МУЭ-ийн үзэсгэлэнгийн танхимд Төрийн соёрхолт зураач Ц.Цэгмэд, зураач Н.Энхтуяа нарын уран бүтээлийн хамтарсан үзэсгэлэн нээлтээ хийлээ. Уг үзэсгэлэнд хоёр зураачийн 62 бүтээлийг дэлгэж байгаа бөгөөд ихэвчлэн тосон, зотон будгаар зурсан бүтээлүүд тавигджээ. Төрийн соёрхолт зураач Ц.Цэгмэдийн бүтээлүүд нь нүүдэлчдийн амьдралыг байгаль орчинтой уялдуулан монгол хүний сэтгэлгээний онцлог бэлгэдэлт байдлаар дүрс, орон зай, өнгийг илэрхийлэн үзүүлсэн байна. Түүний уран бүтээлүүд байгаль ертөнцийн далд утга учир санааг дүрслэх урлагийн хэллэгээр та бидэнд дамжуулан илэрхийлж буйгаараа онцлогтой. Тэрбээр 1995 онд "Мөнх тэнгэрийн эвийн чуулга" зургаараа "шилдэг уран бүтээлч", 1996 онд уг бүтээлээрээ Төрийн соёрхол хүртсэн юм. 2000 онд түүний "Орхон" бүтээл Азийн 50 шилдэг уран бүтээлийн нэгээр шалгарсан. Харин зураач Н.Энхтуяа нь эмэгтэй хүнийг дүрслэхдээ байгалийн сайхантай холбон дүрсэлдэг юм. Мөн эмэгтэй хүний дотоод сэтгэлийн нарийн нандин нууцыг байгаль дэлхийн дүр дүрслэлтэй холбон ёгтлон үзүүлсэн байдаг. Үзэсгэлэн энэ сарын 8-ныг хүртэл үргэлжлэн гарах ажээ.

Т.Хулан