Өнгөрсөн нэгний өдөр Бээжин дэхь ОХУ-ын ЭСЯ “Хятадын twitter” гэгддэг sina.com хэмээх сайтад өөрийн микроблогоо нээтэл санаанд оромгүй эсэргүүцэлтэй учирчээ. Оросууд блогынхоо нүүр хуудсанд “Сайн байцгаана уу? Бид БНХАУ-д суугаа ОХУ-ын ЭСЯ байна. Манай блогт тавтай зочилно уу” хэмээн ёсорхуу эхэлтэл тэр даруй блогыг нь хараал, доромжлол, есөн шидийн муу үгээр булж эхэлжээ.  Орост Хятадыг түнш, анд нөхөр, холбоотон хэмээн аль сайхнаар нэрлэн зогсоо зайгүй сурталчилдаг боловч хэрэг дээрээ хятадууд Оросыг нэг нүдээрээ үздэггүй гэдэг нь энд туйлын тодорхой илэрсэн байна. Ийм явдал болно гэж огтоос санаагүй байсан сайтын модераторууд болоод ЭСЯ-ныхныг харсаар байтал эхний нэг цагийн дотор хар бараан утгатай хэдэн мянган сэтгэгдэл блогыг нь нэгмөсөн булж орхижээ.

    Сэтгэгдлээс харахад оросуудад Хятадын иргэдийн хамгийн зэвүүцдэг зүйл нь газар нутгийг нь “булааж авсан” явдал аж. Тэдний бичсэн зүйлийн үнэмлэхүй дийлэнх нь чухам ийм агуулгатай бөгөөд үүнийх нь дотор манай Монголын асуудал цохиж явна. Өөрөөр хэлбэл хятадууд өөрийнхөө уугуул нутаг болох Монголыг оросуудад булаалгасан хэмээн тэдэнд нүд нь хорсч явдаг ажээ. Монголоос гадна үнэндээ монголчуудын уугуул нутаг Балхаш нуураас зүүн тийшх газар орон, Алтай, хуучин Урианхай буюу Туваг хятадууд мөн “өөрийн юм” гэж үздэг нь эндээс тодорхой харагдана. Мөн Сахалин, Оросын зүүн өмнөд нутгийг тэд “эргүүлж авах” хууль ёсны эрхтэй гэж үнэн голоосоо итгэдэг аж. Ийнхүү “Гадаад Монгол” болон эдгээр нутгийг нийлүүлээд хэдэн сая кв/км газрыг хятадууд “Эргүүлж өг!” хэмээн оросуудаас хилэгнэн шаардсан байна. Үнэндээ бол энэ нь шинэ зүйл биш бөгөөд Хятад улс Орост алдсан газар нутгийн талаарх суртал ухуулгыг иргэдийнхээ дунд идэвхтэй явуулдаг гэдгийг ЭСЯ тооцоолж ийм явдалтай тулгарахаа урьдчилан харах хэрэгтэй байсан байж магадгүй. Сонирхолтой нь, газар нутгийн дараагаар оросуудаас шаардсан хоёр дахь зүйл бол хятадууд тэднийг өнгөрсөн зуунд төрүүлж бойжуулан экспортолсон коммунист нам хэмээх “төрсөн хүү”-гээ буцааж авахыг хүссэн байна. Хятадууд Оросыг өнөөгийн тоталитар дэглэмийн зохион бүтээгч гэж үздэг бөгөөд Хятадад коммунист дэглэмийн учруулсан гай гамшгийн гол буруутан нь Орос гэж боддог ажээ. Мөн л олон мянган хятад хүн энэ бодлоо Оросын ЭСЯ-ны блогт илэрхийлсэн байна.  

   Нэгний өдрийн үдээс хойш гэхэд Оросын ЭСЯ техникийн арга хэмжээ авч сөрөг агуулгатай гэж үзсэн сэтгэгдлүүдийг устган хаалт хийж, “жирийн хятад иргэд” Оросын ЭСЯ-нд баяр хүргэн мэндчилж буй үг өгүүлбэрүүдээр сольжээ. Гэвч арилгасан тэдгээр сэтгэгдлүүд нь тэр чигээрээ шахуу бусад интернэт форум, блогуудаар тарж энэ явдал нийтдээ гадаад орнууд дахь хятад хэл дээрх вэб хэвлэлүүдийн сэдэв болсон билээ.