“Огцрох амархан” жагсаалаас хойш улс төр бужигнаж байна. Ерөнхий сайд Л.Оюун-Эрдэнийн Засгийн газрыг задлах замаар АН-ын найман сайдыг хөөж явуулах шийдвэрийг МАН-ын Бага хурал гаргалаа. Гэвч энэхүү шийдвэрийг гаргасан Бага хурал дээр Ерөнхий сайд өөрөө огцрох өргөдлөө өгнө гэж мэдэгдсэн боловч одоог хүртэл ямар нэгэн “хөдөлгөөн” хийсэнгүй. Улс төр хөшигний цаана буцалж байгаа хэрнээ наад талдаа тодорхойгүй байдал ноёлсоор хэд хонов. Харин өнөөдрөөс Ерөнхий сайд Л.Оюун-Эрдэнэ өөртөө итгэл үзүүлэх эсэх асуудлыг УИХ-д оруулж шийдвэрлэхээр зэхэж буй гэсэн мэдээлэл цацагдаж эхэллээ. Энэ нь хэрхэн шийдэгдэхийг харж л байя.

Харин үүнээс урьтаж УИХ-ын зарим гишүүдийн үг, үйлдэл нийгэмд инээдэм, өөрт нь ханиад болон очиж байх шиг. Тухайлбал, УИХ-ын гишүүн Э.Болормаа Ерөнхий сайд Л.Оюун-Эрдэнийг огцруулахыг би зөвшөөрөхгүй гэсэн утгатай үгс хэлж явна. “Огцрох амархан” ч, эдийн засгийн өсөлтийг авчрах хэцүү гэж чуулган дээр хүртэл хэллээ. Намын Бага хурлынхаа өмнө ч ярилцлага өгөхдөө, хэдийгээр би Бага хурлын гишүүн, Ховдын МАН-ын дарга ч эцсийн шийдийг УИХ-ын гишүүд бид гаргана гэхчлэн ярьж явна.

Хамтын удирдлагатай аймгийн намын хороог толгойлдог тэрээр УИХ-ын гишүүн би зөвшөөрөөгүй байхад гэхчлэн ярьж явааг зарим хүн “ичиж”, зарим нь “эмээж” хүлээж авч байгаа юм байна. Яг л нөгөө “Би л донгодож үүр цайлгадаг гэж тахиа боддог” гэдэг шиг. Гэвч үнэндээ тахиагүй газар ч үүр цайдаг шүү дээ.

С.Бат