УИХ-ын чуулганы өнөөдрийн /2013.06.07/ нэгдсэн хуралдаанаар эхлээд “Монгол Улсын Элчин сайдын яам, Ерөнхий консулын газар, Консулын газрыг гадаадын зарим улсад нээн ажиллуулах тухай” Улсын Их Хурлын тогтоолын төслийг хэлэлцэж, энэ талаархи төсөл санаачлагчийн илтгэлийг Улсын Их Хурлын гишүүн, Гадаад харилцааны сайд Л.Болд, Аюулгүй байдал, гадаад бодлогын байнгын хорооны санал, дүгнэлтийг Улсын Их Хурлын гишүүн Н.Энхболд нар танилцуулав.Шинээр нээх Дипломат төлөөлөгчдийн газруудын байршлыг сонгохдоо Монгол Улсын Гадаад бодлогын үзэл баримтлалын тэргүүлэх чиглэл, олон улсын хамтын нийгэмлэг болон бүс нутаг дахь тухайн улсын нэр хүнд, нөлөө, тухайн улстай хийж буй худалдааны эргэлт, эдийн засгийн харилцаа, тэнд оршин сууж буй монгол иргэд болон харилцан зорчиж буй иргэдийн тоо, манай улс дахь бодит ашиг сонирхол зэргийг харгалзан үзсэн гэдгээ Гадаад харилцааны сайд танилцуулгадаа дурдлаа.
Монгол Улсын Элчин сайдын яам, Ерөнхий консулын болон Консулын газрыг гадаадын зарим улсад нээн ажиллуулах тухай энэхүү тогтоолын төслийг УИХ-ын Аюулгүй байдал, гадаад бодлогын байнгын хороотой урьдчилан зөвшилцсөний үндсэн дээр Засгийн газраас энэ оны тавдугаар сарын 30-ны өдөр УИХ-д өргөн мэдүүлснийг тус байнгын хороо өчигдрийн хуралдаанаараа хэлэлцсэн юм.
Монгол Улсын Их Хурлын чуулганы хуралдааны дэгийн тухай хуулийн 43 дүгээр зүйлийн 43.3 дахь заалтын дагуу Бүгд Найрамдах Индонез Улсын нийслэл Жакарта хотод Монгол Улсын Элчин сайдын яам, Холбооны Бүгд Найрамдах Бразил Улсын нийслэл Бразилиа хотод Монгол Улсын Элчин сайдын яам нээх, Лалын Бүгд Найрамдах Афганистан Улсын нийслэл Кабул хотод Монгол Улсын Элчин сайдын яамны үйл ажиллагааг сэргээх, Бүгд Найрамдах Түрк Улсын Истанбул хотод Монгол Улсын Ерөнхий консулын газар, Бүгд Найрамдах Киргиз Улсын нийслэл Бишкек хотод Монгол Улсын Ерөнхий консулын газар, Бүгд Найрамдах Хятад Ард Улсын Хайлаар хотод Монгол Улсын Консулын газар, Бүгд Найрамдах Солонгос Улсын Пусан хотод Монгол Улсын Консулын газар тус тус нээж ажиллуулахыг байнгын хорооны хуралдаанд оролцсон гишүүдийн олонхи дэмжсэн байна.
Харин Засгийн газраас өргөн мэдүүлсэн төсөлд Лалын Бүгд Найрамдах Афганистан Улсын нийслэл Кабул хотод Монгол Улсын Элчин сайдын яамны үйл ажиллагааг сэргээн ажиллуулахыг тустай заалт болгож нэмсэн УИХ-ын тогтоолын төслийг нэгдсэн хуралдаанд оруулж хэлэлцүүлэхээр болжээ.
Төсөл санаачлагчийн илтгэл, байнгын хорооны санал, дүгнэлттэй холбогдуулан гишүүн М.Энхболд зардал төсөв, орон тооны хувьд ямар байх юм бэ, эдийн засгийн харилцаа, хамтын ажиллагааны үр дүнг хэрхэн харж байгаа вэ, татварын орлого хангалтгүй байгаа энэ үед олон газар нээх гэх нь хэр зохимжтойг анхаарах нь зүйтэй юм, Истанбулаас бусад нь шаардлагагүй санагдаж байна гэдгээ хэллээ. Энэ талаар сайд Л.Болд хариулахдаа, яамны зүгээс цаашид хоёр талдаа Элчин сайдын яамыг харилцан нээх зарчмыг хэрэгжүүлнэ. Энэ тогтоолд заагдсан газар орнуудын тухайд нэмэлт зардал гаргаж зөвхөн нээхийн тулд нээх гэж байгаа юм биш гадаад бодлогын чиглэл, эдийн засгийн хамтын ажиллагаа, иргэд хоорондын харилцааны байдал зэргийг харгалзан оруулж ирж байгаа юм. Хэрэв тогтоолын төсөл дэмжигдвэл ирэх жилийн төсөвт дарамт учруулахгүйгээр яам өөрийн төсөв, орон тоонд зохицуулан шийдэх боломжтой гэдгийг хэллээ. Харин гишүүн О.Баасанхүү гадаад улсад суугаа консул нь тухайн оронд байгаа иргэдийнхээ төлөө илүүт анхаарал тавьдаг байх ёстой, төсөв нь хэр байдаг юм бэ, Бразилээс газар нутгийн хувьд илүү байршилтай Чилид Дипломат төлөөлөгчийн газар байж болохгүй юу гэдгийг тодруулахад сайд Л.Болд “Ер нь Гадаад харилцааны яам бол иргэн бүрийн гадаад яам байх ёстой. Иймээс иргэндээ шаардлагатай үед туслалцаа үзүүлэх нь нэн чухал юм. Харин төсөв хөрөнгө, хүн хүчний хувьд хангалттай биш байгаа. Бразилийн хувьд бүс нутагтаа тэргүүлэх орон. Харин Чилийн тухайд харилцан нээх асуудал одоогоор байхгүй. Гэхдээ зэсийн томоохон олборлогч орон учраас цаашдаа хамтын ажиллагааг шинэ шатанд гаргах боломжтой” гэсэн хариулт өгөв.
Мөн тогтоолын төслийн талаар гишүүн Н.Батцэрэг, Ц.Нямдорж нар асуулт асууж, гишүүн Д.Ганбат, О.Баасанхүү, Л.Цог нар төслийг дэмжиж байгаа, гишүүн Ж.Батсуурь, М.Энхболд, С.Бямбацогт нар дэмжихгүй байгаагаа хэллээ. Ингээд байнгын хорооны саналаар санал хураалгахад нэгдсэн хуралдаанд оролцсон гишүүдийн 60.4 хувь нь дэмжсэнээр тогтоолын төсөл батлагдлаа гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
