Камаз маркийн машин, галт тэрэгтэй мөргөлдөж хоёр хүн хүнд бэртсэн ноцтой осол өнөө өглөө гарчээ. Тодруулбал, “Sky resort” цанын баазын урд төмөр замын гарам дээр төмөр замын гармаар гарах гэж байсан камаз маркийн машиныг галт тэрэг хүчтэй мөргөсөн байна. Улмаар камазны жолооч цонхоороо шидэгдэн хүн бэртжээ. Яаралтай түргэн тусламжийн эмч нар ирж, машины жолооч болон галт тэрэгний жолоочийг эмнэлэг рүү авч явсан байна. Одоогоор ослын газар Баянзүрх дүүргийн цагдаагийн алба хаагчид болон онцгой байдлын алба хаагчид ажиллаж байна. 
Урьдчилсан байдлаар камаз галт тэрэгний гармаар гарахаар нэг гармыг нь онгойлгуулахаар зогсож байсан ч төмөр замын ажилчид онгойлгож өгөөгүйгээс галт тэрэг ирж мөргөсөн гэсэн дүгнэлт гараад байгаа юм байна. Харин эх сурвалжийн мэдээлснээр,  Богд уулын хойд авто замыг барьж  байгаа компанийн Камаз төмөр замын горим зөрчсөнөөс үүдэн энэ осол гарсан аж. Мөн камазын жолооч хамгаалалтын бүс зүүгээгүйгээс цонхоороо шидэгдсэн гэдгийг цагдаагийн алба хаагчид хэллээ.