-Онцгой байдлын газарт ямар дуудлага голлон ирж байна?

-Зуны улиралд иргэд маань аялал зугаалгаар явах нь ихэсдэг. Үүнтэй холбоотойгоор голын усанд боогдох, автомашинтайгаа суух зэрэг тохиолдлууд их гарч байна. Мөн обьектийн болон ой хээрийн гал түймэр, зам тээврийн осол зэрэг аврах ажиллагааны дуудлага ихэнх хувийг эзэлж байна. Нийслэлийн хэмжээнд галын дуудлага өдөртөө 10 орчим ирж байхад орон нутагт 3-5 удаа ирэх жишээтэй. Энэ зуны хувьд хур бороо элбэгтэй байлаа. Нийт нутгийн бүх голын усны түвшин нэмэгдсэн. Халх голын усны түвшин гэхэд 10 см нэмэгдсэн. Үүнээс үүдээд усанд үйх, осолдох тохиолдол их гарсан. Он гарсаар гол усанд осолдсон хүний тоо 109 байгаагийн 22 нь бага насны хүүхэд байсан. Гол усанд осолдох тохиолдол 18 аймгийн 50 гаруй сум, нийслэлийн дөрвөн дүүрэгт гарсан.

-Бага насны хүүхэд үер, уснаас болж амь насаа алдах нь их байна гэлээ. Энэ нь юунаас болж байна вэ?

-Гамшигт өртөж байгаа хүмүүсийн 30 гаруй хувийг хүүхдүүд эзэлж байна. Энэ нь ихэвчлэн эцэг, эх хүүхдээ хараа хяналтгүй байлгаснаас үүдэлтэй. Хүүхдүүд нь гол дээр харж хандах хүнгүйгээр  тоглож байгаад эндсэн тохиолдол их байна. Одоо хүйтний улирал эхлэхээр ил галлагаатай айлуудад бага насны хүүхдээ үлдээснээс гал түймрийн осол гарах нь нэмэгддэг. Үүнд эцэг, эхчүүд анхаарах хэрэгтэй байна.

-Дуу цахилгаантай, аадар борооны улмаас зам, гүүр нурах тохиолдол гарсан гэсэн. Үүнээс тодруулахгүй юу?

- Өнгөрсөн зун дуу цахилгаантай, аадар бороо их орсон. Аянга цахилгаан бууж нийт 19 удаагийн тохиолдлоос нас барсан хүн долоо байснаас түлэгдэж гэмтсэн хүн гурав, хорогдсон мал 400 гаруй байгаа. Гэнэтийн аадар борооны улмаас байгалийн аюултай нөхцөл байдал үүсч зарим аймагт зам, гүүрийн ажилд хохирол учирсан. Жишээ нь өнгөрсөн долдугаар сард Өвөрхангай аймгийн Хархорин суманд замын ажил саатсан бол зургаадугаар сард Ховд аймагт хүчтэй үер буусны улмаас зам сэтэрсэн. Үүнээс гадна хэд хэдэн аймагт гүүр нурсан аюулт үзэгдэл гарсан. Азаар энэ үеэр хүний амь нас эрсдээгүй.

- Байгалийн аюулт үзэгдлээс шалтгаалж томоохон бүтээн байгуулалт, дэд бүтцийн салбарт хохирол учирсан тохиолдолд хэн хариуцдаг юм бол?

- Ер нь байгалийн давтагдашгүй хүчин зүйлээс үүдэн гарсан хохирлыг тухайн аймгийн гамшгийн сангаас барагдуулах ёстой. Харин гамшгийн сангийн хөрөнгөөс илүү гарсан тохиолдолд Засгийн газар нөхөн төлбөрийг гаргадаг. Гэхдээ үнийг нь үнэхээр байгалийн аюултай нөхцөл байдал уу гэдгийг албан ёсоор тогтооно. Дээрх тохиолдлууд нь бүгд аюулт үзэгдлийн улмаас үүдэлтэй осол байсан.

-Малын халдварт өвчин гарсан тохиолдол бий. Үүнийг бүрэн устгасан болов уу?

-Энэ жилийн хувьд хүний болон малын халдварт өвчин Архангай, Баян-Өлгий, Увс зэрэг аймгуудад гарсан. Баян-Өлгий аймагт гэхэд 2000 малыг вакцинжуулж, 1400 малыг зориудаар устгасан байна. Архангай аймгийн Цэнхэр, Өгий нуур, Увс аймгийн Тэс суманд боомоор өвчилсөн тохиолдол гарсан. Үүнд мэргэжлийн байгууллагууд нь холбогдох арга хэмжээг авч ажилласан.

-Онгой байдлын газар хүн хүч, техник хангамжийн хувьд дутагдалтай байсаар ирсэн. Энэ талаар хэр анхаарч байгаа бол?

-Ер нь бол сүүлийн жилүүдэд тоног төхөөрөмж, техник хэрэгслийг сайжруулахад анхаарч байгаа. 2013 онд л гэхэд 7,3 тэрбум төгрөгийг тоног төхөөрөмжинд зарцуулсан. Энэ зун 22 автомашиныг Япон- Монголын засгийн газрын гэрээний дагуу нийслэлийн гал унтраах ангиудад хуваарилсан. Сая гарсан “Нарантуул” захын галын үеэр энэ машинуудыг ашиглаж, галыг илүү их газар тархахаас сэргийлэн ажилласан.

-Хуурайшилтын улирал эхлэлээ. Энэ үед иргэдийн болгоомжгүй байдлаас гал түймэр гарах нь бий. Иргэдэд ямар сэрэмжлүүлэг хүргэх вэ?

-Хуурайшилтын үе эхэлж байгаатай зэрэгцэн, хадлан, ургацаа хурааж авах  намрын их ажил ч эхэлж байна. Энэ үед бүрэн бус техниктэй ажилласны улмаас түймэр гарах тохиолдол нэмэгддэг. Машины оч баригчгүйгээс үүдэлтэй галын аюул гарах тохиолдол их гардаг. Хэдийгээр ОБЕГ-аас сэрэмжлүүлгийг өгдөг боловч төдийлөн анхаараагүйгээс өөрсдөө  аюултай нөхцөл байдал хүрэх нь байна. Тиймээс бүрэн бүтэн техниктэйгээр, анхаарал  болгоомжтой ажиллах нь зүйтэй. Мөн ой хээрийн болон санамсаргүй байдлаас үүдэн гарах гал түймрийн аюулаас болгоомжлох сэрэмжлүүлгийг иргэддээ хүргэж байна.