Сүхбаатарын талбайн нэрийг өөрчлөх шийдвэр нийгмийн томоохон эсэргүүцэлтэй тулгарлаа. Энэ эсэргүүцлийг даваад Сүхбаатарын талбай Чингэс хааны талбай болох эсэхийг хэлэхэд эрт байна. Улс төрийн гол сөрөг хүчнээс гадна ард түмэн дургүйцэв. МАН-ын эсэргүүцлийг ч амархан давж болно. Харин ард түмний эсэргүүцлийг давж гарах хэцүү л дээ. Гэхдээ ардчилагчид шантрахгүй дараа дараагийн олон шинэчлэлийн арга хэмжээг хэрэгжүүлэхээр болсон талаар эх сурвалж мэдээлэв. Ардчилагчдын дараагийн төлөвлөгөө бол Сүхбаатарын хөшөөг нүүлгэх, Улаанбаатар гэсэн коммунист нэрнээс салах гэсэн хоёр том зүйлд төвлөрч байгаа гэнэ.  
 

    Сүхбаатарын талбайн нэрийг сольж, Сүхбаатарын хөшөөг буулгах ажлыг нэгэн зэрэг хэрэгжүүлэх боломжгүй гэж АН-ынхан үзжээ. Учир нь ард түмний эсэргүүцэл МАН-ын тэмцэлтэй нэгдвэл зорилтоо хэрэгжүүлэхэд хүндрэл үүснэ. Тиймээс асуудлыг алсаас бага багаар хумьж байгаад санасандаа хүрэх гэсэн стратегийг сонгожээ. Эхний ээлжинд Сүхбаатарын талбайн нэрийг солчихвол Сүхбаатарын хөшөөг нүүлгэн шилжүүлэх амархан болно гэж үзжээ. Анзаарсан бол өнгөрсөн жилээс эхлэн “Сүхбаатарын талбайд Чингэсийн хөшөө байх нь зохимжгүй”, “нэг талбайд нэг удирдагчийн хөшөө байх ёстой”, “урлаг болоод логик талаасаа Чингэс, Сүхбаатарын хөшөө нэг талбайд байх зохимжгүй” гэх мэт мессежүүд гарсаар ирсэн. Бас Д.Сүхбаатарыг гутаах ажиллагаа ч өргөн хүрээнд хийгдэж байгаа. Энэ нь ард түмний санаа бодлыг өөрчлөх гэсэн зорилтын нэг хэсэг гэнэ. Мэдээж үүний цаана зорилго болоод авторууд нь бий. 

    Ингээд төлөвлөгөөний дагуу Сүхбаатарын талбайг Чингэсийн талбай болгох шийдвэрээ гаргачихлаа. Хэдийгээр “Сүхбаатарын хөшөөг нүүлгэхгүй” гэж албан ёсоор мэдэгдсэн ч гэсэн энэ бол бухимдсан олныг тайвшруулах гэсэн түр зуурын “эм” юм. Хэсэг хугацааны дараа Чингэсийн талбайд Сүхбаатар жанжины хөшөө байх нь зохимжгүй гэдэг дараагийн заль мэхээ гаргаж ирнэ. Тэгээд л Сүхбаатар жанжин буурь сэлгэх стратегитай аж. Ингэхдээ ардчилагчид Сүхбаатарын хөшөөг нүүлгэх дөрвөн ч газар бий гэж үзжээ. Нэгд Тусгаар тогтонолын талбайд байгаа Тусгаар тогтнолын хөшөөг буулгаад буурин дээр нь шижлүүлэх гэнэ. Хоёр дахь хувилбар нь МАН-ыг үндэслэгчийн нэг Сүхбаатарыгаа ав гэж тулгах бололтой. Мэдээж МАН авбал намын байрныхаа урьд талбайд эсвэл өмнөх цэцэрлэгтээ байруулна гэж тоцоолжээ. Гуравдахь хувилбар бол Амгаланд Сүхбаатарын амьдарч байсан гэрийн буурийг хамгаалсан том хашаа байдаг бололтой. Тэрийг нь тохижуулаад Амгаланруу шилжүүлэх гэнэ. Харин дөрөвдэхь хувилбар бол Сүхбаатар аймаг руу нь “нутаг буцаах” аж. Сүхбаатар аймаг төв тайлбайдаа Сүхбаатарын том хүрэл хөшөөтэй. Тиймээс Сүхбаатарын хөшөө Сүхбаатар сумын төв тайлбайд очих бололтой. Ийнхүү нийслэлийн төвөөс Сүхбаатар жанжинг ардчилагчид төрсөн нутагруу нь буцаах дараагийн төлөвлөгөөтэй гэнэ.
 

    Ардчилагчид Улаанбаатар хотыг МАН-ын олон түүхтэй холбоотой. Түүнээс нь салгах ёстой гэж үзээд байгаа бололтой. Сүхбаатарын талбайн нэрийг өөрчилж Сүхбаатарын хөшөөг шилжүүлсний дараах акц бол нийслэлийн нэрийг өөрчлөх гэнэ.
    Улаанбаатар гэдэг нэр нь коммунист агуулгатай гэж үзсэн бололтой. Бас гадныхан буруугаар ойлгодог гэсэн тайлбар дагажээ. Хэрэв Улаанбаатар хотын нэрийг өөрчлөх юм бол ямар нэр өгөх вэ гэдэг асуудал урган гарч ирнэ. Одоогийн байдлаар хэд хэдэн хувилбар байгаа аж. Өмнө нэрлэгдэж байсан хуучин нэрнүүдээс нь сонгож сэргээх хэрэгтэй гэж ярьсан бололтой. Хуучин нэрнүүдээс нь Өргөө, Нийслэл хүрээ гэсэн хоёр нэрийг чухалчилсан аж. Мөн орчин үеийн нөхцөл байдлыг харгалзан үзээд Цэнхэрбаатар гэж нэрлэхэд ч буруудах юмгүй хэмээн хөөрөлдсөн бололтой. Ийнхүү цөөхөн ардчилагчдын хүрээнд яригдсан энэхүү төлөвлөгөө үнэн бол Улаанбаатар нэрээ сольж Цэнхэрбаатар эсвэл Өргөө болох магадлал өндөр байж мэдэх юм.  
    Засгийн бүх эрхийг орон нутагтай нь хамт авсан ардчилагчид нийслэлийн хүрээнд иймэрхүү шинэчлэл хийхээр ярилцсан бололтой. Эх сурвалжийн энэ мэдээлэл үнэн худал эсэх нь ардчилагчдын дараагийн алхамуудаас тодорхой болно.