Монгол улс, БНСУ-ын Засгийн газрууд хооронд өнөөдөр 300 сая ам.долларын хөнгөлөлттэй зээлийн хэлэлцээр байгууллаа. Солонгосын Эдийн засгийн хөгжлийн хамтын ажиллагааны сан /ЭЗХХАС/-гаас монголчууд 2011-2015 онд дээрх зээлийг авч байгаа юм. Сангийн сайд С.Баярцогт болон Солонгосын элчин сайд Жон Ил нар хэлэлцээрийг баталгаажуулж гарын үсэг зурлаа. 300 сая долларын хөрөнгийг ард иргэд аюулгүй амьдрах нөхцлийг бүрдүүлэхийн тулд эрүүл мэнд, агаарын бохирдол бууруулах төсөлд зарцуулахаар аж. Үүний хүрээнд 55 сая ам.доллароор нь “Үндэсний оношлогоо, эмчилгээний төв барих төсөл” гэрээ хэлцлийн шатандаа орсон гэнэ. Энэ зээлийн хүү нь 0.15 хувь. Зээлээ эргэн төлөх хугацаа 35 жил бөгөөд үндсэн төлбөрөөс чөлөөлөгдөх хугацаа нь 10 жил байхаар талууд тохирчээ.

   БНСУ-ын Засгийн газар “Ногоон өсөлт”-ийг дэмжих бодлого хэрэгжүүлж байгаа тул “Сэргээгдэх эрчим хүч”-ний төслийг санхүүжүүлэх сонирхолтой байна. Тухайлбал, нар, салхины эрчим хүч, биотехнологи, хог хаягдлын боловсруулалт, цэвэр, бохир усны систем, бохир ус цэвэршүүлэлт зэрэг төсөлд хөнгөлөлт үзүүлнэ. Тодруулбал, дээрх 0.15 хувийн зээлийн хүүг 0.05 хүртэл буулгаж, төлөлтийн хугацааг 40 жил болгох ажээ.

   Манай улс ЭЗХХАС-гаас 1993 оноос хойш зээл авч иржээ.  2007 он хүртэлх хугацаанд өөр өөр салбарын долоон төсөлд нийт 60 гаруй сая ам.доллар зээлсэн юм. 1989 оны зургадугаар сарын 1-нээс хөгжиж буй орнуудын эдийн засгийг дэмжих зорилгоор ЭЗХХАС-г  байгуулсан гэнэ.