Засгийн газрыг эрс буруутгах болсон МАН-ын удирдлагууд Н.Алтанхуягийг огцруулах саналаа зургаан үндэслэл, УИХ дахь МАН-ын бүлгийн 25 гишүүний гарын үсгийн хамт өчигдөр УИХ-ын дарга З.Энхболдод өргөн барьсан. УИХ-ын дарга З.Энхболд огцруулах хүсэлтийг ирэх долоо хоногт Төрийн байгуулалтын байнгын хороо, улмаар чуулганы нэгдсэн хуралдаанаар хэлэлцэнэ хэмээсэн юм.

Долоо хоногийн харамсал: Хүний эрх

Энэ долоо хоногт хүний аюулгүй амьдрах эрх баталгаажаагүйн улмаас эрдэнэт амиа алдсан харамсалтай үйл явдлууд гарлаа. Агаарын бохирдлыг бууруулах төслийн зуухыг худалдан авсан айлын нэг гишүүн гэртээ амарч сууж байгаад л зуух дэлбэрсний улмаас амиа алдав. Дархан-Уул аймагт гурван хүүхэд гэртэйгээ хамт шатсаныг хотын буруу тохижилттой холбон тайлбарласан. Тэдний алтан амины үнэ цэнийг хэн төлөх вэ? Хүүхдийн эрх, хүний амьдрах аюулгүй орчны асуудлыг нухацтай хэлэлцэх цаг болсныг эдгээр үйл явдлууд харууллаа.

Долоо хоногийн онцлох мэдэгдэл Н.Номтойбаярынх

Онцлох мэдэгдлийн эзнээс УИХ-ын гишүүн Н.Номтойбаяр шалгарлаа. Төрийн тусгай хамгаалалттай газар баавгай агнасан гэх хэргээр шалгагдаж байгаа тэрээр энэ асуудалд яагаад холбогдсон талаараа албан ёсоор мэдэгдэл хйисэн. Мөн Ерөнхий сайд Н.Алтанхуяг төөрсний дараа “Норовын хүүд Бурхан халдун томдоно шүү дээ. Зуун мод явахад таардаг жижиг дов руу гарахгүй дээ” хэмээн хэлсэн нь бас л онцлох мэдэгдэл боллоо.

Онцлох фото: Төөрсөн нь

Онцлох үйл явдлын эзэн болсон Ерөнхий сайдын нийтэлсэн зураг онцлох фотогоор шалгарч байна. Тэрээр Бурхан халдун ууланд авирч байгаагаас өгсүүлээд аврагдах хүртэл ганц биш 20-иод зураг нийтэлсэн нь “Төөрсөн нь” гэдэг фото эссе байв.

Ийнхүү энэ долоо хоногийн ихэнх онцлохуудтай холбогдсон Ерөнхий сайд Н.Алтанхуягийг 24 цаг сайт долоо хоногийн үйл явдлын "баатар"-аар нэрлэж байна.