Сангийн яамны сайд Ч.Улаан өнөөдөр сэтгүүлчидтэй уулзаж ажлаа тайлагналаа. Тэрбээр "Төсвийн хүрээнд хийгдэх шинэчлэл нь Засгийн газрын суурь бодлого байх ёстой. Төсвийн алдагдал 600 тэрбум төгрөгт хүрч, инфляцийн түвшин 15 хувьд хүрсэн ийм л үед бид Засгийн газрын ажлаа даруухан эхэлж байсан. Биднийг ажил авах үед Хүний хөгжил сан гэхэд 1.1 их наяд төгрөгийн өртэй байсан.  Ийм гараанаас манай Засгийн газар ажлаа эхэлсэн юм. Харин одоо шинэчлэлийг эхлүүлсэн. Бэлтгэлээ хангачихсан. Зөвхөн орлогоо төвлөрүүлж, зарцуулалтад хяналт тавих үүргээ хүлээх л үлдлээ” гэдгийг онцоллоо. 

Засгийн газарт нийт 40 гаруй тусгай сан байдаг байна.  Гэтэл энэ сангуудын явцуу үйл ажиллагаанаас болж төсөвт нэлээд дарамт ирдэг байсан.  Тиймээс энэ сангуудыг гурван ангилалд хувааж, тоог нь багасгах, заримынх нь үйл ажиллагааны хэлбэр, чиглэлд өөрчлөлт оруулж, данс болгох зэргээр шинэчлэхээр зэхэж байгаа аж. Мөн Монгол Улс өнөөдрийн байдлаар нийт 9,8 их наяд төгрөгийн өртэй байгаа бөгөөд сангийн яам хөрөнгө оруулалтыг нэмэгдүүлэх, өрийг барагдуулахаар зорилго тавин ажиллаж байгаа гэнэ.

Өнгөрсөн нэгдүгээр улирлын байдлаар Сангийн яамны орлого төвлөрүүлэлтээс хөрөнгө оруулалтын орлого төвлөрөлт муу байсан байсан гэлээ. Хөрөнгө оруулалт буурсан уу гэвэл буурчээ. Тухайлбал, 2010 онд 1,6 тэрбум доллар байсан бол 2011 онд 4,6 тэрбум доллар болж нэмэгдсэн ч 2012 онд 3,8 тэрбум ам.доллар болж буурсан үзүүлэлттэй байна.  Хөрөнгө оруулалт яагаад буурсан бэ гэдгийг Сангийн яамнаас судалсан байна. Хөрөнгө оруулалт яагаад буурсан талаар Сангийн сайд Ч.Улаан “Гадаадын хөрөнгө оруулалт буурсан. УИХ-ын сонгуулийн өмнө нь баталсан Хөрөнгө оруулалтын тухай хуулиас болж хөрөнгө оруулалт буурсан гэдэг бол ташаа ойлголт. Шинэчлэлийн Засгийн газар харилцан ашигтай байх зорилт дэвшүүлэн ажиллаж байгаа. Хамгийн тод жишээ Оюутолгой. Энэ гэрээ Монголын ард иргэдэд нэн ашиггүй гэрээ болсон. Үүнийг маш олон эх үүсвэрээр нотолсон байгаа. Шинэчлэлийн Засгийн газрын бодлого буюу харилцан ашигтай байх гэрээг хүлээн зөвшөөрөхгүй байгаа хөрөнгө оруулагчид бидэнд хэрэггүй гэж бодож байна” гэлээ.

Оюутолгойн Хувь нийлүүлэгчдийн хурал үргэлжилж байгаа. Өнөөдрийн байдлаар Оюутолгойн хөрөнгө оруулалтын зардал хоёр тэрбум төгрөгөөр хэтэрсэн тухай албаны хүмүүс мэдээлж байгаа. Тэгвэл Хувь нийлүүлэгчдийн хурлаар хамгийн сүүлд Оюутолгойн төсөл дээр гарсан бүх хөрөнгө оруулалтын зардлын дэлгэрэнгүй санхүүгийн баримтыг нэ бүрчлэн гаргаж баталгаажуулахаар болжээ.

Энэ талаар Сангийн сайд Ч.Улаан хэлэхдээ “Анх байгуулагдснаас эхлээд хаанаас ямар үнээр ямар тоног төхөөрөмж авсан гэх  мэдээ тайлан байхгүй байсан. Тийм учраас өнөөдөр хөрөнгө оруулалтын зардал хоёр тэрбумаар хэтэрчихээд бид учрыг нь мэдэхгүй сууж байгаа. Ингээд монголын Засгийн газраас Оюутолгойд баримтын шалгалт хийх ажлын хэсэг гарсан.

Манай Сангийн яамнаас Эрсдлийн удирдлагийн газрын даргаар ахлуулан ажиллаж байгаа. Оюутолгой компани Олон улсын зөвлөх компани урьсан. Одоо ингээд бүх санхүүгийн баримтуудыг нэг бүрчлэн үзэж байна. Бүх санхүүгийн баримтуудын нэг бүрчлэн үзээд баталгаажуулсны дараа үргүй зарсан, хэтрүүлсэн гэсэн маргааныг тасална” гэлээ. Ийнхүү монголын талаас Оюутолгой компанийн үйл ажиллагаанд хяналт тавих эрхээ хэрэгжүүлж эхэллээ.

 Мөн салбарын сайдын энэ үеэр сэтгүүлчдэд өгсөн бас нэгэн мэдээлэл бол Оюутолгойн гол гол бодлогын хэрэгжилтийг зохион байгуулдаг газар, хэлтсийн орлогч даргаар Монгол хүнийг ажиллуулъя гэдэг дээр тохиролцоод байгаа тухай юм.

УИХ-аас батлагдсан хуулийг хэрэгжүүлэх, жижиг, дунд үйлдвэр эрхлэгчийг дэмжих, хөдөлмөр эрхлэлтийг урамшуулах, ажлын байр бий болгох зорилгоор анх удаа Зээлийн батлан даалтын санг үүсгэн байгуулсан. Энэ дагуу улсын төсвөөс таван таван тэрбум төгрөгийн эх үүсвэрийг санд нь бүрдүүлж тухай салбарын сайд мэдээллээ. Энэхүү сан Санхүүгийн зохицуулах хороон дээр байрладаг байна. Сангийн ТУЗ-ын даргаар Санхүүгийн зохицуулах хорооны дэд дарга Ц.Орхон ажиллаж байгаа аж. Тус сан зөвхөн төсвийн хөрөнгөөр бүрдэх сан биш юм гэдгийг мөн дуулгалаа.