Өнөөдөр Нийслэлийн удирдлагын зөвлөгөөний хурлаар Баянзүрх дүүргийн хэсэгчилсэн ерөнхий төлөвлөгөөг хэлэлцлээ. Улаанбаатар хотыг 2020 он хүртэл хөгжүүлэх ерөнхий төлөвлөгөөнд тусгагдсан найман дэд төвийг хөгжүүлэх ажлын хүрээнд БЗД-ийн 2, 4, 5, 7, 8, 16, 19, 21, 24 гэсэн 9 хорооны нутаг дэвсгэр дээр уг төлөвлөлт хийгдсэн юм байна. Нийт 2218 га талбайг хамруулсан бөгөөд үүнээс 8, 16-р хорооны нутаг дэвсгэрийг гэр хорооллын дахин төлөвлөлтөнд хамруулж гүйцэтгэгч компанийн ажил эхэлжээ.  Харин 2, 4-р хорооны нутаг дэвсгэрийг гэр хорооллын дахин төлөвлөлтийн хоёр дахь ээлжинд хамруулж загвар төслийг нь боловсруулж НИТХ-д өргөн барьсан гэлээ.

Ерөнхийд нь авч үзвэл хотын ерөнхий төлөвлөгөө хорооноос дүүргийн хэмжээнд эхэлж байгааг хуралд оролцогчид онцлон тэмдэглэсэн юм. Дээрх төлөвлөлтөнд хамрагдсан 9 хорооны нутаг дэвсгэрт гучаад мянган айл өрхийн 117 мянга гаруй оршин суугч амьдарч байгаа бөгөөд нийт оршин суугчдын 60 гаруй хувь нь гэр хороололд амьдарч байна.

Улаанбаатар хотыг 2030 он хүртэл хөгжүүлэх ерөнхий төлөвлөгөөгөөр 36,900 өрх буюу 143,900 хүн ам энэ бүсэд амьдрахаар төлөвлөгдсөн байгаагаас орон сууцны хороололд 29 мянга орчим өрхийн 113 мянга орчим хүн ам гэр хороолол буюу амины орон сууцны хороололд 7,900 өрхийн 30 гаруй мянган хүн ам амьдрахаар төлөвлөгджээ.

БЗД-ийн энэ хэсгийн хувьд газар хөдлөлтийн 6 баллын хүчтэй газар хөдлөлтийн бүсэд хамрагдаж байна. Иймээс бусад хүчтэй газар хөдлөлттэй бүсээс барилга барих өртөг 20-30 хувь хямд байх тооцоо гарчээ.

Улаанбаатар хотыг 2030 он хүртэл хөгжүүлэх ерөнхий төлөвлөгөөнд тусгагдсаны дагуу энэ хэсгийн дэд бүтцийн асуудлуудыг шийдэхэд эхний ээлжинд 25 гаруй их наяд төгрөг байхаар тооцоолжээ. Харин нийгмийн дэд бүтцийн төлөвлөлтийн хувьд 300 метрийн радиусд нэг сургууль, 400 метрийн радиусд эмнэлэгийн үйлчилгээ байхаар төлөвлөсөн байна. Хотын дарга төлөвлөгөөтэй танилцаад хангалтгүй гэж үзсэн бөгөөд “Метро барих”  болон “Гудамж” төслүүдтэй дээрх төлөвлөгөөг нягт уялдуулж ажиллахыг холбогдох албаныханд үүрэг болголоо.