XX зууны суутны нэг Стив Жобсын дэлгэрэнгүй намтар англи хэл дээр 10 дугаар сарын 24-нд хэвлэгдэн гарсанаас хойш одоо энэ өдрүүдэд дэлхийн бусад хэлнээ ид орчуулагдан тарж байна. Орос хэл дээр гэхэд л ердөө өнгөрсөн долоо хоногт гарчээ. Алдартай намтарч Уолтэр Айзэксоны бичиж “Simon & Schuster” хэвлэлийн газраас гаргасан “Steve Jobs” хэмээх товчхон нэртэй энэ номд монголчуудын хамгийн сайн таньдаг нэгэн канад эрийн тухай товчхон боловч орсон нь сонин. Тэр бол Роберт Фрийдланд. Уолтэр Айзэксоны бичсэн нь: “90-ээд оны дундуур Р.Фрийдланд Америкт ажиллуулж байсан хэд хэдэн уурхай нь байгаль орчин бохирдуулсан хэмээн асуудалд унахад С.Жобстой холбоо барьж уулзахыг оролдов. Санаагаар нь бол тэрбээр С.Жобсоор дамжуулан ерөнхийлөгч Б.Клинтонтой уулзахыг зорьжээ. Б.Клинтонтой уулзах гэсэн нь мэдээж, уурхайнуудынхаа асуудлыг зохицуулж толгой бүтэн гарах арга хайсан хэрэг. Гэвч С.Жобс “за” ч гэсэнгүй “үгүй” ч гээгүй, хар цагаан дуугүй байсаар өнгөрсөн юм. Роберт бол өөрийгөө оюуны онцгой чадамжтай хүн гэж харуулахыг хэзээнээс чармайж ирсэн нөхөр. Гэхдээ олныг араасаа дагуулж, манлайлж явсан нь багадаад хэтэрхий урагшаа зүтгэснээрээ тэрбээр байдаг л нэг луйварчин болсон юм”. 

   Уолтэр Айзэксоны бичсэн дотор үнэн зүйл аргагүй бий юм. Р.Фрийдланд С.Жобстой бүүр залуу цагийн танилууд гэдэг нь үнэхээр баримт. 1972 онд С.Жобсыг Орегон мужийн Портлэнд хотын Рийд коллежид элсэж байхад Р.Фрийдланд түүнийг төгсөж байв. Хожим нь 70-аад оны дундуур Р.Фрийдланд хар тамхи хадгалсан хэргээр багавтар хугацаагаар хоригдох ял эдлээд гарангуутаа Орегонд очиж All-One Farm хэмээх хиппичүүдийн цуглааныг бий болгож орон байраар хангахад С.Жобс түүнд нь нэг хэсэг байнга очдог байжээ. Хиппичүүдийн ид үеийн Америкийн нэг нэртэй зүтгэлтэн Уэйви Грэй тэдний дундын найз байсан гэх бөгөөд У.Грэйн намтарчийн 1984 онд бичсэн нэг номд өгүүлсэнээр бол Р.Фрийдландын All-One Farm цуглаанд сүүлд очихоо байсан шалтгаанаа С.Жобс хэлэхдээ “Дургүй хүрмээр, хэтэрхий материалистууд цуглачихсан газар юм байна” гэсэн байдаг. Мөн нэг сонирхолтой нь С.Жобсын байгуулсан “Apple” компанийн нэрийн гарал үүслийн талаар нэгэн сонин баримт түүний хамтран зүтгэгч С.Вознякийн өгүүлсэн зүйлд  буй. Р.Фрийдландын хиппичүүд цуглуулдаг газар нь түүний эцэг эхийн эзэмшиж байсан жимсний бяцхан цэцэрлэг байжээ. С.Жобс чухам тэнд очиж хиппичүүдтэй нийлэхийн хажуугаар ажлаа амар тайван хийдэг байж. Оуэн Линцмайэрийн бичсэн “Apple Confidential 2.0: The Definitive History of the World"s Most Colorful Company” хэмээх номд С.Возняк энэ тухай өгүүлсэн нь: “Орегоны тэр All-One Farm гэдэг хуаран маягийн газар Стив байсгээд л нэг очиж хэдэн сар байж байгаад Калифорнид буцаж ирдэг байлаа. Нэг удаа явж ирүүтээ “Би нэг лут нэр бодож оллоо: Apple Computer”  гэж хэлсэн юм. Тэр очдог газар нь алимны модтой байсан юм уу, бүү мэд. Би л лав тэгэхэд асуугаагүй юм.  “Битлз”-ийн “Apple Records”-оос санаа авсан ч байж болох. Техникийн хүмүүс хөгжим их сонирхдогтой адил Стив бас тийм хүн л дээ. Ингээд сонсогдох байдал энэ тэрийг нь өөр бусад нэрстэй харьцуулж 10 гаруй минут зөвлөлдсөний эцэст, “Apple Computer”-ээс илүү гарах нэр олдохгүй юм байна гэж хоёул санал нэгтэй шийдсэн билээ”