УИХ-ын хамгийн залуу гишүүн Ж.Энхбаяр өнгөрсөн сарын 10-25-ны өдрүүдэд УИХ-ын гишүүн Ц.Дашдорж, Говь-Алтай аймгийн засаг даргатай нийлж 237 чоно авласанд Г.Баярсайхан тэргүүтэй УИХ-ын зарим гишүүд ихээхэн дургүйцэж байна. Тиймээс түүний харьяалагдаг Байгаль орчин, хүнс, хөдөө аж ахуйн байнгын хорооноос гишүүнийг хөөх саналтай байгаа аж. Байн байн бяцхан алдаа гаргаж, түүнийгээ “нялх” хэмээн өхөөрдүүлээд өнгөрдөг байсан Ж.Энхбаяр энэ удаа чангахан бангадуулах нь ээ. Уг нь дөч шахаж яваа эрийг нялх гэж өхөөрдөх нь утгагүй л дээ. Тэрбээр өөрийнх нь сонгогдсон тойргийн малыг барьж идээд болохгүй байгаа чоныг нэг сайн хашраагаад өгье гээд чоно авлах аян зохиосон ч тоог нь дэндүү хэтрүүлчихэж. Уралдаан зарлаж, олон чоно алсанд нь мөнгө өгнө гэсэн болохоор Говь-Алтайнхан тун идэвхитэй оролцож 700 мянгаас 300 мянган төгрөгөөр шагнуулсан. Авласан чоноо аймгийн төвийн талбайд хүмүүст үзүүлж, зураг хөргийг нь хэвлэлээр гаргаж баахан шоу хийсэн. Тэрбээр 237 чоно авлахад шагналд нь сая гаран төгрөг л зарцуулсан бололтой юм билээ. Гурван жил гаруй Хууль зүйн байнгын хороо, Байгаль орчин, хүнс, хөдөө аж ахуйн хорооны “сайн жаал” байснаа сонгуулийн чимээнээр сонгогчиддоо таалагдах гэж аян өрнүүлсэн нь муу нэр зүүлгэв.
   Уг нь Гаалийн ерөнхий газар, Улсын мэргэжлийн хяналтын газар ажиллаж байсан хүний хувьд чоныг ингэж хоморголон авлаж болохгүйг мэдмээр юм. Эсвэл бүр хариуцлагагүй хүлээлгэх заалт байдаггүй хуулийн цоорхойг сайн мэддэг болоод ингэв үү. Өнгөрсөн хаврын чуулганаар Ж.Энхбаярыг чоно авласан ихэд гомдож байгаа Г.Баярсайхан нарын гишүүд “Талын чоныг хамгаалах” тухай хуулийн төсөл санаачилж байсан юм. Хамгаалах гэж ядаж байгаа чоныг нь олноор нь устгасанд “Байгальд ээлтэй гишүүн” цол авч, байгаль орчны төлөө цогтой тэмцэгч болсон Г.Баярсайхан гишүүн түүнийг зүгээр өнгөрөөхгүй гэж шүд зууж байгаа. Тиймээс ч удахгүй Ж.Энхбаяр гишүүнийг байнгын хорооноосоо хөөх саналыг УИХ-ын даргад барихаар бичиг цаасаа аль хэдийн бэлдчихсэн гэж эх сурвалж хэлж байна. Тэр холоос мөнгийг нь авчихсан Алтайн анчид түүнийг өмөөрөөд ч нэмэргүй болов.