Нэгэн жарны өмнө ашиглалтад хүлээн авсан Төрийн ордны 90 гаруй хувь нь шаардлага, стандартад нийцэхгүй болсныг мэргэжлийн байгууллага тогтоожээ. Дөрвөн тусдаа блок барилгаас бүрддэг ордон газар хөдлөлтөд тэсвэргүй байгууламжийн тоонд орсон байна. Баруун хойд хэсгийн хананд нь цууралт үүсээд хэдэн жилийн нүүр үзэж байгаа Төрийн ордны арын хэсэгт УИХ-ын гишүүдийн ажлын байр бий. Харин 2006 онд байгуулсан Чингис хааны цогцолбор бүхий нүүрэн хэсэгт Монгол улсын ерөнхийлөгч суудаг байна. Тэгэхээр төрийн ордонд байрлан ажилладаг ерөнхийлөгчөөс бусад улс төрч хэзээ салж, нурахыг нь хэлж мэдэмгүй эрсдэлтэй барилгад байгаа гэсэн үг. Гаднаас нь харахад сайхан цагаан шаргал байшин байх ч доторх нь шаардлага хангахгүй болсныг холбогдох байгууллагад мэдэгдсэн ч тоохгүй явсаар өдий хүрчээ. Хууль тогтоох парламент ажилладаг, төрийн тэргүүн байрладаг, иргэд танхимдаа орж хэлэлцдэг, төрийн хамгаалалтад байдаг барилга өөрөө Монгол улсын Үндэсний аюулгүй байдалд заналхийлж байгаа гэж болно.

   Хааш хаашаа 100 метрийн урттай, 18.7 метр өндөртэй Төрийн ордонд 491 албан өрөө байдаг бол нийтдээ 932 цонхтой гэнэ. 1957, 1981, 2007 онд урсгал их засвар хийж гүйцэтгэж байсан гэнэ.