Монгол судлалыг хөгжүүлэх хүсэлтэй эрдэмтэн судлаачид жил бүр “Чингис хаан грант”-д өргөдлөө өгч, азаа сорьдог. Гэвч энэ тэтгэлэг хэнд “өгөгддөг” вэ гэдгийг харуулсан нэгэн сонирхолтой жишээ олны анхаарлыг татаж байна.

Соёлын сайд Ч.Номин өөрийн зөвлөх, одоогийн Соёл, спорт, аялал жуулчлал, залуучуудын яамны Төрийн нарийн бичгийн дарга С.Оюунбилэгийг ИБУИНХУ-ын алдарт Кэмбрижийн их сургуульд татвар төлөгчдийн мөнгөөр сургажээ.

Тэрбээр дэлхийн монгол судлалын гол төв болох Кэмбрижийн Монгол ба Өвөр Ази судлалын төвд суралцах эрхээ өнгөрсөн жил авч, “Чингис хаан грант”-ын үр шимийг хүртсэн байна.

          Гэтэл энэ грантыг хүсээд ч авч чаддаггүй монгол судлалаар мэргэшсэн олон арван эрдэмтэн, судлаачид бий. Харин “Хаан бууз”-ны бизнесийн шошготой гэгддэг С.Оюунбилэг шинжлэх ухааны чиглэлээр онцлог гавьяа үзүүлээгүй атал уг грантад хоёр жил дараалан хамрагдах хүсэлтээ өгөөд буй аж.

“Чингис хаан грант” нь хоёр талын бизнес ангиллын нислэг, сар бүр 3500 паундын тэтгэлэг, байр, хоолны зардлыг багтаасан "хаан шиг" хангамжтай. Үнэндээ монгол судлалыг хөгжүүлэх нь төрийн бодлогын нэг хэсэг боловч уг бодлогыг хэрэгжүүлэх хариуцлагатнууд өөрсдөө энэ боломжийг “өөртөө тохируулан” ашиглаж байгаа нь ийн ил болов. Уг грант нь татвар төлөгчдийн мөнгөөр бүрэлддэг төдийгүй өнөөгийн ханшаар нийтдээ 500 мянган ам.долларыг С.Оюунбилэгт Монгол судлалыг хөгжүүл хэмээн олгосон аж. Энэ нь одоогийн ханшаар 1.7 тэрбум төгрөг юм.

         Соёлын сайдын ивээл дор Кэмбрижд хүрсэн С.Оюунбилэг энэ жил ч мөн дахин уг тэтгэлэгт хамрагдахаар өргөдлөө өгөөд буй нь эрдэм номоор бус эрх мэдлээр сурах эрх авдгийн жишээ юм.

Тэтгэлэгтэй танилцахыг хүсвэл энд дарна уу? 

Л.Баяр