Хүн зодсон хэргээр цагдаад шалгагдаж буй хэмээн сар гаруйн өмнө хэвлэлд бичигдсэн ч энэ нь ташаа болох нь нотлогдсон “Камертон” хамтлагийн дуучин Мэнд-Амар буюу Мээдээгийн тухай  яавч ташаа бус нэг мэдээ олдов. Хамтлагийнхнаасаа эхнэр авалгүй ганцаар хоцроод байсан Мээдээ дөрвөн жилийн өмнө нэгэн бүсгүйтэй тоонот гэрт толгой холбосон юмсанжээ. Өөрөөс нь дөрөв дүү Есүй хэмээх тэр бүсгүй олны танил дуучин Лхамаагийн төрсөн дүү аж. Японд суралцаж боловсрол эзэмшсэн, нийслэлийн дэгжин хээнцэр, царайлаг нуруулаг бүсгүйчүүдийн нэг хэмээгдэн хүрээндээ нэлээд нэр олсон энэ сайхан бүсгүй өмнө нь аварга О.Балжиннямын хүүтэй сууж байсан бөгөөд Мээдээтэй нийлээд удалгүй хөөрхөн охин гаргаж өгчээ. Хуучнаар “Солонго” рестораны дэргэд брэнд хувцасны дэлгүүр ажиллуулж, олсон орлогоороо амьдралаа товхийтэл авч явсан энэ бүсгүй өнөөдөр хоёр хүүхэдтэйгээ түрээсийн байранд амьдарч байна.

   Саяхан болтол л хүний царай харахааргүй, орон сууц, машин унаанаас авахуулаад юм юмтай хангалуун сайхан аж төрж байсан Есүйн өнөөдөр ийм байдалтай байгаа нь ханилсан нөхөр Мээдээгийнх нь увайгүй зангаас болсон гэдгийг сайхь бүсгүйн ойр дотнынхон төдийгүй, сонирхол болоод ахуйн нэгэн хүрээнд багтдагаараа амьдрал байдлыг нь нэгд нэггүй мэддэг зиндаа дээгүүр хотын залуучууд захаас аван баталж байгаа юм. Юу гэвэл мань Мээдээ ханилсан эхнэрийнхээ хэдэн жил хурааж цуглуулсан мөнгийг арга хэрэглэж авч дуусгаад нэгмөсөн хаяж одсон гэнэ. Хоёр гурав хувааж авсан мөнгө нь 30 сая төгрөгт хүрсэн бөгөөд хань нөхөртэйгээ гэрээ бичиг үйлдэж, буцаах төлүүлэх хугацаа тов тогтоогүйгээрээ “буруудсан” бүсгүй өнөөдөр мөнгө ч үгүй, нөхөр ч үгүй, хүүхдээ тэврээд хоцорчээ.

   Нөхрийгөө төрийн одон медаль хүртэхийг нь зурагтаар л үзсэн Есүй түүний барааг хамгийн сүүлд харсан нь Мээдээ машинаа авахаар өнгөрсөн жил нэг ирэхэд нь байв. Мөнгөө алдсан бүсгүй цагдаа цуухад хандая ч гэсэнгүй, бизнесээ унагачихгүйг хичээн ХЗХ-нд байраа барьцаанд тавьж зүтгэсэн боловч өндөр хүүтэй зээлийн дарамтыг дийлэлгүй алдан орох оронгүй болжээ. Мээдээ Ц.Мянганбаярын “Монгол газар” компанийн барилгын салбарын охин компанийнх нь захирал хэмээн өөрийгөө бусдад танилцуулдаг боловч түүний хувьд нэгэн үе хамтлагийнх нь гол ивээн тэтгэгч явсан Ц.Мянганбаяртай яг ийм холбоотой нь баттай бус, харин “Камертон”-ы бусад гишүүн тухайлбал,  Д.Болд, Эба нар нь “Монгол газар”-ын хөрөнгөн дээр суурилсан буюу Ц.Мянганбаяртай хамтарсан бизнесээ урагштай сайхан авч явж, угаас сайн нэрээ улам сайнаар гаргаж буйг монголчууд нийтээр бахдан харж байгаа билээ.

   Ямар ч байсан “Камертон” нэрээр монгол түмний хайрыг хүлээсэн дөрвөн сайхан хөвгүүний нэг Мээдээгийн тухай мэдээ өнөөдрийн байдлаар ийм л байна. Эхнэр авсан, үрийн зулай үнэрлэсэн, хаяад явсан, явахдаа өртэй явсан, өрийнх нь хэмжээ ийм. Эхнэр нь түүнийг хайрлаж суусан, үрийг нь төрүүлсэн, тэврээд хоцорсон, авлагатай үлдсэн, авлагынх нь хэмжээ тийм.