Хан-Уул дүүргийн 11-р  хороо Зайсангийн “American school” сургуулийн чанх хойно байрлах “Roma Investment” компанийн 12 давхар барилгын 11 давхраас тулгуур төмөр унаж, 17 настай хүүгийн тархинд хүнд бэртэл учруулсан билээ.  

Хэргийн араас нэхэн сурвалжлахад тус компанийн удирдлагууд бүх зүйлийг нуун дарагдуулахыг хүссэн үү сэтгүүлчдэд ямар ч тайлбар өгөхгүй байгаа юм.

Хэргийг тодруулбал, тус барилга дээр барилгын туслах ажилтнаар ажиллаж байсан Б.Батболдын толгой дээрээс тулгуур төмөр унаж, гавлын ясыг нь цөмөлж, цуулсан харамсалтай хэрэг гарсан юм. Б.Батболд нь одоогоор ГССҮТ-ийн Эрчимт эмчилгээний тасагт хэвтэн эмчлүүлж байгаа. Хэрвээ Б.Батболд каск өмсөөгүй байсан бол амиа алдах байсан нь гарцаагүй юм. Учир нь түүний каск хагарч улмаар толгой нь хүнд гэмтсэн юм.  

Ослын шалтгааны хөдөлмөрийн аюулгүй байдал хангаагүйгээс болсон гэж урьдчилсан байдлаар дүгнэж байгаа.  Учир нь барилгын гадна талаар ямар ч хамгаалалтын тор байгаагүй нь тулгуур төмрийг унахад тогтоох хаалт болоогүй аж.

Хэрэг гарсан өдөр ч мөн өчигдөр ч  “Roma Investment” компанийн барилгын хашаа руу нэвтрэх гэсэн боловч хамгаалагч нь “Манай энд ямар ч хүн алга. Бүгд гараад явчихсан” хэмээн оруулаагүй юм. Тэгвэл Тусгаар тогтнолын ордонд байрлах тус компанийн офисс дээр ирэхэд дарга нар барилга дээр байгаа гэх хариуг өгсөн юм.

Осол гарах үед хохирогчийн ар гэрийнхэн хүний амь насанд хүрэх шахсан тус барилгын компани өдгөө эл хэргийг нуун дарагдуулахаар зэхэж байгаа хэмээн мэдэгдэж байсан билээ.  Харин уг өчигдөрхөн хохирогчийн  ах С.Буяндэлгэрээс зарим нэг зүйлийг тодруулахад,  “Дүүгийн маань бие овоо дээрдсэн. Эмнэлэгтээ үргэлжлүүлэн эмчилгээ хийлгэж байна. Эмчилгээний бүх зардлыг барилгын компани гаргаж байгаа” гэв. Тэгэхээр ямар ч байсан уг компани хохирогчийн ар гэрийнхэнд мөнгөн тусламж үзүүлж байгаа аж. Харин  “Roma Investment” компанийн удирдлагуудтай уулзсан уу? гэж асуухад “Гурав хоногийн өмнө уулзах хүсэлт тавьсан. Гэвч өнөөдрийг хүртэл хүлээн авч уулзаагүй байна. Манай дүү тус хотхоны гаражийг хариуцан хийж байсан “Сөүл констракшн” компанийн бригадад ажиллаж байсан. Тэгээд сая “Сөүл констракшн” компанийн удирдлагууд “Roma Investment” компанийн удирдлагуудтай уулзахаар явж байна гэж надад мэдэгдсэн. Тэгэхээр уулзаад шийдэлд хүрснийхээ дараа хариу өгөх байх” гэв.

 Харин энэ хэргийн талаар цагдаагийн байгууллагаас асуухад “Шүүхийн шинжилгээний хариу гарсны дараа хариу өгнө.  Гэхдээ тухайн барилгын компанид Эрүүгийн хэрэг үүсгэсэн.  Эрүүгийн хуулийн тусгай ангийн 138.1-т зааснаар эрүүгийн хэрэг үүсгэсэн. Энэ зүйл ангид хөдөлмөрийн аюулгүй ажиллагаа, эрүүл ахуйн журмыг сахин хангуулах үүрэг бүхий этгээд энэ үүргээ биелүүлээгүйгээс хүний бие махбодид хүндэвтэр, хүнд гэмтэл учирсан бол хөдөлмөрийн хөлсний доод хэмжээг 5-25 дахин нэмэгдүүлсэнтэй тэнцэх хэмжээний төгрөгөөр торгох, эсхүл 1-3 сар хүртэл хугацаагаар баривчлах ял шийтгэнэ гэж заасан байдаг” гэв.

Тэгвэл ар гэрийнхэн нь энэ зүйл ангийг хүлээн зөвшөөрөхгүй байгаа юм. Өөрөөр хэлбэл тэд тус зүйл заалтыг Эрүүгийн хуулийн тусгай ангийн 183.1-т зааснаар аюулгүй ажиллагааны журам зөрчих гэж өөрчлүүлмээр байгаа гэдгээ бидэнд мэдэгдсэн юм. Ямартаа ч тухайн байгууллагаас эмчилгээний зардал, мөнгө төгрөг өгч байгаа хэрнээ одоо болтол ар гэрийнхэнтэй нь ирж уулзаагүй байгаа юм. Мөн сэтгүүлчдийг  ч халгаахгүй хэргийг нууцалж байгаа нь цаанаа нэг учиртай биз ээ.